Berlinə deyil də Münhenə səyahət etməyiniz üçün 10 səbəb

Almaniyaya səyahət edirsinizsə, Münhen şəhərini mütləq ziyarət etməlisiniz. "Niyə Berlin deyil də Münhen?" dediyinizi eşidirəm sanki. Narahat olmayın, bugünki bloqda tam olaraq bu suala cavab axtaracayıq.

Münhen görməli mənzərələr, heyrətamiz yerlər, memarlıq abidələri ilə zəngindir. Məşhur "Oryol i Reşka"-nın bir epizodunun burda çəkilməsi təsadüfi deyil. Münhenin Almaniyanın ikinci paytaxtı olaraq bilinməsi də heç kimə sirr deyil və bunun səbəbi, şəhərin Bavariyanın “ürəyi” olmasıdır. Münhen o qədər qonaqpərvərdir ki, siz onu asanlıqla tərk edə bilməyəcək və buraya təkrar-təkrar səyahət etmək istəyəcəksiniz. Almaniyanın pivə paytaxtı Münhendə hər il təşkil edilən Oktoberfest haqqında isə, yəqin ki, planetdəki hər kəsin xəbəri var.

İndi isə, əsas mözvuya qayıdaq və niyə Berlinə deyil də Münhenə getməli olduğunuzu göstərən 10 səbəblə tanış olaq.

1. Məşhur BMW muzeyi

Ən məşhur avtomobil istehsalçısının dünya şöhrətli BMW muzeyi, hamı üçün, amma xüsusi ilə də avtomobil həvəskarları üçün ən unudulmaz ekskursiyalardan olacaqdır. Muzey öz interaktivliyi, ən müasir texnologiyası və çox sayda eksponatı ilə tanınır. Burada BMW avtomobillərinin ilkin modellərini, eləcə də bu yaxınlarda bazara çıxmış son modellərini görə bilərsiniz. 3 və ya 103 yaşında olmağınızdan asılı olmayaraq, bu muzey sizi heyrətləndirəcək və zövq verəcəkdir.

Benzin deposu qapağı şəklində dizayn edilən bu muzeyin bənzəri Berlində yoxdur və elə bu, Münhenə səyahət üçün birinci səbəbdir.

2. Noyşvanştayn qəsri

Noyşvanştayn qəsrinin adını düzgün tələffüz etmək o qədər də asan deyil, lakin mürəkkəb adı onun gözəlliyinə heç bir halda təsir etmir. Münhendə çox gözəl, əzəmətli qalalar və qəsrlər var, ancaq bu qəsr turistlər arasında çox populyardır. Noyşvanştayn "Yeni Qu quşu daşı qəsri‎" deməkdir və bu nəhəng tikili fransız Disneylenddəki “Yatmış gözəl” malikanəsinin prototipi idi.

Noyşvanştayn səfəriniz baş tutsa, burada etməniz gərəkən ilk şey qotik kafedral kilsəsini, Qrotto (şəlaləli mağara) və Müğənnilər zalını (Hall of Singers) ziyarət etməkdir. Qəsrdə uzun müddət vaxt keçirə bilərsiniz. Noyşvanştaynı hər gün 6 mindən çox turist ziyarət edir və buna görə də Almaniyada ən populyar turistik yerlərdən hesab olunur.

Maraqlı fakt: Çaykovski “Qu quşu” baletini məhz buraya ziyarətindən sonra qələmə alıb.

3. Hofbrauhaus restoranı

Pivə içməsəniz belə, Münhen şəhərinin mərkəzində yerləşən bu restoranı mütləq şəkildə ziyarət etməlisiniz. 17-ci əsrdən saray üçün pivə istehsal etmiş bu restorana hətta bir vaxtlar Lenin və Motsart da təşrif ediblər. Berlində belə bir yer varmı?

