Travel to Paris concept

Fransa Şengen Vizası Bələdçisi | Proses və Tələblər

Ieva Miltina Ieva Miltina 12 iyul 2021
7 baxış 5 dəq. oxu

Eh, romantika və dadlı “patisserie” diyarı. Möhtəşəm tarixi hadisələrin və dünyaca məşhur mətbəxin ölkəsi. Qıcqırdılmış üzüm içkilərinin və bir dilim nəfis pendirin gündəlik rutin olduğu ölkə. Bəli, indiyə qədər bəlli olmayıbsa, Fransa haqqında danışıram. Bu sətirləri oxuyursunuz, çünki yuxarıda yazılanlar və daha çoxu bütün marağınızı cəlb etməyi bacarıb. Onları özünüz şəxsən təcrübə etmək istəyirsiniz, ancaq Fransa Şengen vizasına necə müraciət edəcəyinizi bilmirsiniz? Elə isə qələbənizi qeyd edin, çünki doğru yerdəsiniz və bir azdan bütün suallarınıza cavab tapacaqsınız. Ancaq əvvəlcə…

Fransa Şengen vizası nəyə icazə verir?

european parliament building

Şengen zonası dünyanın ən böyük vizasız səyahət zonasıdır. Bu bölgəyə viza alan hər kəs səyahətləri turizm, biznes, ailə ziyarəti və ya digər məqsədlərlə (pul qazanmaması şərtdir) bağlı olduğu halda 90 günə qədər sərbəst hərəkət edə bilər. Viza tək və ya çox girişli ola bilər.

Bu vizanın özəl xüsusiyyəti nədir? Fransa Şengen vizası üçün iki tələbdən ən azı birinə cavab verməlisiniz. Birincisi, Şengen səyahətinizin daha çox hissəsini Fransa daxilində keçirməlisiniz. Ya da hər bir Şengen ölkəsində keçirəcəyiniz gün sayı eyni olmalıdır. Bu vəziyyətdə Fransa Şengen bölgəsinə giriş nöqtəniz olmalıdır. Çox da mürəkkəb deyil, hə?

Tez-tez səyahət edən şəxslər 5 illik Fransa Şengen vizası haqqında məlumat axtarırlar, lakin bu uzunmüddətli vizalar kateqoriyasına uyğundur. Həm də bu viza növü tamamilə fərqli bir məqalədə bəhs edilməsi gərəkəcək qədər vacib mövzudur. Bu bloq daha çox qısamüddətli Şengen vizaları ilə əlaqədardır, buna görə də viza növləri haqqında çox danışmayacam. Odur ki, keçək Fransa Şengen vizasına müraciət prosesinə.

Kimlərin Fransa Şengen vizası alması lazımdır?

flags of eu

Fransaya qısamüddətli səyahət üçün vizasız ölkələrin siyahısı olduqca uzundur. Sualı cavablandırmanın ən asan yolu budur - dünya ölkələrinin təxminən yarısı vizadan azaddır. Bu, digər yarının viza alması gərəkənlər siyahısında olduğu anlamına gəlir. Vətəndaşlığınıza əsasən vizaya ehtiyacınızın olub-olmadığını fransız və ya milli immiqrasiya xidmətləri ilə yoxlaya bilərsiniz.

Fransa Şengen vizası üçün necə müraciət etməli?

french embassy

Şengen bölgəsi üçün viza almaq prosedurları əsasən oxşardır. İlk əvvəl bir şeyi bilməlisiniz: sənədlərinizi haraya təqdim edəcəksiniz, səfirliyə yoxsa viza müraciət mərkəzinə. Bu haqda məlumatı milli miqrasiya xidmətləri və ya pickvisa.az saytında tapa bilərsiniz. Ya da yaşadığınız ölkədə fransız səfirliyinin olduğunu bilirsinizsə, onlarla birbaşa əlaqə qurmağa çalışın.

