Kürasaoya səyahətdən əvvəl bilsəydim dediyim 10 şey

Kürasao Karib dənizində yerləşən və Cənubi Antil adalarını əmələ gətirən adadır. 10 oktyabr 2010-cu ildən bəri, Kürasao Niderland Krallığı içərisində müstəqil bir ölkədir. Kürasao ilə əlaqəli maraqlı faktlardan biri odur ki, Niderland dili ölkənin rəsmi dildir, dövlət başçısı kraldır və adada kifayət qədər böyük Niderland icması yaşayır. Kürasaoya səyahət edən turistlər ölkənin əsas gəlir mənbəyi olan turizmə təkan verdilər. Turistlər buraya əsasən xoş atmosfer və tropik iqlim səbəbi ilə gəlir. Ölkədəki temperatur gecə belə 22-23 dərəcədən (C) aşağı düşmür.

Kürasaoya səyahət etmək üçün bir çox səbəb var. Kiçik bir ada olmasına baxmayaraq burada istirahət etmək imkanınızın olduğu bir neçə yer var. Həm də onlar bir-birindən tamamilə fərqlənirlər. Seçiminiz nəyi istədiyinizdən asılıdır. Kürasaoya səyahət təhlükəsizdirmi? Bəli, tamamilə təhlükəsizdir. Coğrafi mövqeyinə görə isə, ilin istənilən vaxtı Kürasoya səyahət etmək üçün ideal vaxtdır. Əlbəttə, istisnalar da var. Həm bu barədə, həm də daha çoxunu bu bloqu sona qədər oxuyaraq öyrənə bilərsiniz. Elə isə başlayaq.

1. Kürasaoya səyahət

Adanın coğrafi yeri ziyarətçilərinə asan səyahət imkanı verir. Kürasao Beynəlxalq Hava Limanına kifayət qədər çox beynəlxalq uçuşlar var. Ayrıca, adaya səyahət etmək üçün kruiz səfərinə də çıxa bilərsiniz ki, bu seçim daha cəlbedici və xoşdur.

2. Kürasaoya səyahət etmək üçün ən yaxşı vaxt

Çimərlikləri sevirsiniz? Ekvatorda yerləşdiyinə görə Kürasao bütün il boyu çimərlik tətili üçün ideal yerdir. Dəniz, çimərlik və hovuz ilə günəşli bir tətil... Günəş işığının düşdüyü saatların sayı gündə orta hesabla səkkiz-doqquz saatdır. Buna görə də səyahət etmək üçün ən yaxşı ay və ya dövr yoxdur. İdeal səyahət vaxtının müəyyənləşdirilməsi şəxsi seçiminizdən asılıdır. Kürasaoda ən çox turist axını dekabrdan aprelə qədər müşahidə edilir. Görünür ki, bir çox insan soyuq qış aylarından qaçmaq üçün Kürasaoya səyahət edir.

3. Kürasaoda qonaqlama üçün ən yaxşı yerlər

Siz həm paytaxt Villemştadda, həm də adanın digər yerlərində müxtəlif qonaqlama yerləri tapa bilərsiniz. Ölkədəki ən məşhur kurortlar Papagayo Beach Resort və Livingstone Jan Thiel Resort-dur. Eyni zamanda hər iki kurort genişliyinə görə uşaqlar üçün əlverişlidir. Əgər yalnız böyüklər üçün olan otellərə üstünlük verirsinizsə, Papagayo Beach Hotel və ya Casa Amalia-ya gedə bilərsiniz. Bundan əlavə, Mambo Beach ətrafında da otellər var. Tanınmış olanlara misal olaraq, Lionsdive Beach Resort və Kontiki Beach Resort-u göstərə bilərik.

4. Kürasao çimərlikləri

Jan Thielbaai Kürasaonun cənub-şərqində, paytaxt Villemştaddan təxminən 15 dəqiqəlik məsafədədir. Burada süni çimərlik yerləşir. Jan Thielbaaidəki kurortlardan birində qalmaqla çimərliyi pulsuz gəzə bilərsiniz. Əgər orada qalmırsınızsa, giriş haqqını ziyarətinizdən əvvəl ödəməlisiniz. Mambo çimərliyi partilər üçün üz tutulan yerdir. Maraqlı fakt: Mambo çimərliyi rəsmi olaraq Seaquarium Beach adlanır. Mambo adı əvvəllər burada məşhur olmuş Mambo çimərlik klubu ilə bağlıdır. Kürasaodakı bu yer əyləncəli faəliyyətlərinə görə daha çox gəncləri cəlb edir. Xüsusilə həftə sonları və tətillərdə olduqca sıxlıq müşahidə olunur.

