Norveç Şengen vizası haqqında bilməli olduğunuz hər şey

Maraqlarınız nə olursa olsun, bu ölkəni ziyarət etməyə dəyər, amma bunu artıq bilirsiniz, düzdür? Buradasınızsa, Norveç Şengen vizası ilə bağlı hər şeyi araşdırırsınız. Oh, Norveç... Əfsanəvi təbii gözəllik və yüksək səviyyəli yaşayış məkanı. Bəli, buranı ziyarət etmək əksər ölkələrdən daha bahalıdır, lakin əfsanəvi mənzərə və təbiətə yaxınlıq hər kəsin həyatında ən azı bir dəfə təcrübə etməli olduğu bir şeydir. Ailənizlə birlikdə xizək səfəri, Norveç qızılbalığı ilə qastronomiya turu və ya Lofoten adalarına ziyarət olsun, fərqi yoxdur. Bəlkə bu fyordlara heyran olmaq üçün dostlarınızla birgə dik qayalıqlara hikinq səfəri olacaq? Ya da əsas attraksionu qütb parıltısı olan bir qış macərası?

Bir əcnəbi olaraq sizin üçün dağ elflərinin bütün nəfəs kəsən möcüzələri yalnız Norveç sərhədlərindən keçdikdən sonra əlçatandır. Bunu edə bilmək üçün əsas element isə etibarlı vizadır, elə deyilmi? Doğru yerdəsən, dostum! Çünki Norveç Şengen vizası ilə bağlı bilməli olduğunuz ən vacib şeyləri qeyd etmək üzrəyəm. İlk öncə çox güman ki, ürəyinizdə olan bir sualı qeyd etmək istəyirəm: Şengen vizası ilə Norveçə gedə bilərəm? Buna cavab alacaqsınız. Ancaq daha da əhəmiyyətlisi, Norveç vizasının necə alınması barədə bir ton məlumat əldə edəcəksiniz, məsələn rüsumu, işləmə müddəti və daha bir çox şey. Ancaq bütün vacib detallara keçməzdən əvvəl əsaslardan danışaq. Ümumiyyətlə, Norveç Şengen zonasının bir hissəsidir?

Şengen vizası ilə Norveçə gedə bilərəm?

Norveç Şengen zonasının bir hissəsidir? İcazə verin bu barədə bir az daha ətraflı məlumat verim. Şengen zonası ölkələri əsasən Avropa Birliyi dövlətləri ilə əlaqələndirilir, Norveç isə bunlardan biri deyil. Şengenin AB ilə eyni şey olmadığını bilmək lazımdır. Ancaq Norveç digər 16 ölkə ilə birlikdə Şengen müqaviləsində qeyd olunur. Budur belə bir suala gəlirik: Şengen vizası Norveç üçün keçərlidir? Bəli, bəli, bəli! Yəni bu növ vizanız varsa, əlavə viza almadan bu zonadakı bütün ölkələrə səyahət edə bilərsiniz.

Yaxşı xəbər: hər iki variantda işə yarayır. Norveç Şengen vizası ala və eyni səfərdə başqa bir ölkəni ziyarət edə bilərsiniz. Alternativ olaraq, başqa bir Şengen ölkəsini ziyarət edərkən Norveçi səyahət nöqtəsi olaraq qeyd edə bilərsiniz. Əlavə olaraq, hər hansı bir Şengen ölkəsinin vətəndaşısınızsa, eyni qaydalar sizin üçün də keçərlidir. Bu Skandinaviya cəvahiratına səyahət etmək üçün vizaya ehtiyacınız yoxdur və sərhəddi quru yolu ilə keçsəniz, çox güman ki, sənəd təqdim etməyiniz belə istənilməyəcək. İndi isə Norveç Şengen vizası tələbləri və bu çox istədiyiniz səyahət sənədini əldə etmə müddətində sizə kömək edəcək digər mövzular haqqında danışaq.

Norveç Şengen vizasına kimlər müraciət etməlidir?

Sadə cavab budur: dünya ölkələrinin təxminən yarısının vətəndaşları Norveçə turizm məqsədləri ilə bağlı vizasız səyahət edə bilər. Ancaq daha dərindən baxaq. Çünki səyahətinizin məqsədi fərqlidirsə, bir qədər əziyyət çəkməniz lazım olacaq.

Hər hansı bir Şengen ölkəsinin vətəndaşından Norveçə getmək üçün viza almaq tələb olunmur. Norveç Şengen vizası aşağıdakı məqsədlərə görə verilir:

• Turizm

• Biznes

• Qohumları və dostları ziyarət etmək

• Təhsil/ mübadilə proqramları/ yay məktəbləri

• Mədəni, elmi , beynəlxalq idman tədbirləri

Bu o deməkdir ki, Norveçdə işləmək üçün başqa bir viza növünə ehtiyacınız olacaq. Müraciət etməyinizin tələb olunub-olunmadığından əmin deyilsinizsə, “Norwegian Directorate of Immigration” qurumunun veb saytına nəzər yetirin. Və ya mövzu ilə bağlı dəqiq məlumat almaq üçün ən yaxın Norveç səfirliyi ilə əlaqə saxlayın.

Norveç vizası necə alınır?

Standart prosedurlar bilinəndir. Birinci növbədə sizin vəziyyətinizə uyğun Norveç Şengen vizası tələblərinin nə olduğunu bilməlisiniz. Əvvəlcə digər başlıqda qeyd etdiyimiz veb sayta nəzər yetirin. Çox istifadəçi dostudur və lazımlı məlumatların əksəriyyətini əldə etmək üçün yalnız vətəndaşlıq statusunuzu daxil etməlisiniz. Bu, kifayət deyilsə və ya veb sayt sizə qarışıq görünürsə, yaşadığınız ölkədə hansı Norveç diplomatik nümayəndəliyinin viza verdiyini tapın. Onlarla əlaqə qurmaq bütün sənədləşmə prosesi ilə bağlı ən dəqiq məlumatları almaq üçün ən ağıllı fikirdir.

