Visa entry stamps in passport

Mərakeşə turist vizası necə alınır?

Tamerlan Mehdiyev Tamerlan Mehdiyev 30 iyul 2021
17 baxış 5 dəq. oxu

Mərakeş Afrikanın şimal-qərb ucunda yerləşir. Afrikanın şimalını kəşf etmək istəyən səyahətçilər üçün böyük bir istinadgahdır. Zəngin mədəniyyəti və qədim tarixi ilə Mərakeş səyyahların diqqətini çəkməyi bacarır. Ölkənin strateji mövqeyi dünya gücləri üçün həmişə dəyərli olub. Bu səbəbdən ölkə tarixi boyunca böyük oyunçuların işğal cəhdləri ilə üzləşib. Eyni zamanda, bir nöqtədə ərazilərini Pireney yarımadasına doğru genişləndirən böyük bir oyunçu olub. Pireney yarımadasının cənub hissəsində Mərakeş təsirini hələ də tapa bilərsiniz. 1912-ci ildə ölkə İspaniya və Fransanın işğalı ilə üzləşdi. Xarici dövlətlər 1956-cı ildə müstəqillik əldə edənə qədər ölkəni idarə etdilər. Təəccüblüdür ki, Mərakeş Amerika Birləşmiş Ştatlarını müstəqil ölkə kimi tanıyan ilk dövlətdir.

Mərakeş hər il təxminən 10 milyon insanın səyahət etdiyi Afrikanın şimalında ən çox ziyarət edilən ölkələrdən biridir. Niyə bu qədər diqqəti cəlb etdiyi başa düşüləndir. Mərakeş səyahətçilərə heç vaxt unutmayacaqları təcrübə vəd edir. Şimali Afrikanın mənşəyimizə qayıtmaq kimi hiss etdirən sehrli bir mühiti var. Mexanika, ekran və maşınlarla dolu bugünkü izdihamlı həyatdan çox fərqlidir. Burada dəvə sürülərini, sadə və köhnə iqamətgahları və hətta çadırlarda yaşayan insanları görəcəksiniz. Ancaq artıq bunları filmlərdə görmüsünüz və yəqin ki, xüsusi bir şey olduğunu hiss edirsiniz.

Daha da maraqlısı, Mərakeşin yalnız çöl və ya quraq ərazilərlə məhdudlaşmamasıdır. Ölkənin yamaclarında yaşıllıqlar tapa biləcəyiniz mənzərəli dağları var. Ən möhtəşəm turistik yerlərdən bəziləri rəngarəng Mərakeş bazarlarıdır. Burada gözəl əl işləri, rəngli parçalar və suvenirlər, həmçinin yerli ədviyyatlardan ləzzət ala və insanların qonaqpərvərliyi ilə isinə bilərsiniz. Bir şey almaq istəyirsinizsə, bazarlıq etməyi unutmayın. Bir az səy və bacarıqla, münasib qiymətlərlə möhtəşəm əşyalar satın ala bilərsiniz. Sizə bu barədə məsləhətlər vermək istərdim, amma təəssüf ki, oxuduğunuz məqalə Mərakeş turist vizasına həsr edilmişdir. Bu məqalədə Mərakeş turist vizasının necə alınacağını araşdıracaq, eyni zamanda Mərakeş turist vizası tələbləri, 90 günlük Mərakeş turist vizası, lazım olan sənədlər və s. kimi mövzuları əhatə edəcəyik. Ancaq birinci növbədə kimlərin vizaya ehtiyacı olub-olmadığını araşdırmaq üçün Mərakeşin viza siysətinə baxacayıq.

Mərakeşin viza siyasəti

flag of morocco

Müxtəlif xarici dövlətlərlə qurduğu münasibətlərə görə Mərakeş vizasına ehtiyacı olub-olmaması baxımından ölkələri vizasız və viza tələb olunan olaraq təsnif edə bilərik. Vizasız ölkələr aşağıda verilmişdir:

