Naməlum Milan

İnsan yaşadığı yer kimidir. İnsanın yaşadığı yer onu əks etdirir. Bir insanın qeyd etdiklərimdən hansına adaptasiya olacağını təxmin edə bilmərik, ancaq bu, bütün insanlar üçün keçərli faktdır. Milan və milanlılar da bir-birinə bənzəyir: tələskən, modabaz, rəqabətcil, eyni zamanda maraqlanan, uzaqgörən, gözəlliyi sevən, İtaliyanın kosmopoliti.

Səthi və zidd bir qiymətləndirməyə görə, Milan boz, soyuq və çirkin görünə bilər. Bu axmaq düşüncəni neçə dəfə eşitmişik? Etməli olduğunuz bir müddət müşahidə aparmaq, qəlibdən kənara çıxmaq, arxasında heyrətamiz dərəcədə ecazkar yer olan ağır və sərt qapını açmaqdır.

İtaliya xəritəsində Milan

Şimali İtaliyada yerləşən Milan Lombardiyanın paytaxtı və ölkədə Romadan sonra ikinci ən sıx şəhərdir. Milan Qərbi Roma imperiyasının paytaxtı, Milan hersoqluğu, Lombardiya-Venesiya krallığı kimi xidmət edib. Şəhərin əhalisi təxminən 1,4 milyon, mitropolitin əhalisi isə 3,26 milyondur.

Milan, sənət, ticarət, dizayn, təhsil, əyləncə, moda, maliyyə, səhiyyə, media, xidmətlər, tədqiqat və turizm sahələrində dünyanın alfa şəhəri sayılır. Şəhərin iş bölgəsində Milan birjası və milli və beynəlxalq bankların və şirkətlərin qərargahı yerləşir. ÜDM baxımından Milan "Avropa üçün dörd mühərrik"-dən biri hesab olunur.

Milan Padan ovalığının şimal-qərb hissəsində, Olona və Lambro çaylarının əhatəsində yerləşir. Şəhərin ərazisi düzdür. Ən yüksək nöqtə dəniz səviyyəsindən 122 m (400,26 ft) yüksəklikdədir.

Milanda görməli yerlər

Yəqin ki, hər kəs Milan kafedralı (Duomo di Milano) haqqında eşidib. Qlobal olaraq ən böyük kafedrallardan biri olan Milan kafedralı Vatikandakı Müqəddəs Pyotr bazilikasından sonra İtaliyada ikincidir və Avropada İntibah memarlığının ən gözəl nümunələrindən biridir.

Milan kafedralının damı Milanda gizli qalmış ən yaxşı yerdir. Bu gizli məkandan ən yaxşı şəkildə zövq almaq istəyirsinizsə, terasa günəş batarkən getdiyinizdən əmin olun. Bu zaman işıqlandırma çox yaxşı olduğundan ən gözəl İnstaqram şəkillərini çəkə bilərsiniz.

Leonardonun Üzüm Bağı

Milanın qəlbində yerləşən Leonardonun Üzüm Bağı yeni açılan muzeydir və təxmin etdiyiniz kimi, Leonardonun şərablarına ev sahibliyi edir. Muzey sənətkarın məşhur Sonuncu şam yeməyi freskasının yerləşdiyi Santa Mariya della Qrasiya kilsəsinin qarşı tərəfindədir. İtalyanca adı La Vigna di Leonardo olan məkan Lombardiya paytaxtını kəşf edərkən zövq ala biləcəyiniz yerlərdəndir. Öncədən rezervasiya hər zaman tələb olunur.

Terragio Bağı

Milanın tanınmayan incilərindən biri olan məkan tam 70 il qapalı qalmış və nəhayət 2010-cu ildə yenidən açılmışdır. Evlər arasında qalan parkın girişi Via Terraggio 5 nömrəli boz tağlı qapı ilə müəyyən edilə bilər. Bu təvazökar parkı tapmaq bir az çətin ola bilər, lakin günəşli bir gündə dincəlmək və şəhərin istiliyinə qarşı mübarizə apardıqdan sonra rahatlamaq üçün idealdır.

Palazzo Lombardia

Dizaynı məşhur arxitektura firması Pei Cobb Freed & Partners tərəfindən hazırlanan Palazzo Lombardia, Lombardiya Regional Şurasının təşkilatlarına ev sahibliyi edir. Bu göydələni hər kəs uzaqdan görə bilər. Digər yaxşı xəbər isə ondan ibarətdir ki, məkan bazar günləri səhər saat 10-dan axşam 6-ya qədər instaqramlıq mənzərələr üçün ziyarət edilə bilər. 39-cu mərtəbədə Milanın üfüq xəttindən zövq alın.