Tələblərin nə olduğunu öyrənən kimi, lazımi sənədləri hazırlayın və onları viza müraciət mərkəzinə, səfirliyə və ya yaşadığınız yerdə bu prosesi həyata keçirən digər bir quruma təqdim edin. Viza rüsumu onlayn müraciət zamanı ödənilir. Bütün sənədlər təqdim edildikdən sonra onların qərarlarını bildirmələrini gözləməyiniz kifayətdir.

Norveç Şengen vizası tələbləri nələrdir?

Zəhmət olmasa səyahətinizin məqsədindən asılı olaraq tələblərin fərqli ola biləcəyini nəzərə alın. Buna baxmayaraq, aşağıda sizə Norveç Şengen vizası müraciətində göstərməli olduğunuz məlumat / sənədlərin nümunə siyahısı verilmişdir. Qeyd edilənlər turizmlə əlaqəli səyahətlər üçün xüsusi tələblərdir.

• Müraciət portalında müraciətinizi həyata keçirdikdən sonra email vasitəsi ilə qəbul edilən imzalanmış məktub

• İki pasport tipli fotoşəkil

• Pasport (Şengen ərazisini tərk etdikdən sonra 3 ay müddətində qüvvədə olmalıdır) və əsas səhifənin surəti

• Əvvəlki bütün Şengen vizalarının surətləri

• Səyahət marşrutu - uçuş bileti rezervasiyası, səyahət sığortası, qonaqlama yeri bronları

• Mülki vəziyyətin sübutu (nikah şəhadətnaməsi, uşaqların doğum şəhadətnaməsi və s.)

• Maliyyə imkanlarının sübutu (təsdiq olunmuş bank çıxarışı)

• Peşəkar statusun təsdiqlənməsi (əmək müqaviləsi, universitetdən məktub və s.)

Qeyd etdiyim kimi, əlavə sənədlər tələb oluna bilər, ancaq müraciətinizdə nə qədər dəqiq olsanız, viza alma şansınız da o qədər çox olacaq. Soruşa bilərsiniz ki, niyə bu qədər çox tələb var? Cavab çox məntiqlidir. Ölkənin immiqrasiya xidmətləri yalnız qeyd etdiyiniz səbəblərdən səyahət etdiyinizə əmin olmaq istəyir. Əgər həqiqəti deyirsinizsə, qorxacağınız bir şey yoxdur.

Norveç viza rüsumu nə qədərdir?

Standart viza rüsumu 80 avrodur, lakin 6 ilə 12 yaş arası uşaqlar üçün qeyd edilən məbləğin yarısı olacaq. Əlavə olaraq, Avropa və bir sıra üçüncü dövlətlər arasıda imzalanmış Viza Asanlaşdırma müqaviləsinə əsasən bəzi ölkələrin vətəndaşları (məsələn, Rusiya və Azərbaycan) viza rüsumu olaraq 35 avro ödəyirlər. Viza müraciət mərkəzi (səfirlik deyil) vasitəsi ilə müraciət edirsinizsə, əlavə rüsumlar da ödəməli olacaqsınız.

Şagirdlərin, tələbələrin və ya təhsil/təlim məqsədli səfərlərdə onları müşayiət edən müəllimlərin, habelə Şengen ərazisinə elmi araşdırmalar aparmaq üçün daxil olan tədqiqatçıların ödəniş etməyə ehtiyac olmadığını bilmək lazımdır. Yalnız proseduru unutmayın: rüsumu portalda müraciətinizi daxil edərkən ödəməyiniz istənəcək. Daha sonra geri ödəmə üçün müraciət etməniz lazım olacaq.

Norveç Şengen vizasının proses müddəti nə qədərdir?

Viza statusunuzu bilmək üçün gözləmə müddəti çox uzun deyil, lakin əsasən bir neçə amildən asılıdır. Birinci növbədə milliyyətiniz. Daha sonra səyahətinizin məqsədi və Norveç Şengen vizası müraciətinizin keyfiyyəti. Sizdən istənilən hər şeyi təqdim etmisinizsə və əlavə məlumat tələb olunmursa, cavabı 5-15 gün ərzində biləcəksiniz.

Yeni səyahət perspektivləri barədə düşünmək hər zaman həyəcan vericidir. Çoxumuzun bir ildən çox müddətdir ki, səyahət etmədiyi bu dövrdə xüsusilə həyəcanlı ola bilər. Ən əsası isə niyə Norveç kimi heyranedici bir məkanı seçməyək? Qeyd etdiyim bütün məlumatların Norveç Şengen vizasına müraciət müddətində sizə kömək edəcəyini ümid edirəm. Əlbəttə ki, dağ elflərinin sehrli güclərinin sizə səyahət planlarınızda kömək etməsini diləyirəm! Uğurlar!

* Ən sonda qeyd etmək istəyirəm ki, koronavirus təhlükəsizlik tədbirləri səbəbi ilə beynəlxalq səyahətlərin hələ də məhdud olduğunu nəzərə alın. Covid sertifikatı tətbiq olunduqdan sonra Şengen dövlətləri arasında səyahətlər daha sərbəst hal alıb. Ancaq AB xaricindən gəlirsinizsə bu, bir qədər fərqli ola bilər. Əlavə olaraq, səyahət məhdudiyyətləri səbəbindən viza müraciət prosedurlarının bir qədər fərqlənə biləcəyini və bu məqalədəki bütün məlumatların standart prosedurlara əsasən yazıldığını vurğulamaq istəyirəm.