Osakada 12 İnstaqramlıq yer

Misilsiz mədəniyyət, ləzzətli mətbəx, arxitektura möcüzələri və daha bir çox şey milyonlarla insanı Yaponiyaya cəlb edir. Şübhəsiz ki, hamınız bu Asiya ölkəsinin adını həyatınızda bir neçə dəfə eşitmisiniz, lakin insanların çoxunun yalnız Tokio haqqında məlumata sahib olması da heç kimə sirr deyil. Biz bunu nəzərə alaraq Yaponiyanın başqa bir incisi - Osaka haqqında danışmağa qərar verdik. Bu bloqda Osakanın harada olduğunu, Osakada ediləcək şeyləri, görməli yerləri və daha çoxunu öyrənəcəksiniz.

Əvvəlcə şəhər barəsində əsas məlumatlara nəzər yetirək. Osaka haradadır? Osaka, Honşu adasının Kansay regionundadır. 2020-ci ilə aid məlumatlar göstərir ki, şəhərin əhalisi 3 milyona yaxındır və ümumi ərazi 223 kvadrat km-dir. Osaka nə ilə məşhurdur? Osaka elektronika, əczaçılıq, maşınqayırma, inşaat və s. kimi müxtəlif sənaye sahələrində populyardır. Bundan əlavə, şəhərdəki ləziz mətbəx və İnstaqramlıq yerlər yalnız Yaponiyada deyil, bütün dünyada məşhurdur.

Şəhərlə bağlı bir sıra əsas məlumatları öyrəndiyimizə görə, Osakada 12 İnstaqramlıq yer və ediləcək şeyləri öyrənmə vaxtı gəldi.

1. Sumiyoshi Taisha

Siyahımızdakı ilk İnstaqramlıq yer Sumiyoshi Taisha-dır. Yaponiyada 2300 Sumiyoshi ziyarətgahı var və bu onların əsasıdır. Hər il milyonlarla insan bu məbədi ziyarət edir. Bu ziyarətlər əsasən 1-3 yanvar tarixləri arasında yer alır, səbəbi isə bu dövrün ilin ənənəvi ilk məbəd ziyarəti olaraq bilinməsidir. Vətəndaşlar tanrılara dua etməyin sumoda, əkinçilikdə, “waka”-da, döyüş sənətlərində və s. uğur gətirdiyinə inanırlar. Məbəd ən qədim ibadətgah inşa metodu olan Sumiyoshi-zukuri memarlıq üslubunda inşa edilmişdir. Sumiyoshi Taisha-da hər il bir çox müxtəlif festival və mərasimlər keçirilir və hımin vaxt İnstaqram fotoları çəkmək üçün əla vaxtdır. Sumiyoshi Taisha haradadır? Ünvan: 2-9-89 Sumiyoshi, Sumiyoshi-Ku. Ziyarətgahın qapıları 06:00-17:00 arası qonaqlar üçün açıqdır.

2. Osaka qalasının donjonu

Şübhəsiz ki, Osakada ziyarət etmək üçün ən yaxşı yerlərdən biri də Osaka qalasıdır. Bu qalanın donjonu Osakanın simvoludur. Tarix boyunca donjon müxtəlif ordular tərəfindən məhv edildi. Tokuqava dövründə yenidən inşa edilsə də, 1665-ci ildə ildırım vurması onu yenidən məhv etmiş və Osaka 266 il boyunca simvolsuz qalmışdır. 1931-ci ildə Osaka Bələdiyyə Başçısı Hacime Seki yenidənqurma kampaniyası təşkil etdi. O gündən bəri, Osaka qalasının göz qamaşdıran qızıl ornamentli əsas qülləsi bir simvol halına gəldi. Bundan əlavə, hökumət buranı Milli Maddi Mədəni Mülkiyyət yeri kimi müəyyən etdi. Bu yer İnstaqramlıq şəkillər çəkmək üçün də çox əlverişlidir və onu da deyim ki, ziyarətçilərin əksəriyyəti 8-ci mərtəbədəki müşahidə göyərtəsində ən çox bəyənilən İnstagram fotolarını çəkirlər.