Əlcəzair, Andorra, Argentina, Avstraliya, Avstriya, Bəhreyn, Belçika, Braziliya, Bolqarıstan, Kanada, Çili, Çin, Fildişi Sahili, Xorvatiya, Kipr, Çexiya, Danimarka, Estoniya, Finlandiya, Fransa, Qabon, Almaniya, Yunanıstan, Honkonq, Macarıstan, İslandiya, İndoneziya, İrlandiya, İtaliya, Yaponiya, Küveyt, Latviya, Lixtenşteyn, Litva, Lüksemburq, Makao, Malayziya, Malta, Meksika, Monako, Hollandiya, Yeni Zelandiya, Niger, Norveç, Oman, Peru, Filippin, Polşa, Portuqaliya, Qətər, Rumıniya, Rusiya, San Marino, Səudiyyə Ərəbistanı, Seneqal, Sinqapur, Slovakiya, Sloveniya, Cənubi Koreya, İspaniya, İsveç, İsveçrə, Tunis, Türkiyə, Birləşmiş Ərəb Əmirlikləri, Birləşmiş Krallıq, ABŞ.

Ölkəniz siyahıda deyilsə, Mərakeşə səyahət üçün vizaya ehtiyacınız olacaq. Amma hansı vizaya? Vizalar çoxdur və səyahət məqsədlərinə görə təsnif olunurlar. Onları qısamüddətli və uzunmüddətli vizalar olaraq qruplaşdıra bilərik.

Mərakeş turist vizası

moroccan visa

Bu viza növü ölkəni turistik məqsədlərlə qısa müddət üçün ziyarət etmək istəyən insanlara verilir. Mərakeş turist vizasına müraciət üçün hansı sənədlər lazımdır? Aşağıdakı siyahıda Mərakeş turist vizası tələblərini tapa bilərsiniz:

• Ərizəçi tərəfindən lazımi qaydada doldurulmuş, imzalanmış və tarixlənmiş Mərakeş turist vizası müraciət forması.

• Mərakeşi tərk etdikdən sonra 6 ay ərzində etibarlı qalacaq, sahibinin imzasını daşıyan və son 10 ildə verilmiş pasport. Heç olmasa bir və ya iki boş səhifəsinin olması vacibdir.

• Ərizəçinin son 6 ayda çəkilmiş iki şəkli də tələb olunur. Üzün ön hissəsi fotoşəkilin təxminən 70-80%-ini (32-26 mm) tutmalıdır. Fotoşəkillərin arxa planı ağ rəngdə olmalıdır. Tələb edilən ölçülər: 3,5x4,5 sm.

• Mərakeşdən ayrıldıqdan sonra üç ay müddətində etibarlı olacaq şəxsiyyət vəsiqəsi.

• Vətəndaşı olduğunuz ölkədən başqa bir ölkədə yaşayırsınızsa, yaşayış icazəsi və ya vizasının surətini təqdim etməlisiniz.

• Digər vizaların surətləri ilə birlikdə pasportun əsas səhifəsinin surəti.

• Səyahət marşrutu – bütün məlumatları əks etdirən təyyarə bileti və qonaqlama yeri bronları.

• Müraciətçinin işlədiyini təsdiq edən yerli işəgötürən tərəfindən verilmiş məktub. Bu məktubda şirkətin adı, ünvanı, əlaqə məlumatları göstərilməlidir. Bundan əlavə, müraciətçi şəxsin vəzifəsi, əmək haqqı, işə başladığı tarix və s. kimi məlumatlar da öz əksini tapmalıdır.

• Ərizəçi səyahətini maliyyələşdirmək qabiliyyətinin olduğunu göstərməlidir. Maliyyə imkanları nağd pul, kredit kartı, maliyyə fəaliyyətini göstərən bank çıxarışı, əmək haqqı sənədləri və s. təqdim edilməklə sübut edilə bilər.

• Səyahətçi yetkinlik yaşına çatmayıbsa, ingilis dilinə tərcümə edilmiş doğum haqqında şəhadətnamə və ya övladlığa götürmə haqqında sənəd təqdim edilməlidir.

Mərakeş turist vizası rüsumu nə qədərdir?

dollar

Ödəyəcəyiniz rüsum bəzi amillərdən asılıdır. Mərakeş turist vizası rüsumu ölkədən-ölkəyə fərqlilik göstərə bilər. Ancaq əksər hallarda 25 ABŞ dollarıdır. Ancaq bu qiymət tək girişli vizalara şamil olunur. Ölkəyə bir neçə dəfə giriş etmək istəsəniz, 35 ABŞ dolları ödəməli olacaqsınız.