Hofbrauhaus çox genişdir və daxilində eyni zamanda 4000-ə qədər ziyarətçi pivə içə bilər. Restoranda 3 növ həqiqi pivə ilə yanaşı, Bavariya spesiyallarının da dadını çıxara bilərsiniz.

4. English Garden

Bəlkə də Almaniyaya səyahət zamanı İngilis bağında gəzmək sizə qəribə görünür, ancaq bu Berlini deyil də Münheni seçməniz üçün əsas 10 səbəbdən biridir. Hətta bu bağ Nyu-Yorkun dünyaca məşhur Mərkəzi Parkından belə daha böyükdür. Təsəvvür edin, bağın tarixi 18-ci əsrdən başlayır. Adının İngilis bağı adlandırılmasının səbəbi isə, qeyri-adi ingilis peyzaj dizaynına görədir.

Şəhərin mərkəzindəki bu təbii oazis, onu ziyarətçilər arasında populyar edən bir çox üstünlüklərə malikdir:

•    pivə bağları (geniş çeşiddə pivə və ənənəvi qəlyanaltılar təklif edən açıq restoranlar)
•    hər kəsin istirahət edə biləcəyi geniş çəmənliklər
•    bir çox su hövzələri, çaylar və kiçik göllər
•    çoxlu körpü
•    çaydakı süni dalğalanmalar

5. Daxau

Alman tarixi xüsusilə İkinci dünya müharibəsi dövründə çox da yaxşı olmayan hadisələrlə doludur. Münhendən çox da uzaq olmayan Daxau qəsəbəsində bir vaxtlar Nasist həbs düşərgələri yerləşirdi. Bu düşərgə tarixdə günahsız insanların öldürüldüyü və işgəncə edildiyi yer olaraq iz qoymuşdur. Bu gün 14 yaşı olan hər bir kəs düşərgəni ziyarət edə bilər. Ola bilsin ki, ekskursiyanın təsiri ağır olsun, amma unutmamaq lazımdır ki, bu düşərgələr həm alman həm də dünya tarixinin önəmli bir parçasıdır.

6. Şopinq

Təəccüblənməyin, amma Münhendəki alış-veriş imkanları bu şəhəri Berlinə tərcih etməyiniz üçün başqa bir səbəbidir. Münhen şəhəri bütün Avropada alış-veriş mərkəzləri, müntəzəm endirim kompaniyaları ilə yanaşı, məşhur mağazalardakı satış rəqəmləri ilə tanınır.

Əgər siz, aşağı qiymətlərlə marka mallar axtarırsınızsa, Münhenə səyahət etməlisiniz. Xüsusilə, iyul və ya dekabr aylarında getmək daha yaxşıdır, çünki bu zaman Maximilianstrasse-dəki marka butiklər % 50-ə qədər endirimlər təklif edirlər.

Münhenin yaxınlığında Ingolstadt Village adlı kiçik bir kənd var ki, siz burada şopinq edərək həm keyfiyyətli marka malllar əldə edə həm də pulunuza qənaət edə bilərsiniz. Münhendə alış-verişinizi həftə sonuna planlayırsınızsa, bazar günü mağazaların işləmədiyini unutmayın.

7. Oktoberfest

Əgər siz içməyi və əylənməyi sevirsinizsə, Münhenin Oktoberfest festivalı tam da sizin üçündür. Bu festival hər il dünyanın dörd bir tərəfindən turistləri cəlb edir, bu da o deməkdir ki, Oktoberfestdə əylənib, istirahət etməklə yanaşı çox sayda yeni dostluqlar da qura bilərsiniz.

Çeşid-çeşid alkoqol, kolbasa, sosiska və digər bol kalorili qidalar... Festivaldan ac olaraq getməyəcəyiniz dəqiqdir. Həmçinin, Oktoberfest çox al-əlvan bir festivaldır. Gündəlik həyatda geyinməyə uyğun olmayan, qəribə paltarlarınız varsa, bu festival üçün uyğun olacaq və hər kəs tərəfindən bəyəniləcək. İntellektual insanlar, məşhur Bavariya fabrikləri tərəfindən hazırlanan çoxlu “hoppy” içkilər, daha bir çoz ləzzətlər və ən əsası şən əhval-ruhiyyə - bunların hamısı Münhen Oktoberfestinin hər bir qonağını nələrin gözlədiyidir.

