Almaniya ziyarətçi vizası üçün necə müraciət etmək olar?

"Hətta büdrəmən üçün yoluna qoyulmuş daşlardan belə gözəl bir şey tikə bilərsən." - məşhur yazıçı Göte. Bu, Almaniyadan sevdiyim sitatlardan biridir. Yeni və gözəl bir şey yaratmaq tamamilə özümüzdən asılıdır. Hər kəsin “ölməzdən əvvəl ediləcək işlər” siyahısı var. Sizin siyahınızda nə olduğunu bilmirəm, amma mənim siyahımdakı hədəflərdən biri Almaniyanı ziyarət etməkdir.

Almaniyaya ildə 38 milyondan çox insan səyahət edir. Bu rəqəm Almaniyanı dünyanın ən çox ziyarət edilən on ölkəsindən birinə çevirir. Yəqin ki, bu bloqu oxuyanların da Almaniyaya səyahət kimi arzuları var. Bunu nəzərə alaraq, Almaniya ziyarətçi vizası haqqında danışmağa qərar verdik. Bu bloqda bu kimi suallara cavab alacaqsınız: Almaniya ziyarətçi vizası üçün necə müraciət etməli? Almaniya ziyarətçi vizası tələbləri nələrdir? Almaniya ziyarətçi vizası rüsumu nə qədərdir?

Almaniya viza siyasəti

Vizasız ölkələrdən birinin vətəndaşı deyilsinizsə, Almaniya ziyarətçi vizası üçün müraciət etməli olacaqsınız. Alman vizalarını qalma müddətindən və ziyarətin məqsədindən asılı olaraq üç əsas kateqoriyaya bölə bilərik. Bu kateqoriyalar:

• Şengen vizası - Qisamüddətli viza

• Hava limanı tranzit vizası

• Milli viza - Uzunmüddətli viza

Şengen vizası 180 gün ərzində maksimum 90 gün müddətində qalmaq şərti ilə Almaniyaya səyahətə imkan verir. Qisamüddətli vizanın aşağıda göstərilən alt kateqoriyaları var:

• Almaniya Turist Vizası

• Almaniya Biznes / Konqres / Sərgi Ziyarət Vizası

• Almaniya Tibbi Müalicə Vizası

• Almaniya Mədəni, Elmi, İdman Tədbirləri Vizası

• Almaniya Ailə və DostlarI Ziyarət Vizası

• Həyat Yoldaşı / Aİ və ya Almaniya Vətəndaşlarının Qohumları üçün Viza

• Almaniya Təhsil (Şengen) Vizası

• Almaniya İş (Şengen) Vizası

Ölkədə 90 gündən çox qalmaq istəyən əcnəbilər milli viza üçün müraciət edə bilərlər. Ziyarətin məqsədindən asılı olaraq bu viza növünün də müxtəlif alt kateqoriyaları var:

• Almaniya İş Vizası və Blue Card

• Almaniya İş Axtarma Vizası

• Almaniya Şəxsi Sahibkar Vizası

• Almaniya Təhsil (Milli) Vizası

• Almaniya Ailə Birləşməsi Vizası

• Almaniya Tibbi Müalicə Vizası

• Almaniya Au Pair Vizası

Almaniya ziyarətçi vizası üçün necə müraciət etmək olar?

Almaniya ziyarətçi vizanızı almaq üçün bir neçə addımı tamamlamalısınız. Almaniya Şengen bölgəsi ölkəsi olduğu üçün müraciət prosesi digər ölkələrlə demək olar ki, eynidır. Viza müraciət mərhələləri aşağıdakı kimidir:

• Tələb olunan sənədlərin toplanılması

• Müsahibənin təyin edilməsi

• Viza haqqının ödənilməsi

• Müsahibədə iştirak

• Prosesin işlənməsini gözləmək

Almaniyada çox sayda turistik fəaliyyət var. Yerli mətbəx, gözəl və tarixi alman şəhərləri sizi heyran edəcəkdir. Almaniya ilə əlaqəli ən heyranedici şeylərdən biri qalalardır. Almaniyada 20000-dən çox qala var və keçmişə səyahət etmək arzusunda olanlar Almaniyanı ziyarət etməyi və bu qalalar ətrafında gəzməyi çox sevirlər. Bəs mənim nə qədər vaxtım olacaq? Vizanın etibarlılıq müddəti nə qədər davam edir? Viza 180 gün ərzində maksimum 90 gün etibarlı olur.