Mərakeş turist vizasını necə əldə etmək olar?

Proses adətən belə davam edir. Əvvəlcə yerli Mərakeş səfirliyini və ya konsulluğunu tapıb Mərakeş turist vizası tələbləri və s. ilə bağlı informasiyaları soruşur və daha sonra görüş alırsınız. Əgər ölkənizdə Mərakeş səfirliyi yoxdursa, ətraf ölkələrdəki sizə ən yaxın olanı ziyarət edə bilərsiniz. Vaxtında səfirlikdə olun, sənədlərinizi təqdim edin və rüsumu ödəyin. Daha sonra təxminən 3-10 gün çəkən proses müddətini gözləyin. “Mərakeş turist vizamın statusunu necə öyrənə bilərəm?” – deyə soruşa bilərsiniz. Bir çox hallarda müraciətinizin nəticəsi ilə bağlı səfirlikdən xəbərdarlıq alırsınız. Ancaq prosesin bitib-bitmədiyini öyrənmək üçün səfirliklə əlaqə saxlaya da bilərsiniz.

Mərakeş turist vizası üçün onlayn müraciət

online tourist visa application

Elektron viza seçimi Mərakeşə 90 günlük və ya daha az müddət üçün turist vizası almaq istəyənlərə təqdim olunur. Müraciətə başlamaq üçün Elektron Səyahət Avtorizasiyasının rəsmi saytına daxil olmalısınız. Elektron vizanın əsas məhdudiyyəti yalnız Mali, Qvineya və Konqo Respublikası vətəndaşları üçün mövcud olmasıdır. Əgər bu seçim sizin üçün uyğundursa, tələb olunan sənədləri - etibarlı pasport, fotoşəkil, geri qayıdış bileti, bank çıxarışı, səyahət və sağlamlıq sığortası, qonaqlama yeri bronu təqdim etməlisiniz. Elektron vizanın güclü tərəflərindən birincisi, adından da göründüyü kimi, müraciətin elektron olması və hər hansı bir sənədi başqa bir şəxsə təhvil verməyinizə ehtiyac olmamasıdır. İkincisi, ənənəvi üsuldan daha sürətli nəticə əldə edilməsidir.

Sonuncu olaraq isə bu üsulla nəinki zamana, həm də bir çox yerə getməməklə pula qənaət edəcəyinizi qeyd edə bilərik. Ancaq hər şey mükəmməl deyil. Texniki problemlər səbəbindən bəzi problemlərlə üzləşə bilərsiniz. Onlayn Mərakeş turist vizası neçəyə başa gəlir? Rüsum səfirlikdən əldə edəcəyiniz vizanın rüsumu ilə demək olar ki, eynidir.

Turist vizanın müddətini uzada bilərəm?

moroccan embassy

Mərakeşi tamamilə kəşf etmək üçün 90 gün belə kifayət etməyə bilər. Əgər siz də belə düşünənlərdən birisinizsə, vizanızın etibarlılıq müddətini uzatmaq istəyə bilərsiniz. Bəs bu mümkündürmü? Bəli, mümkündür! Vizanızın etibarlılıq müddətinin uzadılması üçün sizə ən yaxın Polis Bölməsinə müraciət etməlisiniz.

Xülasə, Mərakeşin ziyarətçilərə təqdim edəcəyi çox şey var. Turizm ölkənin prioritet sahələrindən biridir və turistlər ölkəni ziyarət etməkdən çox məmnunluq duyurlar. Bu səbəbdən viza almaq şansınız çoxdur. Sadəcə bütün tələb olunan sənədlərə sahib olduğunuzdan və meyarlara cavab verdiyinizdən əmin olun.

Paylaş

Tamerlan Mehdiyev

Tamerlan Mehdiyev tam bir elm həvəskarıdır. Yer haqqında elmlər üzrə magistr dərəcəsi alan Tamerlan iqlim dəyişikliyi ilə bağlı araşdırma etməyi planlaşdırır. Təbiəti və Yer üzünün gözəlliklərini müşahidə etməyi sevir. Səyahətin onu müdrikləşdirəcəyinə və daxili rahatlıq tapmasına kömək edə biləcəyinə inanır. Həyat məqsədi mümkün qədər çox fərqli yerləri, mədəniyyətləri, insanları görməkdir.

Bütün bloqlar
pickvisa.az