İndoneziyada Bali xaricindəki 5 möhtəşəm yer

Əhali sayına görə Cənub-Şərqi Asiyada birinci və dünyanda dördüncü olan İndoneziya, dünyanın ən böyük ada dövlətidir və 17508 adadan ibarətdir. Ancaq araşdırmalar nəticəsində bu adalardan yalnız 13.466-sı tapılmışdır. 

İndoneziyada həm çağdaş şəhərləri və adaları, həm də texnologiyadan uzaq yaşayan tayfaları görə bilərsiniz. Dünyadakı 100-dən çox qəbilədən 44-ü İndoneziyada yaşayır və onlardan bəzilərini Sumatra meşələrinin qərb hissəsində görə bilərsiniz.

Bu gün kim İndoneziyaya səyahət etməyi qərara alırsa, şübhəsiz ki, ağlına ilk olaraq bal ayının cənnəti olan Bali adası gəlir. Hətta deyərdim ki, İndoneziya haqqında danışarkən çoxluğun ağlına gələn yeganə yer Balidir. Bu səbəbdən bugün sizə İndoneziyada Bali xaricindəki 5 möhtəşəm yer barəsində məlumat verəcəm.

5. Vakatobi adaları

Vakatobi adaları toxunulmamış təbii gözəlliyə malik xəzinə sandığıdır. İndoneziyanın ən böyük rifi (Böyük Sədd rifindən sonra dünyada ikinci ən böyük rif) olan Vakatobi, bir çox mərcan və dəniz canlılarına ev sahibliyi edir. Dünyadakı 850 mərcan rifindən 750-si burada tapılır. Wakatobi Milli Parkı adaların bütün ərazisini qoruyur. Əgər siz də təbiətin bu ecazkarlıqlarına yaxından baxmaq istəyirsinizsə, İndoneziyaya səyahət edərkən bu adaları mütləq ziyarət etməlisiniz.

4. Rinjani dağı

Rinjani dağı İndoneziyada fəaliyyət göstərən 129 aktiv vulkandan biridir. 3.726 metr hündürlükdə olan bu dağdan İndoneziyanın ən gözəl mənzərələrindən birini seyr edə bilərsiniz. Dağda yerləşən, hindular və müsəlmanlar tərəfindən müqəddəs hesab olunan Segara Anak krater gölü İndoneziya hinduları üçün ən məşhur məbədlərdən biridir. Yarı aktiv vulkandan yüksələn sis, krater gölü, geotermal bulaqlar, görkəmli şəfəq və qürub mənzərələri və daha nələr nələr…Sadalananların hər birini görmək üçün səyahət edəcəyiniz məkan artıq sizə məlumdur.

3. Toba gölü, Sumatra

Möhtəşəm təbiəti və etnik zənginliyi ilə tanınan Sumatra, İndoneziyada Papua və Borneodan sonra üçüncü ən böyük adadır. Qərbdəki və şimaldakı sahillərdən adanın dərinliklərinə doğru getsəniz, Sumatranın gizli xəzinələrini kəşf edə bilərsiniz. Bunlardan ən məşhurları, dünyanın ən böyük kalder gölü - Toba və 200 il əvvələ qədər hannibal olan Batak qəbiləsidir.

Toba gölü yetmiş dörd min il əvvəl, Hindistan və Pakistanı 1,5 metr küllə örtmüş vulkan püskürməsinin nəticəsi olaraq əmələ gəlib. İnsanlar bu yeri İsveçrədəki Samosir adasına bənzəməsi səbəbilə, mini İsveçrə adlandırırlar. İndoneziyaya səyahət zamanı bu əfsanəvi gölü görmədən qayıtmaq günah olar.

2. Cokyakarta

500.000-ə yaxın əhalisi olan Cokyakarta Yava adasının ən populyar turizm mərkəzidir. Dünyanın ən məşhur məbədlərindən biri olan Borobudurun yerləşdiyi Cokyakarta şəhəri inkişaf edərək sənət, əyləncə və təhsil mərkəzinə çevrilmişdir.

İllərlə bir çox krallığın mərkəzi olan şəhər öz tarixi və məbədləri ilə İndoneziyanın ayrılmaz bir hissəsidir. Bölgədə yerləşən Kalibiru Milli Parkı təbiətsevərlər üçün cənnətdir. Əgər siz İndoneziya mədəniyyətini, incəsənətini, tarixini və mətbəxini kəşf etmək istəyirsinizsə, Cokyakartaya səyahət etməkdən daha yaxşı bir şey edə bilməzsiniz. Ancaq bununla yanaşı, şəhərin Yavadakı seysmik olaraq aktiv bölgələrindən biri olduğunu qeyd etməliyəm. 2006-cı ildə burada baş verən zəlzələ və vulkan püskürməsi nəticəsində 300.000 ev dağıldı, 2010-cu ildə isə Merapi dağından axan lava ətraf kəndləri tamamilə məhv etdi.

1. Flores

Flores İndoneziyaya səyahət zamanı ziyarət ediləcək ən yaxşı yerdir. Sumbavanın şərqində və Lembatanın qərbində yerləşən ada qərbdən şərqə doğru 425 km uzanır. Sahildəki tropik meşələr, çimərlikdən qısa bir məsafədəki savannalar və adanın içərisindəki dağlıq ərazilər sizi bu sirli təbiəti kəşf etməyə təşviq edəcəkdir. Adadakı Kelimutu vulkanı mütləq görülməsi gərəkən yerlərdəndir və dağın içindəki vulkanik qazların təsiri altında suyun oksidləşmə səviyyəsindəki dəyişikliklərə görə fərqli rəngdə olan 3 gölü ilə məşhurdur. Mavi, qırmızı və yaşıl rəngli bu göllərə yürüş edə, hətta krater yaxınlığında kampinq edə bilərsiniz. Əgər siz Floresdə günəşin doğuşunu izləsəniz, bu mənzərəni ömrünüz boyunca xatırlayacaqsınız.