Kuala-Lumpurda 12 İnstaqramlıq yer

İnstaqram bütün dünyadan ən gözəl şəkillərin yarışdığı marafondur. Günümüzdə İnstaqramdan istifadə edən hər kəs sanki izlədiyi şəxslər “möcüzələr albomu” yaradırmış kimi, heç kimin hekayəsini, postunu, IGTV-sini və ya videosunu qaçırmaq istəmir və hər kəs öz şəkli daha çox “like” alsın deyə ən yaxşı, ən gözəl mənzərəli İnstaqramlıq yerləri axtarır. Əgər siz tezliklə Malayziyaya səyahət etməyi düşünürsünüzsə, bu yerləri axtarmaq üçün əziyyət çəkməyinizə ehtiyac yoxdur, çünki bu bloqda sizə Malayziyanın paytaxtı Kuala-Lumpurdakı 12 ən yaxşı İnstaqramlıq yerdən bəhs edəcəyəm.

Ancaq gəlin, əvvəlcə Malayziyayla bağlı əsas məlumatlardan bir neçəsi ilə tanış olaq. Malayziya Cənub-Şərqi Asiyada inkişaf etməkdə olan bir ölkədir. Öz daxilində Qərbi Malayziya və Şərqi Malayziya olmaqla iki hissədən ibarət olan bu ölkə təxminən 13 ştat və 12 territoriyadan ibarətdir. 

Kuala-Lumpur dəbdəbəli çimərlikləri, adaları, hündür tikililəri, rəngli işıqları, modern klubları və UNESCO-nun Ümumdünya mədəni irsi siyahısına düşməyi bacarmış kolleksiyaları ilə nəhəng bir yaşayış yeridir. Şəhərə gələn turistlər özündə suya tullanma, alış-veriş, rəqslər, hikinq və başqa fəaliyyətləri barındıran böyük bir siyahı arasından seçim edə bilərlər. İndi isə Kuala Lumpurdakı 12 ən yaxşı İnstagramlıq yerlə tanış olaq.

1. Sky Deck KL

Əgər siz hündürlüyü və hündür qüllələri sevənlərdənsinizsə, onda bu yer sizin "Malayziyada haralara getməliyəm?" sualınıza cavabdır. Hər tərəfdən şəffaf şüşələrlə əhatələnmiş binada 300 metr hündürlüyə qədər yüksələrkən çəkəcəyiniz özçəkim və ya qrup fotosu heç şübhəsiz, İnstaqram izləyicilərinizi valeh edəcək. Şəkil çəkdirərkən xüsusi ilə, Sky Deck-in başındakı sizi sanki mavi səmanın dərinliyinə addımlayırmışsınız kimi göstərən fotogenik bucağı tapmağa önəm verin.

2. Batu mağaraları

Batu mağaraları 1878-ci ildə William Hornaday adlı amerikalı təbiətşünas tərəfindən kəşf edilənə qədər uzun bir müddət Malayziyadakı çinlilər tərəfindən milli sirr olaraq gizlədilirdi. Bu yer hindu Lord Muruganın xatirəsinə ucaldılmış heykəl tərəfindən qorunur və məbədə çatmaq üçün siz nə az, nə çox, düz 272 pillə qalxmalısınız. Batu mağaralarındakı pillərin özü də bu yer kimi rəngarəngdir və sizin İnstaqram profilinizi də “rəngləndirəcəkdir”.

Maraqlı fakt: pilləkənlərlə məbədə dogru addımlayarkən siz mütləq dizlərinizi örtməlisiniz.

3. Titivangsa gölü və ətrafı

Titivangsa gölü keçmişdə mədənçilik fəaliyyətləri zamanı yaradılmış, daha sonra isə yaxşıca təmizlənərək indiki göl ətrafı bağın mərkəzinə yerləşdirilmişdir. Bu yer İnstaqramsevərlər arasında möhtəşəmliyin ötəsində heyranediciliyi ilə ovsunlayan üfüq xətti ilə məşhurdur. Kuala-Lumpur səyahətinizdə ediləcəklər siyahısına burada şəkil çəkdirməyi əlavə edin!

4. KL Eko Park

Əgər şəhərin təlaşından qurtulmaq və təbiətdə vaxt keçirmək istəyirsinizsə, içiniz rahat bir şəkildə bu parka üz tuta bilərsiniz. Ağacdan-ağaca tullanan meymunlar, müxtəlif bitki növləri, trekkinq yolları, təbiətin sükutu... Kuala-Lumpurun mərkəzindəki bu parkda yaşıllıqlar içində istirahət edərkən, şəhərdə "betonlar arasında" qalan dostlarınızı qısqandıracaq İnstaqramlıq şəkillər çəkməyi də ehmal etməyin.

