Tourist visiting landmark Eiffel Tower in Paris

Fransa ziyarətçi vizası üçün necə müraciət etmək olar?

Kənan İsazadə Kənan İsazadə 18 iyul 2021
7 baxış 6 dəq. oxu

246 növ pendirə sahib ölkəni ziyarət etməyi kim rədd edə bilər? Əlbəttə, Fransanı səyahət etməyə dəyər edən tək şey pendir deyil. Fransa ləzzətli mətbəx, sənət və romantika ölkəsidir. Ölkənin füsunkar şəhərləri hər il milyonlarla insanı cəlb edir. Dünyanın ən çox ziyarət edilən ölkəsi olmaq Fransa üçün qeyri-adi bir şey deyil. Hər il 89 milyondan çox insan füsunkar şərabların dadına baxmaq və bu ecazkar diyarın bütün gözəlliklərindən zövq almaq üçün Fransaya səyahət edir. Əminik ki, oxucularımızın çoxunun da Fransanı ziyarət etmək istəyi var. Elə isə buyurun, Fransa ziyarətçi vizası haqqında bloq. Bu bloqda bu suallara cavab alacaqsınız: Ziyarətçi vizası ilə Fransada nə qədər qalmaq olar? Bu viza üçün tələblər nədir? Fransa ziyarətçi vizası üçün rüsum nə qədərdir? Fransa ziyarətçi vizasına baxılma müddəti nə qədər davam edir?

Fransa viza siyasəti

statue

Daha konkret məqamlardan danışmağa başlamazdan əvvəl, Fransa viza siyasəti haqqında bir qədər ümumi məlumat alaq. Fransanı ziyarət etmək üçün vizaya ehtiyacım var? Digər ölkələrdə olduğu kimi, vizasız ölkələrdən deyilsinizsə, bu səyahətinizi həyata keçirmək üçün viza almalısınız. Ziyarətin məqsədindən və planlaşdırılan qalma vaxtından asılı olaraq müxtəlif vizalar üçün müraciət edə bilərsiniz. Ümumiyyətlə, onları üç kateqoriyaya bölmək olar:

• Şengen vizası – qısamüddətli viza

• Tranzit viza

• Milli viza – uzunmüddətli viza

Ölkəyə qısamüddətli səfər planlayan hər kəs Fransa Şengen vizası üçün müraciət edə bilər. Bildiyiniz kimi, Fransa Şengen ölkəsidir. Fransaya səyahət etmək üçün müxtəlif səbəblər ola bilər: turizm, biznes, ailəni və ya dostları ziyarət, qısamüddətli təhsil, mübadilə proqramları və s.

Digər tərəfdən, Fransada 90 gündən çox qalmaq istəyən şəxslər milli viza almalıdırlar. Uzunmüddətli iş və təhsil planları bu viza kateqoriyasına müraciət üçün səbəb ola bilər.

Ziyarətçi vizası üçün necə müraciət etmək olar?

filling france visitor visa

Müraciət proseduru uzun və bəzən zəhlətökəndir. Ancaq uğurlu nəticə almaq istəyirsinizsə, bütün addımları izləməli və tələblərə uyğun olmalısınız. Aşağıdakı beş addımı təqib etməlii olacaqsınız:

• Lazımi sənədləri toplayın

• Onlayn müraciət formasını doldurun

• Randevu alın

• Sənədlərinizi təqdim edin və tələb olunan rüsumu ödəyin

• Proses müddətini gözləyin

Fransa ziyarətçi vizası

woman visiting cathedral

Bildiyiniz kimi, yalnız vizasız ölkələrin vətəndaşları Fransaya vizasız səyahət edə bilər. Bütün digər turistlər viza almalıdırlar. Ziyarətçi vizası ilə Fransada nə qədər qalmaq mümkündür? Ziyarətçi vizası sizə hər 180 gündə ən çoxu 90 gün Fransada qalma şansı verəcəkdir. Bəs bu viza ilə digər Şengen ölkələrinə səyahət edə bilərəm? Vizanız xüsusi olaraq Fransa ilə məhdudlaşmırsa, digər Şengen ölkələrinə səyahət edə bilərsiniz. Hansı ölkələr vizadan azaddır? Fransa vizasız ölkələr siyahısında 93 ölkə var. Siyahı çox uzun olduğundan burada bütün ölkələrin adını çəkmək qeyri-mümkündür (tam siyahı üçün veb saytımızdakı viza siyasəti bölməsinə baxa bilərsiniz). Bu ölkələrdən bəziləri:

