Hamburq və turistik yerləri

Hamburq, əla turistik məkanları ilə Avropanın ən gözəl və məşhur şəhərlərindən biridir. Hamburq haradadır? Hamburq Almaniyanın ikinci ən böyük şəhəridir və ölkənin şimalında Elba çayı sahillərində yerləşir. Hamburqda nə etməli? Mülayim hava şəraiti Hamburqun turistik yerlərini ziyarət etməyinizə imkan yaradacaqdır. Bəs bu yerlər hansılardır? Hamburqda nələri görmək mütləqdir? Gəlin, bir yerdə Hamburqa səyahət edək və bu yerləri tanıyaq.

Reeperbahn

Hamburqdakı ən maraqlı turistik yerlərdən biri, St. Pauli bölgəsindəki Reeperbahndır. Reeperbahn və Grosse Freiheit ətrafında çoxlu barlar, klublar, publar, teatrlar, diskotekalar və s. var. Əbəs yerə "Almaniyanın ən günahkar məhəlləsi" adını daşımır. "Kiez" əvvəllər kriminallar ilə tanınsa da, hazırki vaxtda gün ərzində təəccüblü dərəcədə sakit və rahat görünən əyləncə küçəsidir. Kafelərdən birində oturub, Reeperbahnın gecəyə necə hazırlaşdığını seyr edə bilərsiniz. Reeperbahn ətrafındakı ən məşhur müəssisələriarasında "Zur Ritze" (boks, boks rinqi belə var), "Safari", "Dollhouse", "Molotow" və "Susis Show Bar” yer alır. Schmidts Tivoli və Operettenhaus kimi məşhur teatrlar da burada yerləşir. Məsələn, Operettenhaus-da "Pişiklər", "Mamma Mia!" , "Mən heç Nyu-Yorkda olmamışam" kimi müzikllar nümayiş etdirilir. Almaniyanın ən məşhur polis bölməsi olan Davidwache də Reeperbahnda yerləşir. 1960-cı illərdə musiqi tarixi Grosse Freiheit-də yazılırdı. The Beatles Almaniyada ilk dəfə məhz burada səhnə almışdı və onların əziz xatirəsinə ithaf edilmiş Beatles meydanı Almaniyada ən sevilən yerlərdəndir.

Schanzenviertel və Karolinenviertel Məhəllələri

Reeperbahndan başqa Schanzenviertel də Hamburqun gənclər üçün olan turistik yerlərindən biridir. Ancaq Reeperbahndan fərqli olaraq bura o qədər izdihamlı deyil və daha trendə uyğundur. Mərkəzi bu gün əsasən siyasi və mədəni tədbirlərə ev sahibliyi edən müxalifətçi keçmiş Rote Flora teatrıdır. İstirahət etmək istəyirsinizsə, yaxınlıqdakı Schanzenpark-da rahatlıq tapacaqsınız. Burada xüsusilə uşaqlar üçün geniş bir oyun meydançası var. Schanzenviertel-dən rahat bir şəkildə Karoviertel-ə getmək mümkündür. Keçmişdə "kasıb insanlar məhəlləsi" sayılan Karolinenviertel, son illərdə çox sayda kafe, butik, restoran və mağazalara sahib müasir məhəlləyə çevrilib. Gentrifikasiya hələ yüksək dərəcəyə çatmayıb, odur ki, hamburqlularla tanış ola bilərsiniz. Hamburqda, xüsusən də yayda nə edəcəyinizi bilmirsinizsə, burada gəzə, alış-veriş edə, qəhvə içə və Hamburqdakı həyat tərzini seyr edə bilərsiniz.

St. Pauli Piers

Hamburqa səyahətinizdə ilk nəzərinizə çarpacaq şey, böyük terminal binası - St. Pauli Piers olacaq. Heyranedici günbəzləri və qüllələri olan 205 metr uzunluğundakı salon 1907-1909-cu illər arasında inşa edilmiş və 2003-cü ildə tarixi abidələr siyahısına salınmışdır. St. Pauli Piers, gəmilər üçün stansiya və sahilə çıxma zolağı, eyni zamanda isə, sizi liman turuna çıxaracaq bir çox gəmi və qayıq üçün başlanğıc nöqtəsidir. HVV-nin gəmiləri Hamburqun qonaqlarını Elba çayının digər sahilinə, "Kral Şir" kimi musiqili əsərlərin sərgiləndiyi "Theater im Hafen"-ə gətirirlər. Landungsbrücken 1911-ci ildən bəri xidmət göstərən Köhnə Elba Tuneli ilə də məşhurdur.

