Ən yaxşı kampinq təcrübəsi təklif edən 10 ölkə

Bəzən özümüzə gəlmək üçün sıx və səs-küylü şəhər həyatından uzaqlaşmalıyıq və bunun ən yaxşı yollarından biri kampinqdir. Dünyada çoxlu valehedici kampinq sahəsi var, lakin bu gün ən yaxşı kampinq təcrübəsi təklif edən ölkələrdən bəhs edəcəyik. Həmçinin kampinq təcrübənizi daha da mükəmməl edəcək bəzi məlumatlar da qeyd edəcəyik.

1. Yeni Zelandiya

Yeni Zelandiyanın sıra dağları, valehedici təbiəti, meşələri, çimərlikləri ildə 3,8 milyondan çox səyahətçi cəlb edir. Bununla yanaşı, Yeni Zelandiya kampinq üçün də ən yaxşı ölkələrdən biridir. Unudulmaz kampinq təcrübəsi təklif edən yerlərdən bəziləri: Makorori Beach, Mount Maunganui, Pouakai Hut, Lake Pukaki Reserve, Mueller Hut, Moke Lake Campground və s. Hansı ölkələr vəhşi təbiətdə kampinqə icazə verir? Yəqin ki, bu, ən sıx-sıx verilən suallardandır. Sizin üçün əla xəbərimiz var: Yeni Zelandiya! Avtomobiliniz varsa, Makorori Beach-də düşərgə qura bilərsiniz (çadırlara icazə verilmir), lakin hər yerdə deyil, yalnız Makorori avtomobil parkında (Makorori Carpark). Yeni Zelandiyada harada lüks düşərgə təcrübəsi yaşamaq olar? Lüksü sevənlərdənsinizsə, Zen Relax Tent, Rivers Edge Glamping, Yurtopia Luxury Glamping və başqaları sizin yolunuzu gözləyir.

2. Yaponiya

İllik 32 milyon ziyarətçisi olan Yaponiya Asiyada və dünyada ən çox ziyarət edilən ölkələrdən biridir. Maraqlı mədəniyyəti və ləzzətli mətbəxi ilə yanaşı, Yaponiya kamp qurmaq üçün də ən yaxşı ölkələrdən biridir. Yaponiyada çay kənarında, çimərliklərdə, parklarda və daha bir çox müxtəlif yerlərdə düşərgə qurma şansınız olacaq. Ölkədə kampinqə icazə verilməyən yerlərdə qadağa işarələri qoyulub. Ayrıca, təbiəti qorumaq, heç kimi narahat etməmək və s. kimi ümumi qaydalara da riayət etməlisiniz. Təklif etdiyimiz kampinq sahələrindən bəziləri: Konashidaira Camping Retreat, Shinbashi Sandaru-Koen Campsite, Shiretoko National Camp Ground, Omaki-Yama Campsite, Yagaji Beach Campsite, Higashi Onuma Campsite.

3. Çili

Çili sahib olduğu zəngin təbiəti və landşaftı ilə misilsiz kampinq imkanları təklif edir. Çilinin siyahımızda olmasına səbəb olan bəzi həyəcan verici faktlar: dünyanın ən uzun sahillərindən biri, çoxlu aktiv vulkanlar, gözəl çimərliklər və s. Ancaq təəssüf ki, Çili kamp qurmanın hər yerdə qanuni olduğu ölkələrdən biri deyil və düşərgə sahələri bir çox ölkədən qat-qat bahadır. Kampinq həvəskarları üçün valehedici mənzərələr təklif edən yerlər: Pan de Azucar, La Campana Milli Parkı. Şübhəsiz ki, vəhşi təbiətdə düşərgə qurmaq hər kəs üçün cəlbedici deyil. Bu insanlardan birisinizsə, Yellow Plum Tent House, Camping y Hostal Tipanie Moana, Domos by Toore Patagonia, Camping El Huerto kimi ödənişli kamp yerlərini seçə bilərsiniz.

