Rusiyanın az tanınmış səyahət yerləri

Rusiya haradadır? Rusiya, Şərqi Avropa və Şimali Asiyanın geniş bir ərazisini əhatə edən ölkədir. Füsunkar dağlar, çimərliklər, səhralar, etnik kəndlər, gözoxşayan vulkanlar və buzlaqlar Rusiyanı dünyanın ən valehedici ölkələrindən birinə çevirir. Lakin bu yerlərin inkişafı və tanınması üçün büdcə çatışmazlığı səbəbi ilə Rusiyanın təbii gözəlliyi, hətta ruslar tərəfindən belə qiymətləndirilmir. Ancaq siz bu gün bu bloqda Rusiyanın az tanınan, lakin ən canalıcı gözəlliyə sahib yerləri ilə tanış olacaqsınız.

1. Qeyzerlər vadisi

Bu vadi yüz illər əvvəl aşkar edilmişdir. Kronotski Biosfer Qoruğunun içərisində yerləşən Qeyzerlər vadisi dünyanın ən böyük qeyzer yerlərindən biridir və Avrasiyada yeganədir. YUNESKO-nun Ümumdünya irsi siyahısına daxil edilmişdir. Bu ərazidə anormal dərəcədə yüksək biomüxtəliflik və yüksək iqlim kontrastı müşahidə edilmişdir. Hər yerdə palçıq hovuzları, isti bulaqlar, qeyzer püskürmələri və göllərlə rastlaşacağınız Qeyzerlər vadisi 2008-ci ildə Rusiyanın yeddi möcüzəsindən biri seçildi. Vadiyə səyahət etsəniz və bu təbii möcüzəyə şahid olsanız səbəbini başa düşəcəksiniz.

2. Seydozero gölü

189 metr yüksəklikdə olan Seydozero, Lovozero tundrasındakı Kola yarımadasının Murmansk bölgəsində yerləşir. Gölün uzunluğu təxminən 8 kilometrə, eni 1,5 - 2,5 kilometrə bərabərdir. Gölü üç tərəfdən əhatə edən dağlar onu küləkdən qoruyur, ancaq eyni zamanda bu xəzinəni dünyadan gizlədirlər. Rəvayətlərə əsasən, bu yer UNO, “Bigfoots” və s. kimi bir çox izahı olmayan hadisələrin şahidi olmuşdur. Miflərdən biri də Seydozero yaxınlığındakı Kuyvchorr qayasında müşahidə oluna bilən Kuyva haqqındadır. Kuyvanın onu narahat edənləri cəzalandırdığı barədə şayiələr var. Yerli sakinlər caninin yaşadığı dağı araşdırmaq istəyən bəzi insanların qəribə ölümlərini bununla izah edirlər. Qorxmayın, cəsarətli olun! Dünyada bənzəri olmayan bu mistik yeri kəşf etmək və sirlərini öyrənmək əvəzsiz bir təcrübə olacaq.

3. Darqavs

Tez-tez ölülər şəhəri adlandırılan Darqavs Rusiyanın ən mistik və sirli yerlərindən biri hesab olunur. Naməlum səbəblərdən keçmişdə yerli sakinlər öz qohumlarını burada dəfn edirdilər və elə bu səbəblə də ərazi məzarlarla doludur. Kənd haqqında bir çox əfsanə də var. Kənddə demək olar ki heç kim yaşamır. Yerli sakinlərin şəhəri, ölülərin qəbirdən çıxacağını düşündükləri üçün tərk etdiyinə dair fərziyyə də mövcuddur. Bəzi mənbələrə görə isə bölgə taun səbəbiylə tərk edilib.

4. Solovetski adaları

Rusiyanın şimalında yerləşən Ağ dənizi, qaranlıq və dərin suları səbəbi ilə sirli bir dünya adlandırsaq səhv etmərik. Kola yarımadası ilə əhatə olunmuş Ağ dənizin bir çox adası var. Bunlardan biri də Solovetski arxipellağıdır. Ada ilə bağlı ən həyəcanlandırıcı fakt, bir gecənin və bir gündüzün 6 ay çəkməsidir. Sizi təəccübləndirəcək bir fakt daha: bu əsrarəngiz adalarda qalma imkanınız var! Adanın sahibi olan monastır sizə iki günlük pulsuz qonaqlama təklif edir. Solovetski adaları ictimaiyyət tərəfindən Rusiyada YUNESKO tərəfindən qorunan ən vacib yerlərdən biri hesab olunur.

5. Lena dirəkləri

Sibirdə insanlar tərəfindən təsir göstərilməmiş bir çox görməli yer var. Bunlardan biri də Yakutiyanın Xanqalas ulusundakı Lena çayı sahilində, Pokrovskdan təxminən 104 km məsafədə yerləşən Lena dirəkləridir. Bu qayalar qədim geoloji proseslərin mükəmməl bir nəticəsidir və Lena Sütunları Milli Parkı 2 iyun 2012-ci ildə YUNESKO-nun Ümumdünya irsi siyahısına daxil edilmişdir. Milli park həmçinin nadir heyvan və bitki növlərinə də ev sahibliyi edir.