3. Osaka Şəhər Mərkəzi İctimai Salonu

Bu cəlbedici, qırmızı kərpicdən tikilmiş bina 1918-ci ildə inşa edilib və binanın dizaynerləri Shinichiro Okada və Kingo Tatsuno olub. Osaka Şəhər Mərkəzi İctimai Salonu (ing.: Osaka City Central Public Hall) həyəcan verici vaxt keçirmək üçün əla bir yerdir. Bu salonda bir çox konsert, mədəni, bədii və ictimai fəaliyyətlər təşkil edilir. Salon memari gözəlliyi ilə də ziyarətçiləri özünə cəlb edir. Binada 1918-ci ildən bəri yalnız bir dəfə, 2002-ci ildə bərpa işi aparılıb. Salonda nə etməli? Fəaliyyətlərə qatıla, turlarda iştirak edə və ya birinci mərtəbədə ləzzətli yeməklərdən dada bilərsiniz. Bundan əlavə, İnstaqrama layiq şəkillər çəkə bilərsiniz.

4. Şəhəri müşahidə etmək üçün çoxlu göydələn

Osakada İnstaqramda çox bəyəniləcək şəkli harada çəkmək olar? Əlbəttə ki, şəhərdə çoxlu İnstaqramlıq yer var, amma mən sizə maraqlı şəkillər çəkə biləcəyiniz üç göydələni qeyd etmək istərdim: Umeda Sky Building, Abeno Harukas Kintetsu Main Store və Cosmo Tower. Bu göydələnlər şəhərin nəfəs kəsən mənzərəsini izləməyə və heyranedici İnstaqramlıq fotolar çəkməyə imkan yaradacaqdır. Üstəlik, binaların içərisindəki restoranların, mağazaların və barların dadını çıxara bilərsiniz.

5. Osaka Təbiət Tarixi Muzeyi

Təbiətsevərlər üçün Osakada ediləcək ən yaxşı şeylərdən biri Osaka Təbiət Tarixi Muzeyini ziyarət etməkdir. Muzeydə çoxlu yenidən qurulmuş dinozavr, mastodon və s. skeletləri var. Bu muzeyin əsas məqsədi insan və təbiət arasındakı əlaqəni göstərmək və dünyanın əvvəlki sakinləri haqqında ətraflı məlumat verməkdir. Muzeydə gəzərkən özünüzü zamanda səyahətdə hiss edəcəksiniz. 9:30 - 17:00 arası (Yeni il tətilində açıq deyil) bu İnstaqramlıq məkanın qonağı ola bilərsiniz.

6. Minoh Park

Osakada unudulmaz vaxt keçirmək üçün getməli olduğunuz yerlərdən biri də milli parkdır. Milli park şəhərin mərkəzindən təxminən 28 km məsafədədir. Minoh parkdakı ən məşhur İnstaqramlıq yerlər meşə və Mino şəlaləsidir. Meşədə bir neçə dəqiqəlik gəzintidən sonra hündürlüyü 33, eni 5 metr olan möcüzə tapacaqsınız. Parkda 980-dən çox bitki və 3000 böcək növü var. Quasi-Milli Parkı hesab olunan Minoh-u ziyarət etmək üçün ən yaxşı vaxt nədir deyə soruşsanız, milli parkın hər fəsildə füsunkar olduğunu deyə bilərik. Payızın sonlarında rəngli yarpaqlar, qışda qarla örtülmüş ağaclar və yayda parlaq günlər sizin üçün ovsunlayıcı mənzərələr yaradacaqdır.

7. Hirakata Əyləncə Parkı

Osakada ailə ilə gediləcək yerlər arasında ən yaxşı seçim Hirakata parkıdır (ləqəbi Hirapahdır). Əyləncə parkı şəhərin mərkəzindən 20 km aralıda olduğundan, ətraf şəhər qədər səs-küylü deyil. Parkda ziyarətçilər üçün 40 attraksion var. Burada həm uşaqlar, həm böyüklər üçün, yəni hər kəs üçün fəaliyyət var, bu səbəblə də maraqlı vaxt keçirməyə hazır olun. Hirakatanın ən məşhur attraksionlarından biri uzunluğu 1300 metr olan və maksimum 70 km/saat sürətə sahib olan “Red Falcon”-dur. Ayrıca, mövsümdən mövsümə üzgüçülük hovuzları, buz meydançası və qartopu oynama sahələri tapa bilərsiniz.