Sənədlərinizi kimin qəbul edəcəyini bildikdən sonra tələbləri gözdən keçirin. Aşağıdakı paraqraflarda bununla bağlı məlumat ala bilərsiniz. Əlavə olaraq, müraciət formasını onlayn doldura və ya daha sonra səfirliyə baş çəkərkən şəxsən edə bilərsiniz. Fransa Şengen vizası üçün lazım olan bütün sənədləri toplayın və görüş təyin edin. Bir sonrakı başlıqda görüşlə bağlı suallarınıza cavab tapacaqsınız.

Bütün suallara cavab verdikdən və sənədləri təqdim etdikdən sonra Fransa səfirliyinin tələb etdiyi rüsumu ödəməlisiniz. Artıq sərbəstsiniz. Bloqun qalan hissəsində proses müddəti ilə də bağlı məlumat alacaqsınız.

Fransa Şengen vizası müsahibəsi zamanı nə baş verir?

france schengen visa

Fransa Şengen vizası üçün müraciət etmək qərarına gəlmisinizsə, böyük ehtimalla səfirlikdə və ya konsulluqda kimsə ilə görüşəcəksiniz. Bəs müsahibədə iştirak üçün nələri bilməlisiniz? Heç bir halda gecikməyin və mümkündürsə, görüş vaxtınızdan bir qədər əvvəl orada olun. Hətta bir neçə dəqiqə gecikdiyiniz təqdirdə belə, görüşünüz ləğv ediləcək. Bir qədər rəsmi geyinin, amma özünüzü rahat hiss etdiyinizdən əmin olun. Müsahibə təxminən 10 dəqiqə davam edəcək və səfərinizlə bağlı suallar alacaqsınız. Bu hissənin açarı dürüst cavablar vermək və sakit qalmaqdır. Doğru deyirsinizsə, qorxacaq bir şeyiniz yoxdur.

Fransa Şengen vizası üçün tələblər nədir?

visa application form

Buyurun, Fransa Şengen vizasına müraciət üçün tələb olunan sənədlərin siyahısı.

Birinci növbədə doldurulmuş və imzalanmış Fransa Şengen vizası müraciət formasına ehtiyacınız var (formu onlayn doldura və daha sonra çap edə bilərsiniz). İki rəngli passport-tipli fotoşəkil, Şengendən ayrıldıqdan sonra ən azı 3 ay keçərli olacaq pasport və onun əsas səhifəsinin surətini hazırlayın. Bundan əlavə, əvvəlki bütün Şengen vizalarının surətlərinə ehtiyacınız olacaq. Səyahət marşrutunu təsdiq edən sənədlərə də ehtiyacınız olacaq, məsələn, aviabilet rezervasiyası, qonaqlama yeri bronu və ən azı 30 000 avro dəyərində səyahət sığortası. Ailə vəziyyətinizi (evlilik, uşaqlar və s.), peşəkar statusunuzu, səyahət zamanı xərclərinizi ödəyə biləcək qədər maddi imkanlarınızın (gündə ən azı 120 EUR) olduğunu sübut etməyinizi xahiş edəcəklər.

Bu, Fransa Şengen vizası tələblərinin təməl siyahısıdır, lakin səlahiyyətlilər sizdən əlavə sənədlər təqdim etməyinizi də istəyə bilərlər.

Fransa Şengen vizası rüsumu nə qədərdir?

coins

Şengen zonasına aid dövlətlər viza rüsumu da daxil olmaqla, viza detalları ilə bağlı ortaq qərara gəliblər. Bu zonaya aid olan hər hansı bir ölkədə olduğu kimi, Fransa vizası üçün də ödəməli olduğunuz standart Şengen viza rüsumu 80 avrodur. 6-12 yaşlı uşaqlar üçün bu məbləğin yarısı - 40 avro ödənilir. Eyni zamanda, bəzi ölkələrin vətəndaşları endirimdən yararlana bilərlər: Ermənistan, Azərbaycan, Gürcüstan, Ukrayna, Rusiya vətəndaşları (o cümlədən Bosniya və Herseqovina, Albaniya, Moldova, Şimali Makedoniya, Serbiya, Monteneqro vətəndaşı olan və hələ biometrik pasporta sahib olmayan şəxslər) cəmi 35 avro ödəyəcəklər.