5. Thean Hou məbədi

Cənnət Tanrıçasının ən qədim 6 mərtəbəli tapınaqlarından - Thean Hou Malayziyada yetərincə məşhurdur və Kuala-Lumpurun ən görməli yerlərindən biri hesab olunur. Hələ maşın və texnikadan öncə tikilmiş bu heyrətləndirici məbədin ən üst qatına çıxıb şəhəri seyr etsəniz özünüz bunun səbəbini başa düşəcəksiniz. Əgər Thean Hou-ya gecə vaxtı getsəniz, fənərlərin işığı ilə daha da sehrli və ruhani görünən bu yerdə füsunkar şəkillər çəkə bilərsiniz.

6. Putra məscidi

Çəhrayı bir məscid. Bəli, təkcə rəngi ilə sizi heyran edəcək bu məscid 3 sahədən ibarətdir: namaz zalı, Sahn (həyət) və bir çox təhsil və fəaliyyət otağlarının olduğu hissə. Putracaya gölünün yaxınlığında yerləşən və eyni zamanda 15000 insana qapılarını aça bilən bu nəhəng tikilinin həm daxilində, həm də xaricində İnstaqram izləyicilərinizin ağzını açıq buraxacaq şəkillər çəkə bilə və məscidin ətrafını daha rahat kəşf etmək üçün velosiped kirayə götürə bilərsiniz. 

7. Petronas qüllələri

İndi isə Kuala-Lumpuru bütün dünyada məşhur edən arxitektura möcüzəsi - Petronas qüllələri. Dünyanın 7-ci ən hündür qülləsi olan Petronasla bağlı ən yaxşı şeylərdən biri də Mandarin Oriental-dır. Bu 5 ulduzlu otel Kuala-Lumpur şəhər parkı ilə Petronas qüllələri arasında yerləşir və siz bu oteldə gecələyərək şəhərin iki ikonik yerinin qüsursuz şəkillərini çəkə bilərsiniz.

8. Changkat Bukit Bintang

Kuala-Lumpurda nəyi görməli? Bukit Bintangdakı küçələr canlı rənglər və bacarıqlı insanlarla doludur. Sanki burada həyat bir İnstaqram filtrində davam edir. Bu bölgədəki insanlar küçə sənətini tamamilə yeni bir səviyyəyə daşıdılar və ona yeni tərif verdilər. Siz də burada şəhər həyatını əks etdirən ilhamverici rəsmlərlə foto çəkdirib İnstaqramda paylaşaraq profilinizə yeni bir rəng qata bilərsiniz.

9. Bukit Tabur

Əgər hikinqi sevirsinizsə, o zaman buraya mütləq səfər etməlisiniz. Macərapərəstlərin və "backpacker"-lərin Malayziyadakı ən sevdiyi yer olan Bukit Tabur-un ən yuxarısından buludları seyr edə və bu zaman öz ölkənizə qayıtdıqda sevdiklərinizə necə əyləncəli vaxt keçirdiyinizi göstərmək üçün müxtəlif İnstaqramlıq fotolar çəkdirə bilərsiniz.

10. Camek məscidi

Sultan Abdul Samad binasının qarşısında, çayın digər tərəfində yerləşən bu əzəmətli məscid, Kuala-Lumpurun ən qədim məscidlərindən biri hesab edilir. Burada çəkdiyiniz şəkillər bütün dünyaya indiki çətin vaxtlarda ehtiyac duyduğu mənəvi və ruhani hissləri bəxş edəcəkdir. 

11. Sultan Əbdül Səməd binası

Bu təqdirəlayiq bina (Sultan Abdul Samad Building) Merdeka meydanında yerləşir. Merdeka sözünün hərfi mənası müstəqillikdir. Malayziya əhalisi 1957-ci ilin avqustundan bəri bu binada müstəqilliyini qeyd edir. Buraya baş çəkən illüstratorlar xüsüsi ilə, diqqətlə işlənilmiş və valehedici sənət əsərlərinə fokuslana bilərlər. 

12. Taman Tugu

Yam-yaşıl tropik bitkilərlə əhatə olunmuş bu yerdə siz 4 km-ə qədər hikinq edə bilərsiniz. Taman Tugu-nun ən yaxşı tərəfi, İnstaqram hekayənizin heç bir filtrə ehtiyac duymamasıdır. Bonus olaraq, "yaşıl dünya" yeni yer olduğuna görə, bu yerdən çox tanışınız xəbərdar olmaya bilər və bu onlarda daha da marağa səbəb olacaqdır.

Gördüyünüz kimi, Malayziyanın paytaxtı Kuala-Lumpurda hər zövqə xitab edən seçim mövcuddur. Bu blog Kuala-Lumpurun ən gözəl 12 yerini əhatə edir amma bu ovsunlayıcı şəhərdə daha çox kəşf ediləcək və İnstaqramlıq şəkil çəkdiriləcək yer var. Fotoqraf olmayan biri belə burada fotoqrafa çevrilə bilər!