Corso di Porta Romanada top gülləsi

1848-ci ildə şəhər Milanın beş günü adlanan zamandan keçdi. Bu günlərdə Milan xalqı İtaliyanın birləşdirilməsi uğrunda Avstriya hökmranlığına qarşı üsyan qaldırdı və bu da öz növbəsində iki tərəf arasında şiddətli qarşıdurmalara səbəb oldu. Bu gün Corso di Porta Romanadakı bir binanın divarında həmin dövrdən qalma top gülləsi var. Lövhədə isə bu tarix qeyd olunub: 20 mart 1848.

Palazzo Dal Verme

Adını yaxınlıqdakı teatrdan götürən Palazzo Dal Verme müasir binalar arasında yerləşən İntibah dövrü incisidir. Müasir binalarda çətin tapılan memarlıq ahənginə sahib məkan hər kəsin zövqünü oxşayır. Maraqlısı odur ki, bu bina Milanın 1943-cü ildə II Dünya Müharibəsi əsnasında yaşadığı bombardmandan xilas olmağı bacarıb. İndi isə açıq hava muzeyi kimi fəaliyyət göstərir.

Linkoln küçəsi

Via Linkoln həqiqətən də Milanın gizlətdiyi ən gözəl sirlərdəndir. Milan kimi sənaye və biznes şəhərində öz rəngarəng evləri ilə seçilən bir küçə. Bu evlər yaxın ərazilərdən gələn işçiləri sərfəli qiymətlərlə qonaq etmək üçün 19-cu əsrin sonlarında tikilmişdi. Yəqin ki, hal-hazırda bu evlərin kifayət qədər bahalı olduğunu deməyə lüzum yoxdur. Küçə boyunca gəzinti pulsuzdur və bu məkan şəhərə gələn hər hansı bir memarlıq aşiqini mütləq məmnun edəcəkdir.

Milanda yemək

Carlo Cracco İtaliyanın ən yaxşı aşpazlarından biri sayılır və o, Milanın ən dəyərli sərvətlərindən biridir. Karyerası boyunca qazandığı Michelin ulduzları ilə şef Cracco 2007-ci ildə Milanda öz adına bir restoran açdı. Restoranda mükəmməl bir xidmət ilə bir-birindən dadlı təamlar təqdim olunur və iki Michelin ulduzu var. Ziyarətçiləri inanılmaz ləzzətlər və füsunkar qoxulara doğru səyahətə çıxaran 10 kurslu menyusu olan restoran hər bir turistin damağında iz qoyacaqdır.

Villa Invernizzi

Corso Venezia küçəsində yerləşən Villa Invernizzi modern üslublu bir saraydır. Tarixi məkan hal-hazırda  çəhrayı flaminqoların, tovuzquşuların və ördəklərin sərbəst gəzdikləri şəhərin ən xoş bağlarından biri hesab olunur. Məşhur Parco Sempione parkına alternativ axtaran hər kəs buranı ziyarət etməlidir.

Milan Futbol Klubları, İnter Milan FK

Milan əfsanəvi futbol klubları ilə də məşhurdur. 1899-cu ildə yaradılan Milan FK İtaliyanın Milan şəhərində fəaliyyət göstərən peşəkar futbol klubudur. Klub 1980-81 və 1982-83 mövsümləri xaricində bütün mövsümləri hal-hazırda İtaliya A Seriyası olaraq bilinən İtaliya futbol liqasının ali divizionunda keçirib.

İtaliya xaricində "İnter Milan" kimi tanınan və ya sadəcə "İnter" olaraq adlandırılan İnter Milan FK isə Lombardiya mərkəzli professional futbol klubudur. Klub heç vaxt İtaliya ali divizionundan düşməmiş yeganə italyan klubudur.

İnter ilk çempionluğunu 1910-cu ildə qazanıb. Yarandığı gündən bu yana 18 dəfə İtaliya çempionu olmuş klub 7-si İtaliya Kuboku və 5-i İtaliya Superkuboku olmaqla ümumilikdə 30 dəfə kubok qaldırıb. 2006-cı ildən 2010-cu ilə qədər klub ardıcıl beş il əsas İtaliya liqasını birinci bitirib və bu, o dövrdə rekord idi. İnter Milan FK Çempionlar Liqasınının da 3 dəfə qalibi olub: 1964, 1965 və 2010-cu il. 2010-cu il klub üçün ən uğurlu il hesab olunur.

Qeyd etdiklərimiz xaricində Milana səyahətdən əvvəl bilməli olduğunuz bir neçə sadə şey var. Məsələn, səyahət sferasındakı hər kəsin ingilis dilində danışa bilməsinə baxmayaraq, italyan dilində bir-iki söz öyrənmək çox yaxşı olar. Ən azından "salam", "xahiş edirəm", "təşəkkür edirəm" və "üzr istəyirəm" sözlərini öyrənməyinizi məsləhət görürəm.