8. Doto Pagoda

Osakanın növbəti ən İnstaqramlıq yeri - Doto paqodası. Bu paqodanın özünəməxsusluğu tikintidə istifadə olunan materialdan irəli gəlir. Belə ki, paqoda tamamilə torpaqdan hazırlanmışdır, piramida şəklindədir və üstü yoxdur. Bu, bütün Yaponiyada yeganədir. 1953-cü ildə hökumət onu Milli Tarixi Yer olaraq qeydiyyata alıb. Ətrafda bir çox arxeoloqlar tədqiqatlar aparmış, və müxtəlif şeylər tapmışlar.

9. Nakanoşima

Nakanoşima, 50 ha ərazini əhatə edən və Osakadakı mədəni, tarixi və biznes mərkəzləri kimi onlarla yeri bir araya gətirən adadır. Ada iki çay - Dojimagawa və Tosaborigawa arasında yerləşir. Ziyarət edə biləcəyiniz bəzi mədəni yerlər: Nakanoşima kitabxanası, Mərkəzi İctimai Salon, Osaka Universiteti Nakanoşima Mərkəzi və s. Ayrıca Nakanoşima sayəsində Osaka "ölkənin mətbəxi" adını qazandı, çünki keçmişdə düyü və digər məhsullar burada satılırdı.

10. Sakuya Konohana Kan

Osakada təbiətsevərlərin gəzməli olduğu yerlər hansılardır? Biz artıq bəzi yerləri qeyd etdik və haqqında danışmalı olduğumuz bir başqa yer Sakuya Konohana Kan-dır. Bu təbii gözəllik onu çiçək kimi göstərən 5000 şüşə paneldən hazırlanmışdır. Binanın içərisində 5500 müxtəlif növdən 15.000 bitki tapacaqsınız. Tələbələrdən giriş üçün ödəniş tələb olunmur, lakin böyüklər 5 ABŞ dolları civarında bir şey ödəməlidirlər.

11. Kongo dağı

Mount Kongo, peşəkar və həvəskar ziyarətçilərə bir çox dırmaşma təcrübəsi və yürüyüş marşrutları təqdim edir. Bölgəyə daxil olmaq və ətrafı kəşfə çıxmaq pulsuzdur, lakin müxtəlif turlarda iştirak etmək üçün bir az pul ödəməli olacaqsınız. Ən çox tərcih edilən dırmaşma marşrutları: Mt. Kongo Ropeway, Shakunage-no-mich və s. Bundan əlavə ərazidə gəzinti zamanı müxtəlif məbəd və ziyarətgahları görəcəksiniz. Mütəxəssislərə görə ən populyar dırmaşma marşrutu Temporinji məbədindən başlayır və dağ zirvəsindəki yayla bitir.

12. Shinsekai

İndi isə siyahımızdakı sonuncu yer olan Shinsekai-dən bəhs edək. Shinsekai, Tennoji parkının qərbində yerləşən kəşf edilməmiş bir məhəllədir. 20-ci əsrin əvvəllərində buradakı küçələrdə çoxlu rəngli restoranlar, marketlər açıldı. Əksəriyyəti indi işləməsə də, bəzi köhnə tipli restoran və kafeləri tapa bilərsiniz. Shinsekai-də gəzinti, 20-ci əsrə səyahətə bənzəyir.

Əlavə informasiya

Tokiodan Osakaya necə getmək olar? Bunun bir neçə yolu var, amma ən yaxşı üsul Şinkansen qatarıdır. Səfər təxminən 2-3 saat davam edəcək və tək tərəfli səfər üçün 130 dollar ödəyəcəksiniz. Bəs Osakada qonaqlama? Tövsiyə olunan otellərdən bəziəri: Hilton Osaka, Imperial Hotel Osaka, Intercontinental Hotel Osaka və s. Osaka otellərinin qiymətləri müxtəlif aralıqlarda dəyişir və hər şey sizin zövqünüzdən asılıdır.