Ziyarətçi vizası üçün tələb olunan sənədlər

Əlbəttə ki, hər hansı bir ölkə üçün viza almağa qərar verdiyimiz zaman lazımi sənədləri toplamalı, onları təqdim etməli və müxtəlif tələblərə cavab verməliyik. Bütün müraciətçilərə tələb edilən sənədlər adlı yoxlama siyahısı hazırlamağı məsləhət görürük. Bunun vasitəsilə müraciətinizi planlaşdıra və tələb olunan bütün sənədlərə sahib olduğunuzdan əmin ola bilərsiniz.

• Almaniya ziyarətçi vizası üçün müraciət forması. Müraciətçilər formanı ingilis və ya alman dillərində tam doldurmalı, imza atmalı və tarix yazmalıdırlar (yetkinlik yaşına çatmayanlar üçün valideynlər imza atmalıdırlar).

• Pasport. Ən azı iki boş səhifəyə və Şengen ərazisini tərk etdikdən sonra ən azı 3 ay etibarlılığa sahib olmalıdır. Son 10 il ərzində verilmiş əsas səyahət sənədi sahibi tərəfindən imzalanmalıdır.

• İki şəkil. Şəkillər 6 ay ərzində çəkilmiş olmalıdır. Üzün ön hissəsi fotonun 70-80%-ni əhatə etməlidir. Ağ rəngli arxa fon, aydın üz quruluşu və gözlər də tələblər arasındadır.

• Şəxsiyyət vəsiqəsinin surəti. Almaniyadan ayrılma tarixindən sonra ən azı üç ay müddətində etibarlı olmalıdır.

• Yaşayış icazəsi / vizanın surəti. Şəxsiyyət vəsiqəsində olduğu kimi, etibarlılıq müddəti Almaniyadan ayrılma tarixindən sonra ən azı üç ay olmalıdır (müraciət edən şəxsin yaşadığı ölkə və vətəndaşlığı fərqlidirsə).

• Surətlər. Pasportunuzun ana səhifəsinin, əvvəlki Şengen vizalarının və gediləcək son ölkənin vizasının (əgər varsa) surəti.

• Səyahət marşrutu. Vizaya müraciət edən şəxslər uçuş biletləri və qonaqlama yeri bronları barədə dəlil təqdim etməlidirlər.

• Yerli işəgötürəndən və ya sponsordan məktub. Müraciətçilər yerli işəgötürəndən də məktub təqdim etməlidirlər.Məktubda işəgötürənin və ya şirkətin məlumatları (adı, poçt ünvanı və telefon nömrəsi) qeyd edilməlidir. Şəxs şirkətin sahibidirsə, etibarlı ticarət lisenziyasının surəti, şirkətin şəxsə aid olduğunu göstərən digər sənədlər təqdim edilməlidir.

• Maddi imkanların sübutu. İnsanlar kirayə, yemək, nəqliyyat xərclərini ödəmək üçün kifayəq qədər vəsaitə sahib olmalıdırlar. Müraciət edənlər maddi imkanlarını sübut etmək üçün bu kimi sənədləri təqdi edə bilərlər: müraciətdən əvvəl ən azı son 3 ayın bank hesabından çıxarışı, şəxsi əmlak, aktivlər və s.

• Səyahət/Tibbi sığorta. Vizanın etibarlılıq müddəti boyunca keçərli olmalıdır (bütün Şengen ölkələri üçün) və ən azı 30.000 avro (kredit kartları ilə sığorta qəbul edilmir) dəyərində xərcləri əhatə etməlidir

• Uşaqlar üçün sənədlər. Ərizəçi uşaqları ilə səyahət edərsə, onlarla əlaqəli bir neçə sənəd təqdim etməlidir.