• Antiqua və Barbuda

• Bosniya və Herseqovina

• Bruney Darüssalam

• Çexiya

• Salvador

• Honkonq

• Marşall adaları

• Yeni Zelandiya

• Şimali Makedoniya

• Sent-Kits və Nevis

• Sent-Lüsiya

• San Marino

• Solomon adaları

• Cənubi Koreya

• Sent-Vinsent və Qrenadin

• Şərqi Timor

• Trinidad və Tobaqo

• Birləşmiş Ərəb Əmirlikləri

• Birləşmiş Krallıq

• Amerika Birləşmiş Ştatları

Fransa ziyarətçi vizası tələblər

france visitor visa

Tələb olunan sənədlərin toplanması viza müraciəti müddətinin ən vacib hissələrindən biridir. Bu hissədəki kiçik səhvlər böyük problemlərə səbəb ola bilər. Hətta müraciətin sonu imtina ilə bitə bilər. Bu cür halların qarşısını almaq üçün bütün müraciətçilər son dərəcə diqqətli olmalıdırlar. İndi isə təqdim etməniz gərəkən sənədlər ilə tanış olaq.

• Müraciət forması. Formanı elektron şəkildə doldurmaq və daha sonra çap etmək kimi şansınız var. Forma tamamilə doldurulmalı, tarixlənməli və imzalanmalıdır.

• İki şəkil. Şəkillər son altı ay ərzində çəkilmiş olmalıdır. Digər tələblər: 3,5x4,5 ölçülü, ağ fonda, rəngli, üzün ön hissəsi şəklin 70-80%-ni örtməlidir. Bundan əlavə, arxa planla eyni rəngdə geyinməməyə çalışın.

• Pasport. Pasport qayıdış tarixindən sonra ən azı üç ay müddətində qüvvədə olmalıdır və minimum iki boş səhifəyə sahib olmalıdır.

• Çap sənədləri. Pasportun əsas səhifəsinin və əvvəlki Şengen vizalarının surətlərini təqdim etməlisiniz.

• Şəxsiyyət vəsiqəsinin surəti. Sənədin etibarlılıq müddəti Fransaya səyahət tarixindən sonra üç ay müddətində olmalıdır.

• Yaşayış icazəsi/vizasının surəti. Şəxsiyyət vəsiqəsindəki kimi, etibarlılıq müddəti Fransaya səyahət tarixinizdən sonra ən azı üç ay olmalıdır (ərizəçinin yaşadığı ölkə və vətəndaşlığı fərqlidirsə).

• Səyahət sığortası. Minimum 30.000 avro dəyərindəki xərcləri əhatə etməli və bütün qalma müddəti ərzində (bütün Şengen ölkələri üçün) etibarlı olmalıdır.

• Uçuş bileti rezervasiyası. Şengen ərazisinə giriş tarixini və oradan ayrılma tarixini dəqiq göstərməlidir.

• Qonaqlama yeri barədə sənəd. Fransada qalmağı planladığınız yerlə bağlı bütün məlumatları əks etdirməlidir.

• Ailə vəziyyətinin sübutu. Nikah haqqında şəhadətnamə, uşaqların doğum şəhadətnaməsi, həyat yoldaşının ölüm şəhadətnaməsi və s. təqdim edilə bilər.

• Yaşayış xərclərinin ödənəcəyinin sübutu. Səfər zamanı bütün xərclərinizi ödəyə bilmək üçün kifayət qədər pulunuz olmalıdır. Fransada keçirəcəyiniz hər gün üçün 120 avroya ehtiyacınız olacaq. Qonaqlama yerini əvvəlcədən bron etmisinizsə, bu məbləğ 65 avroya enir.

• Peşəkar statusun sübutu. Əmək müqaviləsi, iş yerindən arayış, şirkətlər reyestrindən çıxarış, universitetdən məktub buna misal ola bilər.

• Yetkinlik yaşına çatmayanlar üçün əlavə sənədlər. Uşaqlarla səyahət edirsinizsə, uşaqlarla əlaqəli bəzi sənədlər təqdim etməlisiniz.

