Kanadada təhsil imkanları

Şimali Amerikanın şimal hissəsində yerləşən və gözəl təbiəti və inkişaf etmiş iqtisadiyyatı ilə məşhur olan Kanada ərazi baxımından dünyanın ikinci ən böyük ölkəsidir. Ölkənin paytaxtı Ottavadır. Kanada 10 əyalətdən və üç bölgədən ibarətdir. Rəsmi dilləri ingilis və fransız dili olan Kanadanın milli valyutası Kanada dollarıdır. Dünyanın ən təmiz ölkələrindən biri olan ölkə dünya miqyasında “insan kapitalının mərkəzidir”. Dünyanın hər yerindən müxtəlif səbəblərdən bu ölkəyə köç etmək istəyənlərin sayı gündən-günə artır. Onların əksəriyyəti Kanadaya təhsil almaq, işləmək və yaşamaq üçün gedir. Güclü dövlət siyasəti, gözəl şəhərləri, zəngin florası, qonaqpərvər insanları, aşağı cinayət nisbəti və keyfiyyətli təhsil sistemi ilə Kanada səyahət etmək üçün ən gözəl ölkələrdən biridir.

Kanada necə bir təhsil sisteminə malikdir?

Kanada keyfiyyətli təhsil sistemi, zəngin mədəni strukturu və güclü iqtisadiyyatı ilə xaricdə təhsil almaq istəyən tələbələr üçün ən yaxşı və ideal ölkələrdən biridir. Burada dünyanın dörd bir yanından minlərlə tələbə təhsil alır. Kanadada regional kolleclərə, texniki institutlara və CEGEP kollec sisteminə bölünən təxminən 170 dövlət və özəl kollec var. Kanada kolleclərinin əsas məqsədi sənaye və iş sahələrində peşəkarlar yetişdirməkdir. Bu kolleclərdə təhsil alan tələbələr qısa müddət ərzində müəyyən bir peşəyə yiyələnə bilərlər. Kolleclərdəki bir illik proqramın sonunda tələbələrə sertifikatlar verilir.

Ali təhsildən danışırıqsa, Kanadada təxminən 100 universitetin olduğunu söyləyə bilərik. Təhsil sistemi hər əyalətdə əhəmiyyətli dərəcədə fərqlənir. Hətta universitetdən universitetə ​​dəyişir. Təhsil sistemi daima dövlətin nəzarətindədir və dövlət təhsilin keyfiyyətini artırmaq üçün çalışır. Ümumiyyətlə, Kanada təhsil sistemi hər zaman yenilənir və bu səbəblə günümüzdə ən yaxşı təhsil sistemlərindən biri hesab olunur. Kanadada təhsil almaq istəyən hər kəs ingilis və fransız dillərində olmaqla, bakalavr və magistr dərəcələrində təhsil ala bilərlər. Digər Qərb ölkələrində olduğu kimi Kanadada da ali təhsil sistemi üç pilləlidir. Bakalavr dərəcəsi ilk 4 illik ali təhsil proqramında verilir. 1 və ya 2 illik magistr proqramından sonra doktoranturaya qəbul olanlar fəlsəfə doktoru (PhD) dərəcəsi almaq üçün daha dörd il sərf etməli olurlar. Kanada universitetlərində 1,5 milyondan çox tələbə təhsil alır. Kanadada universitetə qəbul olmaq üçün xüsusi bir imtahan yoxdur. Hər bir universitet öz qəbul qaydalarını təyin edir və bu qaydalara cavab verən insanlar universitetə ​​qəbul olunur.

Kanadada təhsil üçün nə lazımdır?

Ümumiyyətlə, universitetə ​​qəbul üçün ilkin şərt orta məktəbi bitirməkdir. Kanadada bakalavr təhsili almaq üçün TOEFL IBT 90 və IELTS 6.5 tələb olunur. Magistr dərəcəsi üçün bu tələb TOEFL IBT 100 və IELTS 7.0-dır. Bu rəqəmlər universitetə görə dəyişə bilər. İxtisas və universitetdən asılı olaraq GMAT və GRE kimi əlavə imtahanlar da tələb oluna bilər. Təhsil haqqı 10.000 Kanada dollarından başlayır.

İngilis dilli digər ölkələrlə müqayisədə açıq immiqrasiya siyasətinin mövcudluğu, universitet məzunlarının Kanadada qalması və işləməsi üçün daha çox təhsil imkanları yaradır. Hər il 125.000 beynəlxalq tələbə Kanada universitetlərini seçir və gələcək həyatlarını bu ölkə ilə əlaqələndirir. Getdikcə daha çox tələbə universiteti bitirdikdən sonra tibb, əczaçılıq, kompüter elmləri, iqtisadiyyat və neft mühəndisliyi sahələrində işləməyə başlayır. Kanadada təhsil almaq istəyən kəslər ildə 15.000 - 20.000 Kanada dolları ödəməyə hazır olmalıdır. Beynəlxalq tələbələrə yaşayış və təhsil xərclərini qarşılamaq üçün həftədə 20 saat (həmçinin tətillərdə) işləmək şansı verilir. Kanadada 3 aylıq dil kursu üçün tələbə vizası almağa ehtiyac yoxdur. Bununla birlikdə, tələbə vizası və “study permit” almaq uzunmüddətli təhsil üçün əsas şərtlərdən biridir. İllik tibbi sığortanın dəyəri 700 Kanada dollarıdır. Üstəlik, tələbələrin təqaüd üçün dövlətə müraciət etmə haqqı da var.

Kanada universitetləri

Toronto universiteti Kanada universitetlərinin dünya elminin inkişafına müstəsna töhfəsində mühüm rol oynayır. Bu universitetdə ilk elektron kardiostimulyator, süni qırtlaq, kimyəvi lazer hazırlanmış, eləcə də mədəaltı vəzi transplantasiyası və bir çox digər kompleks xəstəliklərin müalicəsi aparılmışdr. Universitetdə hər il beş min aparıcı tədqiqatçı 1 milyard dollar dəyərində tibbi araşdırmalar aparır. Universitetin müvəffəqiyyətlərinə tibb elmi tarixinin ən kritik hadisələrindən biri olan insulinin kəşfi, sümük iliyi nəqlinin əsasını təşkil edən kök hüceyrənin inkişafı, atmosferdə qara dəliklərin olduğunun sübut edilməsi daxildir. Bu da qeyd ediləsi faktdır ki, universitetin astronomları tərəfindən Uranın peykləri - Caliban və Sycorax, həmçinin Andromeda I, II və III qalaktikaları kəşf edilmişdir. Ümumiyyətlə, Toronto universiteti, MakGill universiteti, Brandon universiteti, Vinnipeq universiteti, Viktoriya universiteti, Alberta universiteti, Manitoba universiteti, Acadia universiteti, York universiteti, Saskatchevan universiteti, Vestern universiteti və Nyufaundlend Memorial Universiteti kimi Kanada universitetləri zəngin təcrübəyə və tarixə sahib universitetlər hesab olunur. Buna görə də Kanada universitet dərəcələri, diplomları və sertifikatları dünya miqyasında iş, dövlət və akademik sahələrdə yüksək qiymətləndirilir.