Bəs yaxşı, Oktoberfest nə vaxtdır? Festival hər il sentyabrın ortalarından oktyabrın əvvəllərinə qədər Theresienwiese çəmənliyində baş tutur. Bu məşhur şənlikdə 6 milyondan çox insan iştirak edir və əgər siz əylənmək, yeni dostlar edinmək, bolca yemək istəyirsinizsə, Berlnə deyil də mütləq şəkildə Münhenə səyahət etməlisiniz.

8. Alp dağları

Bir çox insan Münhenin özü də daxil olmaqla, Bavariyanı, Almaniyaya aid olmayan ayrı bir ölkə olaraq düşünür. Bunun səbəbi, Münhenin digər alman şəhərlərindən tamamilə fərqlənməsidir.

Münhendə edə biləcəyiniz başqa bir turist fəaliyyəti isə Alp dağlarına getməkdir. Bu məqsədlə dəmir yolundan istifadə edərək, qatarla Garmisch-Patenkirchen stansiyasına gedə bilərsiniz. Məsafə 100 km-dən artıq olsa da, dağlara çatanda gördüyünüz valehedici mənzərənin yola dəyər olduğunu anlayacaqsınız.

Alp çəmənlikləri, meşələri və talaları... Bunların hamısı Almaniyaya səyahət edən hər bir kəsin görməli olduğu şeylərdir. Avropadakı bu yer sizin qəlbinizi sonsuzadək fəth edəcək yerdir. Qış, ya da yay, fərqi yoxdur, Bavariya Alpları hər zaman gözəldir. Alp çəmənliklərində yerləşən kiçik Oberammergau kəndi, əsl Bavariya pivəsi ilə folklor ənənələrinin birləşməsidir. Bütün hallarda Alp dağlarında gəzinti həm böyükləri, həm də uşaqları sevindirəcəkdir.

9. Muzeylər

Münhendə hər qəsəbədə muzeylər var və bu heç kim üçün təəccübləndirici deyil, ancaq şəhərdəki ən əsas muzeylər məşhur Alman muzeyi (Deutsches Museum) və onun filiallarıdır. Alman muzeyi İzar adasında yerləşir və dünyanın ən böyük texniki muzeyidir. Düşünürsünüz ki, buranı bir gündə gəzib-dolaşa bilərsiniz? Xeyr! Muzeydə o qədər çox eksponat var ki, hamısını kəşf etmək xeyli vaxtınızı alacaq. Siz həmçinin buradakı eskponatlara toxuna və hətta bəzilərini sınaqdan da keçirə bilərsiniz.

10. Futbol

Əgər siz futbol pərəstişkarısınızsa, bunun özü Berlinə deyil də Münhenə səyahət etməyiniz üçün bir səbəbdir. Burada siz, Bayern Münhen futbol klubunun ev oyunlarını keçirdiyi möhtəşəm Allianz Arena-ya ekskursiya rezerv edə və hətta bazar günləri Almaniyanın ən titullu klubunun oyununu da izləyə bilərsiniz. Futbolsevərlər bu fürsəti yüz faiz qiymətləndirəcəklər və bunu da qeyd edim ki, stadion şəhərin mərkəzindən cəmi 10 km məsafədədir.

Beləliklə, bu məqaləni oxuduqdan sonra başa düşdüyünüz kimi, Münhendə hər zövqü oxşayacaq fəaliyyətlər mövcuddur. Almaniyaya səyahət etməyi planlaşdıran hər kəs mütləq bu tarixi və gözəl şəhərə baş çəkməlidir. Sizə Bavariyada xoş bir istirahət və dadlı bir pivə diləyirəm!