Fransa ziyarətçi vizası rüsumu

euro

Əsas sənədləri təqdim etdikdən sonra viza rüsumunu ödəməlisiniz. Tələb olunan məbləğ nə qədərdir? Şengen vizaları üçün rüsum 02 Fevral 2020-ci ildən bəri 80 avrodur. Müraciətçilər vətəndaşlıqlarına və sənədlərin təqdim edildiyi yerə görə viza müraciət mərkəzi haqqı, kuryer xidməti haqqı və s. kimi digər əlavə rüsumlar da ödəməli ola bilərlər. Ödəniş hər kəs üçün eynidirmi? Xeyr, bəzi millətlərə endirimlər təklif olunur. AB ilə aşağıda göstərilən ölkələr arasındakı razılaşmaya əsasən, onların vətəndaşları viza üçün 35 avro ödəyəcəklər:

• Albaniya

• Ermənistan

• Azərbaycan

• Bosniya və Herseqovina

• Gürcüstan

• Kosovo

• Şimali Makedoniya

• Moldova

• Çernoqoriya

• Rusiya

• Serbiya

• Ukrayna

Xüsusi hallar

Bəzi insanlar viza haqqından tamamilə azaddırlar. Bu yalnız Fransa üçün deyil, eyni zamanda bütün Şengen bölgəsi üçün də keçərlidir.

• Altı yaşdan kiçik uşaqlar

• Fransa vətəndaşlarının həyat yoldaşları, eyni cinsli ortaqları və partnyorları, yetkinlik yaşına çatmayan uşaqları

• Yetkinlik yaşına çatmayan Fransa vətəndaşlarının valideynləri

• AB/AİB vətəndaşlarının ailə üzvləri

• Təhsil və ya təlim məqsədi ilə səyahət edən məktəb şagirdləri, magistrantlar, aspirantlar və müşayiətçi müəllim heyəti

• Qeyri-kommersiya təşkilatlarının təşkil etdiyi seminar, konfrans, idman, mədəni və ya təhsil tədbirlərinə qatılan qeyri-kommersiya təşkilatlarının nümayəndələri (25 yaş və daha az)

• Elmi tədqiqat üçün Avropa Birliyi daxilində səyahət edən üçüncü ölkə vətəndaşı tədqiqatçılar

Fransa ziyarətçi vizasına baxılma müddəti

wall clocks

Tələb olunan bütün sənədləri, məlumatları təqdim etdikdən və rüsumu ödədikdən sonra proses müddətini gözləməli olacaqsınız. Düşünürəm ki, sizdə belə bir sual yarandı: neçə gün gözləməli olacağam? Adətən, bu növ viza üçün proses müddəti 3-25 təqvim günüdür. Ancaq bu, viza müraciətinizi etdiyiniz ölkədən asılı olaraq dəyişə bilər.

Fransa vizası üçün harada müraciət edə bilərəm?

french embassy

Müraciətçi şəxslər viza müraciətlərini yaşadıqları ölkədəki viza müraciətlərini qəbul edən viza müraciət mərkəzlərində, səfirliklərdə və ya konsulluqlarda həyata keçirə bilərlər. Bunlardan heç biri ölkənizdə yoxdursa, yaşadığınız ölkəyə ən yaxın səfirliyə və ya konsulluğa müraciət etməlisiniz.

Ümid edirəm bu bloqda oxuduğunuz məlumatlar müraciət müddətində faydalı olacaqdır. Qaydalara əməl edin və bütün tələblərə uyğun olmağa çalışın. Uğur sizinlə olsun!

Paylaş

Kənan İsazadə

Kənan İsazadə Bakıda anadan olub və böyüyüb, amma hazırda Enerji üzrə magistr təhsili ilə bağlı Türkiyədədir. Kənan səyahəti və müxtəlif mədəniyyətlərdən, irqlərdən və inanclardan olan insanlarla tanış olmağı sevir. O, 10-dan çox şəhərə səyahət edib və bunların əksəriyyətini Türkiyədəki şəhərlər təşkil edir. Kənanın şüarı: yeni dillər öyrənmək, dünyanı gəzmək, mümkün qədər çox kitab oxumaq və başqalarını başa düşmək üçün özünü kiminsə yerinə qoymağı heç vaxt unutmamaq.

Bütün bloqlar
pickvisa.az