Almaniya ziyarətçi vizası rüsumu

Lazımi sənədləri təqdim etdikdən sonra, növbəti addım rüsumun ödənilməsidir. Şengen vizaları üçün rüsum 2 Fevral 2020-ci ildən bəri 80 avrodur. Müraciətçilər viza müraciət mərkəzi haqqı, kuryer xidməti haqqı və s. kimi əlavə rüsumlar da ödəməli ola bilərlər (sənədlərin təqdim olunduğu ölkədən və yerdən asılı olaraq) . Rüsum hər kəs üçün eynidirmi? Xeyr, AB ilə bu ölkələr arasında imzalanmış müqaviləyə əsasən, onların vətəndaşları viza üçün 35 avro ödəyir:

• Albaniya

• Azərbaycan

• Bosniya və Herseqovina

• Ermənistan

• Gürcüstan

• Kosovo

• Moldova

• Monteneqro

• Rusiya

• Serbiya

• Şimali Makedoniya

• Ukrayna

Viza rüsumundan azad olan şəxslər

Yuxarıda göstərilən ölkələrdən başqa, bəzi kateqoriyalara aid olan şəxslər viza rüsumundan tamamilə azaddırlar. Eyni qayda bütün Şengen ölkələrinə aiddir.

• Avropa İcmasının daxilində Avropa Parlamenti və Avropa Şurasının “2005/761/EC Recommendation” tövsiyəsində müəyyən edilmiş qaydada elmi araşdırmalar aparmaq məqsədi ilə səyahət edən digər ölkələrin tədqiqatçıları

• Təhsil və ya təlim məqsədi ilə səyahət etmək istəyən məktəb şagirdləri, universitet tələbələri, magistrant yaxud doktorantlar, müşayiətçi müəllim heyəti

• Qeyri-hökümət təşkilatlarının təşkil etdiyi seminar, konfrans, idman, mədəni və ya təhsil tədbirlərinə qatılan qeyri-hökumət təşkilatlarının nümayəndələri (25 yaş və daha kiçik)

• Alman vətəndaşlarının həyat yoldaşları, eynicinsli partnyorları və azyaşlı uşaqları

• Yetkinlik yaşına çatmayan alman vətəndaşlarının valideynləri

• AB / AİB vətəndaşlarının ailə üzvləri

• Altı yaşdan kiçik uşaqlar

• Boş səhifəsi olmayan xarici pasportdakı köhnə, etibarlı vizanı, yeni və eyni müddət üçün etibarlı olan viza ilə “əvəzləmək” üçün üçün səyahət edənlər

Viza müraciətinə baxılma müddəti

Qeyd etmək istədiyim növbəti mərhələ proses müddətidir. Bütün sənədləri təqdim etdikdən, rüsumu ödədikdən və müsahibədə iştirak etdikdən sonra vizaya baxılma müddətini gözləyəcəksiniz. Bu nə qədər vaxt alır? Viza üçün ortalama proses müddəti təxminən 15 təqvim günüdür. Viza müraciətinizi altı aydan tez etməməli olduğunuzu unutmayın.

Vizadan imtina səbəbləri

Müraciətçilərin Şengen viza müraciəti müddətində diqqətli olmaları lazımdır. Hər il minlərlə insan Şengen vizası üçün müraciət edir. Hamısının müsbət cavab almadığını təxmin etmək çətin deyil. Almaniya ziyarətçi vizası üçün müraciət etdikdən sonra imtina cavabı alan bir çox insanlar var. Bəs bunun səbəbi nədir? Vizadan imtina alınmasının müxtəlif səbəbləri ola bilər:

• Maddi imkanlar. Müraciətçi şəxslər istər Almaniyaya, istərsə də hər hansı bir Şengen ölkəsinə səfərlərini maliyyələşdirmək üçün kifayət qədər imkanlara sahib olmalıdırlar.

• Məhkumluq. Cinayət arxivinə sahib şəxslərin viza müraciətindən sonra yaxşı cavab almaq şansları azdır.

• Yanlış və ya əksik sənədlər. Tələb olunan sənədlərin hər birini təqdim edin və müracıət zamanı səhv məlumat verməməyə çalışın.

• Pasportun tələb edilən etibarlılıq müddətinə sahib olmaması.

• Daha öncə 180 gün ərzində 90 gündən çox qalmaq.

Harada müraciət edə bilərəm?

Namizədlər viza müraciətlərini yaşadıqları ölkədəki viza müraciətlərindən məsul olan viza müraciət mərkəzlərində, səfirliklərdə və ya konsulluqlarda edə bilərlər. Bunlardan heç biri ölkənizdə yoxdursa, yaşadığınız ölkəyə ən yaxın səfirliyə və ya konsulluğa müraciət etməlisiniz.

Ümid edirəm ki, bu bloqda oxuduğunuz məlumatlar viza müraciət müddətində köməyinizə çatacaq. Qaydalara əməl edin və bütün tələblərə cavab verməyə çalışın.