Londonda 12 İnstaqramlıq yer

Londonda yaşayacağınız ən pis gün belə, başqa bir yerdəki yaxşı gündən daha üstündür. Londonda vaxt keçirmək milyonlarla insanın ən böyük arzusudur. Məlumatlar göstərir ki, 2019-cu ildə bu cazibədar şəhəri təxminən 12 milyon turist ziyarət edib. Biz də bunları nəzərə alaraq, Londondakı instaqramlıq yerləri əhatə edən siyahı hazırlamağa qərar verdik. Vaxt itirmədən başlayaq!

1. Madam Tüsso Muzeyi

Madam Tüsso muzeyinin dünya miqyasında 21 filialı var (altısı ABŞ-da) və bunlardan biri də Londondadır. Muzeydə real görünən 250-dən çox mum heykəl var. Burada Benedikt Kamberbetç və Keyt Uinslet kimi Hollivud ulduzları ilə tanış ola və İnstaqramda ən çox bəyəni alacaq şəklinizi çəkə bilərsiniz. Həmçinin muzeydə Ulduz müharibələri və Marvel pərəstişkarları üçün xüsusi hissələr var. Sən seçilmişsən. İdmanla maraqlanırsınızsa, idman zonasına gedin. Məşhur idmançı Useyn Bolt və keçmiş futbol ulduzu Devid Bekhem orada sizi gözləyir. Əlbəttə ki, Londona səyahət edirsinizsə, kral ailəsini də ziyarət etməlisiniz. Kraliça ilə instaqramlıq pozlar verməkdən çəkinməyin. Londonda gediləsi ən yaxşı yerlərdən biri olan muzeyin bütün eksponatlarını kəşf etmək üçün təxminən iki saat vaxt sərf edəcəksiniz. Muzey ziyarətçilər üçün həftənin yeddi günü səhər 10-dan axşam 4-ə qədər açıqdır.

2. London Akvariumu

Məkanın uşaqlar üçün olduğunu düşünməyin. Hər kəs bu unudulmaz təcrübəni yaşamalıdır! Akvarium bir neçə hissədən ibarətdir. Səyahətinizə Seahorse Kingdom ilə başlayın və daha sonra piranaları və timsahları müşahidə etmək üçün Rainforest Adventure-a yollanın. Cəsarətlisinizsə, köpək balığı tuneli tam sizlikdir. İki saatlıq ziyarət zamanı (müddət sizdən asılıdır) Londonda gözəl vaxt keçirəcəksiniz. Sea Life London Akvariumu haradadır? Bu instaqramlıq məkanı Temza çayının cənub sahilində Londonun gözünun yaxınlığında tapacaqsınız, ancaq getməzdən əvvəl bilet sifariş etməlisiniz. Sea Life London Akvariumu həftənin 7 günü, səhər 10-dan 15:45-ə qədər işləyir.

3. Warner Bros. Studiyası

Buranı ziyarət etmək Harri Potter pərəstişkarları üçün xüsusilə vacibdir. Warner Bros. Studiyası, saat 10:00-dan başlayaraq turlar təşkil edir və bu, gündən asılı olaraq 16-18:00-a qədər davam edir. Burada Harri Potter filmlərini təşkil edən bütün səhnələri, sirləri və sehrləri kəşf etmək şansı əldə edəcəksiniz. Filmlər seriyasının hər bir filmi burada lentə alınıb. Heyrətləndirici Hoqvarts zalı, Qadağan olunmuş meşə və digər instaqramlıq setlər sizi gözləyir. Bəs qiymətlərdən nə xəbər? Londonda gediləsi ən yaxşı yerlərdən birini ziyarət etmək üçün yetkinlər bilet başına 89.00 £, uşaqlar isə 84.00 £ ödəyəcəklər. Üstəlik, burada özünüzə və ya sevdiklərinizə hədiyyə ala biləcəyiniz suvenir mağazası da var.

4. Kyu Kral Botanika Bağı

Kyu bağları Londonun ən instaqramlıq yerlərindən biridir. YUNESKO-nun Ümumdünya irsi siyahısına salınmış məkan səs-küylü şəhər həyatından uzaqlaşmaq istəyən insanlar üçün əla bir yerdir. Botanika bağı qlobal miqyasda ən müxtəlif bitki kolleksiyalarından birinə ev sahibliyi etməsi ilə, yalnız adi turistləri deyil, həm də elm adamlarını özünə cəlb edir. Kyu bağlarındakı instaqramlıq yerlərdən bəziləri: Palm House, Princess of Wales Conservatory, Waterlily House, Treetop Walkway. Ayrıca, vaxtilə Kral III Georqun yay evi olmuş məkanı da ziyarət edə bilərsiniz. Kyu kral botanika bağında həyəcan verici vaxt keçirmək məqsədilə uşaqlar üçün 6 funt, böyüklər üçün 18 funt ödəməniz gərəkəcək. Bağda instaqramlıq fotolar çəkməyə səhər saat 10-dan başlaya bilərsiniz.