4. Finlandiya

Finlandiya da sizin üçün misilsiz kampinq yerləri təqdim edir. Ölkədəki düşərgələrinin əksəriyyəti su hövzələrinin kənarında və ya meşələrin yaxınlığındadır, beləliklə hipnoz edici gözəlliyə hazır olun. Bildiyiniz kimi, dünyanın əksər yerlərində vəhşi təbiətdə kamp qurmaq qadağandır, lakin Finlandiya yox. Rəsmi olaraq Finlandiyanın əksər bölgələrində düşərgə qurmaqda sərbəstsiniz. Ancaq bəzi qaydaları unutmayın: 1) Bir yerdə bir və ya bir neçə gün qalın. 2) Rusiya-Finlandiya sərhədində düşərgə etmək qadağandır. 3) Şəxsi bağlarda, bəzi milli qoruqlarda və hərbi ərazilərdə düşərgəyə icazə verilmir. 4) Tonqal qalamaq yalnız şəxsi ərazilərdə mümkündür (torpaq sahibinin icazəsi varsa). Lüks kampinq təcrübəsi üçün isə Teno çayı, Iso-Syöte Resort, Vuoksen Kalastuspuisto Imatra və s. kimi yerlər qeyd edə bilərik. Ödənişli düşərgə yerlərində qiymətlər əsasən adambaşına 20 avrodan başlayır.

5. Gürcüstan

Gürcüstan kiçik bir ölkədir, lakin düşərgə salmaq üçün çox uyğundur. Burada dağda, çimərlikdə, körpünün altında, çayın yanında və daha bir çox yerdə düşərgə qura bilərsiniz. Gözəl təbiət, bənzərsiz mədəniyyət və kəşf olunması gərəkən daha bir çox şey Gürcüstanı kampinq üçün ən yaxşı ölkələrdən birinə çevirən əsas xüsusiyyətlərdir. Gürcüstanda ən yaxşı düşərgə təcrübələrini harada əldə edə bilərəm? Bu tamamilə nə istədiyinizdən və tətil planlarınızdan asılıdır. Sırf özünüz kampinq etmək istəyirsinizsə, Gürcüstanın təklif etdiyi ən cazibədar yerlərdən bəziləri: Stepantsminda, Paravani gölü, Tobavarchkhili gölləri, Bochorna və s. Pullu kampinq yerlərinə isə Zeta Campinq, Dingo Camping Kutaisi və s. misal göstərə bilərik.

6. İsveç

İsveç kampinqin hər yerdə qanuni olduğu nadir ölkələrdən biridir. Bir çoxları kimi oteldə və ya hosteldə qalma planı qura bilərsiniz, ancaq pulsuz qonaqlama mümkündürsə, niyə ödəmə edəsiniz? İsveçi kampinq məqsədli səyahətlər üçün ən yaxşı ölkələrdən birinə çevrirən əsas səbəblərdən biri də düşərgə yerlərinin geniş çeşididir. Meşədə, çay kənarında, dağda və daha bir çox yerdə kamp qurmaq mümkündür. Yerlər pulsuz olsa da, bəzi qaydalara riayət etməlisiniz. 1) Vəhşi təbiətə hörmət edin. 2) Meşədə tonqal qalamayın. 3) Nişanlara diqqət yetirin, çünki bütün ərazilərə maşınla girmək mümkün deyil. 4) Bir yerdə uzun müddət düşərgə qurmaq istəyirsinizsə, evlərə uzaq ərazi seçin. Göllərdə üzə və ya qayıqla kəşfə çıxa bilərəm? Əsasən bəli, amma yenə də həmin yerdəki nişanlara diqqət edin. Misilsiz kampinq təcrübələri üçün məsləhət gördüyümüz yerlər: Skuleskogen Milli Parkı, Upplandsleden, Fulufjallet, Gotland və s.