Speicherstadt

Hamburqun anbar bölgəsi olan Speicherstadt, Almaniyadakı 40-cı “Ümumdünya mədəni irsi yeri” və haqlı olaraq Hamburqun ən çox ziyarət edilən yerlərindən biridir. 26 hektardan çox əraziyə sahib Hamburq anbar bölgəsi dünyanın ən böyük bitişik anbar kompleksidir. 1883-1927-ci illər arasında Elba sularında minlərlə palıd dirək üzərində tikilmiş yer adından da göründüyü kimi, əvvəllər xaricdən gələn ədviyyat, qəhvə, kakao, çay və digər şeylər üçün anbar və ya mağaza kimi istifadə olunurdu. Hamburqun ən məşhur turistik yerlərindən biri kimi Speicherstadt-a günümüzdə müxtəlif ekskursiyalar təşkil edilir.

Miniatur Wunderland

1:87 miqyaslı dünya ilə Speicherstadt-da yerləşən Miniatur Wunderland, böyük ehtimal ki, Hamburqun ən məşhur turistik yeridir. Təxminən 1500 kvadrat metrlik model sahə, 263.000 fiqur, 9250 maşın, 1.040 qatar, 389.000 LED, 4.340 bina və ümumilikdə 795.000 saatlıq inşaat müddəti ilə bura, Hamburqa səyahət üçün ən əsas səbəblərdəndir. Mini-dünya 2000-ci ildən bəri durmadan böyüyür. Mini-Hamburq və xəyali məkan "Knuffingen"-ə əlavə olaraq, Wunderland hazırda Mərkəzi Almaniya, Avstriya, İsveçrə, Skandinaviya, ABŞ və İtaliya miniatürlərinə ev sahibliyi edir.

Hamburger Fischmarkt

Qışqıran satıcılar, şübhəsiz ki, Hamburq balıq bazarının vurğusudur. Onlar meyvə, tərəvəz, çiçək və ya suvenir əşyalar arasında yüksək səslə alıcılar üçün yarışırlar. Balıq bazarı həm gündüz, həm də gecə gəzintiləri üçün ideal bir yerdir. Burada təzə meyvə, tərəvəz, pendir, sosiska, çörək və əlbəttə ki, balıq tapa bilərsiniz. Balıq bazarı hamburqlular üçün bazar günlərində qəhvə və “fish roll” müşayiətində söhbət və daha sonra həftəlik alış-veriş etmək üçün görüşmə nöqtəsidir.

Jungfernstieg

Hər şeydən əvvəl qeyd etmək lazımdır ki, Jungfernstieg Hamburqun ən gözəl və ən qədim küçəsidir. Binnenalster-də yerləşən bu yerdə müstəsna bir atmosferdə alış-veriş edə, gəzə və ya bir qəhvə içərək Alsteri seyr edə bilərsiniz. Alsterhaus, Jungfernstieg-də yerləşən, 1912-ci ildə açılan dəbdəbəli univermaqdır və Berlindəki KaDeWe ilə asanlıqla rəqabət edə bilər. NIVEA Haus isə sizi rahatlamağa dəvət edir. Ən qədim alış-veriş pasajı - Hamburger Hof da Jungfernstieg-də yerləşir. Qütb ayıları, köpək balıqları və pinqvinlər də müəssisənin dərin hovuzlarında özlərini evdəki kimi hiss edirlər. İstəsəniz zürafələri və filləri bəsləyə bilər və ya heyvanların bəslənməsini seyr edə bilərsiniz.

Tierpark Hagenbeck

Hagenbeck zooparkı 100 ildən çoxdur ki, öz varlığını davam etdirir. Almaniyadakı ən qədim zooparklardan biri olan Hagenbeck, ilk qəfəssiz heyvanat bağçasıdır. Müxtəlif qitələrdən gətirilən 200-dən çox növün 1800-dən çox nümayəndəsi 19 hektarlıq bu ərazidə yaşayır. Avropanın ən böyük fil sürülərindən biri, 2017-ci ildə doğulan pələng balaları, oranqutanlar, və sərbəst şəkildə ətrafda dolaşan həlqə quyruqlu lemurlar Hagenbeck zooparkını Hamburqun ən yaxşı turistik mərkəzlərindən birinə çevirir.

Ohlsdorf Qəbiristanlığı

Hamburqun şimalındakı, Ohlsdorf qəbiristanlığında dünyanın ən böyük park-qəbiristanlığı var. Turistlərə səfər üçün qəbiristanlığı tövsiyə etmək əvvəlcə qəribə və qorxulu görünsə də, bunun bir səbəbi var: Ohlsdorfer Friedhof dünyanın ən böyük park qəbiristanlığıdır və onu rahatlıqla Parisdəki Per-Laşez kimi dünyaca məşhur qəbiristanlıqlarla müqayisədən çəkinmək lazım deyil. 1877-ci ildə açılan, 1.4 milyon insanın dəfn olunduğu, ümumi sahəsi 389 hektar olan Ohlsdorf Hamburqun görməli yerləri arasındadır. Buradakı park 30.000 ağacı, qızılgül bağı, gölməçələri, 800-dən çox heykəli və xüsusi bağ memarlığı ilə ziyarəti haqq edir.