5. London Qəsri

Tarixi sevirsinizsə və Londonda ziyarət etmək üçün tarixi yerlər axtarırsınızsa, buyurun! Keçmişdə işgəncə və ölüm evi kimi məşhur olan qala bu gün Londonun ən məşhur və instaqramlıq yerlərindən biridir. Xüsusuilə Royal Beasts-ə ziyarət fürsətini qaçırmayın və keçmişdə London qəsrində məskunlaşan vəhşi heyvanlar haqqında məlumat əldə edin. Yetkinlər üçün giriş biletinin qiyməti 28,90 funt sterlinqdir, uşaqlar üçün isə yarı qiymətədir (beş yaşınadək pulsuz). Qəsri ziyarət etməzdən əvvəl həftənin günlərinə görə dəyişən iş saatlarına nəzər salmaqda fayda var.

6. London Nəqliyyat Muzeyi

Əminəm ki, çoxunuz əvvəllər belə bir muzey görməmisiniz. London Nəqliyyat muzeyi sizə keçmişə qayıtmağa və şəhərin nəqliyyat tarixini və inkişafını müşahidə etməyə imkan verəcək. Burada nəqliyyat vasitələrinin sayı kifayət qədərdir, lakin ikisi daha çox tanınır: qırmızı London avtobusu və dünyanın ilk metro qatarı. Müxtəlif avtobusların qarşısında İnstaqram fotolar çəkdirin, turlara qoşulun və ya klassik ingilis avtobuslarını və qatarlarını idarə etməyin necə bir hiss olduğunu təcrübə edə biləcəyiniz interaktiv qalereyalardan zövq alın. Muzeyi ziyarət etdikdən sonra kafedə dincələ və ya mağazadan bir neçə xatirə suvenir ala bilərsiniz.

7. Epping Meşəsi

Google-da Londonun instaqramlıq yerlərini axtardığınız zaman, ehtimal ki, ilk 20-də Epping meşəsinin adını görəcəksiniz. Bura Londonda qorunan sahələrdən biridir və çox nadir bitki və böcək növlərinə ev sahibliyi edir. Sakinlər və turistlər buraya yürüyüş etmək, çox bəyənilən İnstaqram fotoları çəkmək və dincəlmək üçün gəlirlər. Meşədə gəzərkən bir çox köhnə və nəhəng ağaclar görəcəksiniz, onlardan bəziləri bir qədər dəhşətli görünə bilər. Bu ağaclardan bəziləri mənə Entləri - Üzüklərin hökmdarı filmlər seriyasındakı danışan ağacları xatırladır.

8. Müqəddəs Pavel Kafedralı

Londonda çox sayda kilsə və kafedrallar var və Müqəddəs Pavel kafedralı da onlardan biridir. Cazibədar daxili və xarici dizaynı, Horatsio Nelson və Artur Uelsli Vellinqton kimi müxtəlif görkəmli insanların məzarları, kafedralı Londona səyahət zamanı mütləq ziyarət olunması gərəkən yerlərdən edən əsas səbəblərdir. İnstaqramda minlərlə bəyəni alacaq şəkillər çəkmək üçün kafedralın ən yuxarısına - Golden Gallery-ə qalxın.

9. Trafalqar Meydanı

Londondakı instaqramlıq yerlərdən bəhs edərkən Trafalqar meydanını qeyd etməmək mümkündürmü? Trafalqar meydanı çoxlu heykəlləri, qalereyaları, tarixi binaları və s. bir araya gətirən ictimai yerdir. İl ərzində müxtəlif tədbirlərə ev sahibliyi edir. Keçmişdən bəri etiraz və nümayişlərin mərkəzi olması səbəbilə meydan minlərlə tarixi məqamın şahidi olmuşdur. Trafalqar meydanını ziyarət edərkən baş çəkməniz gərəkən digər yerlər: London Milli Qalereyası, Milli Portret Qalereyası və s.

10. Futbol Stadionları

Hər kəs futbolun İngiltərədəki əhəmiyyətindən xəbərdardır. London da ölkədəki əsas futbol mərkəzlərindən biridir. Şəhərdə 20-dən çox stadion var və tutumuna görə ən böyüyü Uembli stadionudur. Bu stadionda eyni zamanda 90000 tamaşaçı futbol oyunu izləyə bilər. Ziyarətə etməyə dəyər digər məşhur stadionlara Emirates stadionu, London stadionu, Stemford Bric, keçmiş Uayt Hart Leyn və s. misal göstərə bilərik. Bu stadionların hər birinə turlar mövcuddur. Hər hansı bir futbol klubunun azarkeşi olmasanız belə, Londonda ən azı bir dəfə canlı futbol oyunu izləməyinizi məsləhət görürəm.

11. İnstaqramlıq Yemək Məkanları

Londonda müxtəlif millətlərdən olan çoxlu insanlar yaşayır və bu mədəni zənginlik özünü mətbəxdə də göstərir. Londonda ləzzətli yeməklər yeyə biləcəyiniz ən instaqramlıq yerlər: Kennington Lane Cafe, Scarlett Green, Grand Cholan, Amrutha Lounge və s.

12. Chinatown

Londonda instaqramlıq yerlər siyahısında qeyd etmək istədiyim son məkan Chinatowndur. Londona səyahətiniz zamanı Çini kəşf etmək istəsəniz bu yeri ziyarət edin. Chinatownda ləzzətli Çin mətbəxini dadmaq, rəngarəng dükanlarda alış-veriş etmək və suvenirlər almaq şansınız olacaq. Demək olar ki, bütün küçələrdə əjdahalar, rəngli şarlar kimi Çin ornamentlərini görəcəksiniz.