7. Hindistan

Hindistan cəngəlliklərdə düşərgə salmaq üçün ən yaxşı ölkələrdən biridir. Təəssüf ki, bir neçə il əvvəl Hindistan hökuməti təbiəti qorumaq məqsədi ilə sərbəst düşərgə ərazilərini məhdudlaşdırdı. Bu ərazilərin əksəriyyəti meşələr, çimərliklər və təbii qoruqlardır. Ancaq Eco Camp, Jungle Livinn, Bheemeshwari Jungle Lodge, Camp Potters Hill, Citrus Wild Coridoror kimi ödənişli kampinq yerlərində inanılmaz cəngəllik təcrübəsi yaşaya bilərsiniz. Təbiətin qoynunda oyanmaq və onu bütünü ilə yaşamaq əla fikirdir. Düşərgə yerlərinin əksəriyyəti müxtəlif evlər təklif edir, buna görə çadır gətirməyə ehtiyac yoxdur. Kampinq zamanı hikinq edəcək və ərazini araşdıracaqsınız, bu səbəblə özünüzlə su şüşəsi, bəzi dərmanlar (ağcaqanadlara, milçəklərə qarşı), papaq, bir-iki köynək və s. götürün.

8. Türkiyə

Türkiyənin demək olar ki, hər yerində kampinq edə bilərsiniz. Türkiyə əsasən İstanbul, türk mətbəxi, Osmanlı memarlığı ilə məşhur olsa da, biz bu gün Türkiyənin gizli qalmış tərəfini qeyd edəcəyik. Bu ölkə həm pulsuz, həm də pullu düşərgə sahələri təklif edir. Pullu olanlar da çox ucuzdur (100 ABŞ dolları 770 lirəyə bərabərdir). Ödənişli kampinq yerlərindən bəziləri: Ölüdeniz Doğa Kamp, Azmakbaşı Camping, Tefenni Villas, Andriake Camping Demre, Dilek Camping. Yerdən asılı olaraq karavanda, villada, evdə və ya kottecdə qala bilərsiniz. Bundan əlavə, Muğlada əla sərbəst düşərgə yerləri tapa bilərsiniz. Məsələn mən Akyakanı tövsiyə edə bilərəm. Dəniz kənarında yerləşən Akyaka düşərgə qurmaq, meşədə yürüyüş etmək, çimərlikdə istirahət etmək, gəmi turu etmək və s. üçün idealdır.

9. Avstraliya

Təbii ki, Avstraliya bu siyahıda yer almalı idi. Avstraliya sizə unudulmaz kampinq səyahəti imkanı verir. Burada həm ödənişli, həm də pulsuz düşərgə sahələri tapa bilərsiniz. Geniş seçim imkanınız var, amma gecəni dəniz kənarında keçirtmək istəyirsinizsə, Byron Bay qəsəbəsini təklif edə bilərik. Yaz aylarında izdihamlı olmasına baxmayaraq Byron Bay istirahət etmək, sörfinq və kampinq üçün ən yaxşı yerlərdən biridir. Digər tərəfdən qədim binaları kəşf etmək istəyirsinizsə, Cockatoo adasına üstünlük verə bilərsiniz. Çadır kirayəsi nümunələrin hər ikisində mümkündür. Pulsuz kamp yerlərinə isə, Ellendale Rest Area, Mambi Island Camping Area, Gum Bend Lake, Ten Mile Rocks Rest Area, Scotts Beach Camping Area və başqalarını misal göstərə bilərik.

10. Şotlandiya

Şotlandiyanın kampinq üçün misilsiz yerləri var. Şotlandiyanın demək olar ki, hər yerində vəhşi təbiətdə kampinq mümkündür. Dünyanın digər yerlərində olduğu kimi, burada da əsas narahatlıq səbəbi ocaqdır. Bu səbəbdən kiçik bir ocaq yandırıb nəzarətdə saxlamağınızı məsləhət görürlər. Dağda, meşədə, çay kənarında, çimərliklərdə düşərgə qurmaqda sərbəstsiniz. Həmçinin icazə almaq şərti ilə evlərin yaxınlığında da kamp qura bilərsiniz. Ancaq unutmayın ki, avtomobilinizi düşərgədən kənarda saxlamalısınız (avtomobil kampinqi deyilsə). Şotlandiyada ən məşhur kampinq yerləri: Loch Lomond, Aviemore, Glencoe.