6. Baykal gölü

1642 metr dərinliyə sahib olan Baykal Yer üzündəki ən dərin göldür. Şərqi Sibirin cənubunda yerləşən tektonik mənşəli bu gölün təxminən 25 milyon il əvvəl əmələ gəldiyinə inanılır. Bölgə kiçik taxta evlərdə yaşamaq, Baykal gölünün sahilində şezlongda istirahət etmək və balıq ovu da daxil olmaqla turistlər üçün əla tətil imkanları təqdim edir. Baykal gölünün saf, təmiz suyu insanları öz sularına qərq olmağa çağırır. Üstəlik, 40 metr dərinlikdə daş fraqmentlər və müxtəlif obyektlər görə bilərsiniz. Gölün saflığı yazda - suyun göy rəngə çevrildiyi zaman daha çox nəzərə çarpır. Baykal gölündə 27 ada var. Olxon adası adaların içində ən turistik və ən böyük olandır. Rusiyaya səyahət etsəniz, dünyanın ən dərin gölünü ziyarət etməyi qəti şəkildə yaddan çıxartmayın.

7. Avaçi körfəzi

Avaçi körfəzi Kamçatka bölgəsinin əsas qapısıdır. 24 km uzunluqla dünyanın ən böyük körfəzlərindən biri olan Avaçi o qədər böyükdür ki, dünyadakı hər hansı bir gəmi bura sığışa bilir. Koryakski, Avaçinski və Vilyuçinski vulkanları körfəzdən müşahidə olunur. Körfəzin girişində dənizdən yüksələn üç bitişik qayaya Tri Brata adı verilib. Bu qayalar təbii xəzinə olaraq dəyərləndirilir və Avaçi buxtasının, həmçinin yaxınlıqdakı Petropavlovsk-Kamçatski şəhərinin simvoludur.

8. Kiji adası və Oneqa gölü

Şimal-qərbdə yerləşən Oneqa gölü Avropadakı ikinci ən böyük şirinsulu göldür. Göldə nərə, qızıl balıq, alabalıq, ağ balıq, yılan balığı və s. daxil olmaqla çoxlu balıq növləri yaşayır. Burada balıq tutmaq sizin üçün əla bir təcrübə olacaqdır. Oneqa gölünün əsas görməli yeri 15 və 20-ci əsrlərə aid taxta arxitektura əsasında inşa edilmiş 89 abidənin yerləşdiyi Kiji adasıdır. Ərazisində bir çox kilsəyə və başqa arxitektura möcüzələrinə rast gəlinən Kiji, YUNESKO-nun Ümumdünya irsi siyahısına daxil edilmişdir.

9. Stolbı Dövlət Təbiət Qoruğu

Şərqi Sayanın şimal-qərb hissəsində, Orta Sibir yaylası ilə həmsərhəd olan, Krasnoyarsk diyarı ərazisində yerləşən qoruq 1925-ci ildə mənzərəli syenit qalıq çıxıntıları - sütunları ətrafındakı təbii sistemi qorumaq istəyən yerli sakinlərin təşəbbüsü ilə qurulmuşdur. Qoruğun florasına təxminən 740 damarlı bitki və 260 növ yosun daxildir. Bununla yanaşı, Şərqi Sayanın mərkəzi dağlarına xas olan tayqa meşələri də ərazidə geniş yayılmışdır. Qoruq qayaya dırmaşma həvəskarları üçün ən yaxşı səyahət yerlərindən biridir. Gündüz və ya gecə gəzintiləri zamanı vulkanik sütunların təpəsindəki möhtəşəm mənzərələr sizi heyrətləndirəcəkdir.

10. Krasnodar diyarı

Krasnodar diyarı kurortları, çimərlikləri və qastronomik turizmi sevənlərə uyğun səyahət yerlərindən biridir. Bölgə şimaldan isti Azov dənizi, cənubdan Qara dənizlə həmsərhəddir. Azov dənizi çimərlikləri qumlu, Qara dəniz çimərlikləri isə çınqıllıdır. Siz burada su idmanlarının, suya dalışın və ya günəş vannasının dadını çıxara bilərsiniz. Krasnodar bölgəsi Matsestadakı məşhur mineral sular və Soçi yaxınlığındakı müalicəvi palçıq vannaları da daxil olmaqla Rusiyada ən yaxşı spa və müalicə kurortlarının təminatçısıdır. Bu ərazi həm də Soçidəki Axun dağı, Agura şəlalələri, Vorontsovka mağaraları da daxil olmaqla müxtəlif təbii turistik yerlər ilə zəngin olması səbəbindən aktiv insanlar üçün ideal tətil yeridir.