Fransa Şengen vizasına baxılma müddəti nə qədərdir?

calendar

Proses müddəti milliyyətinizə, təqdim etdiyiniz sənədlərin keyfiyyətinə və müraciət etdiyiniz yerə görə fərqli ola bilər. Ancaq ümumiyyətlə, 3-25 təqvim günü ərzində cavab alacağınızı deyə bilərik.

Bloqumuzu sonlandırmazdan əvvəl bir-iki şey daha qeyd etmək istəyirəm. Planlaşdırma sizə çox kömək edəcək, buna görə Fransa Şengen vizasına müraciət zamanı sizdən istənə biləcək hər şeyə qarşı hazırlıqlı olun. Səyahətinizi də planlaşdırın, çünki bu onlara niyyətinizin nə olduğunu göstərəcək. Bilin ki, səlahiyyətlilər bu tələblərlə sadəcə söylədiyiniz səbəblərdən müraciət etdiyinizə əmin olmaq istəyirlər. İlk başdan onlara lazım olan bütün məlumatları verin və bununıa istədiyiniz sənədi daha asan və tez əldə edəcəksiniz.

Belə. Ümid edirəm ən vacib Fransa Şengen vizası tələblərini və bütün bu sənədlərin necə təqdim ediləcəyini başa düşdünüz. Mən bu bloqu bu məqsədlə yazmışdım və düşünürəm ki, tez müddətdə öz müraciətiniz üçün baş vuracaqsınız! Bundan əlavə, sizə bu kiçik və böyük zövqlər ölkəsinə inanılmaz bir səyahət arzulayıram. Bon voyage, dostum!

* Ən sonda qeyd etmək istəyirəm ki, koronavirus təhlükəsizlik tədbirləri səbəbi ilə beynəlxalq səyahətlərin hələ də məhdud olduğunu nəzərə alın. Hər hansı bir ölkəyə səyahət planları qurmazdan əvvəl yerli qayda və məhdudiyyətləri yoxlayın. Qonaqlama yeri bron edərkən ləğv etdiyiniz təqdirdə pulunuzu geri ala biləcəyiniz seçimlər edin. Əlavə olaraq, səyahət məhdudiyyətləri səbəbindən viza müraciət prosedurlarının bir qədər fərqlənə biləcəyini və bu məqalədəki bütün məlumatların standart prosedurlara əsasən yazıldığını vurğulamaq istəyirəm. Buna görə də planlaşdırmağa başlamazdan əvvəl etibarlı mənbələri gözdən keçirməyi və ya rəsmilərlə əlaqə qurmağı yaddan çıxarmayın.

Paylaş

Ieva Miltina
Ieva Miltina Fəal və təşəbbüskar

Ieva Miltina aktivist və bir neçə sahədə təşəbbüskardır. Peşəsi marketinq və mədəniyyət tədbirlərinin layihə müdiri olsa da, o, ürəyində coşğun bir səyyah və aşpazdır, tezliklə isə konditer olacaq. İeva qeyri-formal təhsildə kök salmış, gənclərlə işə yeniyetməlik illərindən başlamışdır. O, yenilikçi yanaşmalara dərin maraq göstərir. Həmişə yeni kəşflər və sərgüzəştlər axtaran İeva dünyaya müsbət baxışını və bitməyən hekayələrini onunla yolu kəsişən insanlarla məmnuniyyətlə bölüşür. Qonaqpərvərlik və turizm menecmenti üzrə təhsilini alarkən ev aşpazları ilə bağlı yazdığı tezis, onun rahat və ürəkaçan ev restoranına sahib olmaq xəyalını alovlandırdı. Hal-hazırda məqalələr yazmaq və qida fotoqrafiyası etməklə yanaşı, başqa bir xəyalını reallaşdırmaq - yazıçı olmaq üçün çalışır.

Bütün bloqlar
pickvisa.az