5. Kürasaonun paytaxtı

Kürasaonun paytaxtı Villemştad küçə sənəti ilə zəngindir. Rəngarəng Punda, Otrabanda və ya Sharloo bölgələrinin küçələrində itməkdən daha yaxşı bir şey yoxdur. İnstaqramlıq şəhər! Villemştad və ətrafında qalmaq üçün çoxlu otel də tapa bilərsiniz. Sint Anna körfəzi, şəhər mərkəzini Punda və Otrobanda bölgələrinə bölür və bu məhəllələri məşhur ponton körpüsü - Kraliça Emma körpüsü birləşdirir. Villemştad Handelskade-dakı rəngarəng binaları ilə də məşhurdur. Şəhərdə Niderland müstəmləkə memarlıq üslubu ilə məşhur olan "Fort Amsterdam" və "Curacao Maritime Museum" kimi bir çox görməli yer var. Kürasaoya səyahət zamanı bu şəhəri ziyarət etmək mütləqdir.

6. Kürasao xalqı və mədəniyyəti

Kürasao 150.000-dən çox insana ev sahibliyi edir. Bəzən adada yerli sakinlərdən daha çox sayda turist olur. Kürasao əhalisi 55-dən çox etnik qrupdan ibarətdir. Hər bir millət, öz mədəniyyətini və ənənələrini yaşadır ki, bu da Kürasaonu dünyanın hər yerindən insanlar üçün maraqlı edir. Ölkədəki tədbirləri də qeyd etmək lazımdır. Kürasaoda karnaval demək olar ki, iki ay boyunca davam edir və son həftəsi tədbirin vurğusu hesab edilir.

7. Kürasaodakı görməli yerlər

Plantation Houses

Plantasiya sahələrinin keçmiş sahibləri əsasən əkinçilik, heyvandarlıq və ya gəmilərin təmiri ilə məşğul olur və təpələrin üzərində Niderland üslublu evlər tikirdilər. Bu evlər sahiblərinə və onların ailəsinə məxsusdur. Evi təpədə tikməyin səbəbi həm özlərinin, həm də qonşularının əkin sahələrinə yaxşı nəzarət edə bilmələridir.

Kura Hulanda Museum

Otrobanda bölgəsində yerləşən bu antropologiya muzeyi əsasən əhalinin mənşəyi, Afrika kölə ticarəti, qızıl və Antil incəsənəti üzərinə fokuslanıb.

Ostrich Farm

Bu yerdə siz çox gözəl dəvəquşuları görə bilərsiniz. Onları sadəcə izləyə və ya cəsarətlisinizsə, yemləyə də bilərsiniz.

8. Kürasaoya səyahətdə ediləcəklər

Mətbəx

Ürəyə gedən yolun mədədən keçdiyini söyləyirlər və əgər bu doğrudursa, insanın Kürasao mətbəxinə aşiq olmama ehtimalı yoxdur. Dadlı və ləzzətli şirniyyatları və "stew"-ə əlavə olaraq ada xırtıldayan təzə balıqları ilə məşhurdur. Yemək üçün ən yeni yer balıqların dənizdən birbaşa sizin boşqabınıza gəldiyi De Visserij-dir. Qiyməti kiloqramıdan asılıdı. Balığın yanına bir də salat əlavə edin və həyatın dadını çıxarın.

Yelkənçilik

Şəhəri fərqli perspektivlərdən kəşf etmək üçün yelkənli gəmiyə minərək Kürasaonu səyahətə çıxa bilərsiniz. Kürasaodakı dəniz qədər gözəldir ki: dərin, şəffaf və mavi su, mərcanlar, dəniz canlıları...

Digər fəaliyyətlər

Kürasao gündən-günə inkişaf edir və daha turistik bir yerə çevrilir. Odur ki siz adada hər cür əyləncə növü tapa bilərsiniz. Məsələn, Number Ten-də fantastik bir branç yeyə, yoga dərsləri ala və ya bağçadakı sənət əsərlərinə göz gəzdirərkən başqa bir sənətsevərlə yaradıcılıqdan danışa bilərsiniz.

9. Kürasao ilə bağlı maraqlı faktlar

İquanalar

Əgər şanslısınızsa, iquanaları olduqca yaxından görə biləcərsiniz. İquanalar çimərlikdə və ya Kürasao küçələrində gəzirlər. Jaanchie Restaurant-da isə milli yemək "stew"-i iquana ilə bişirməyə cəsarət edirlər.

Peyvəndlər

Kürasaoya səyahət üçün müxtəlif peyvəndlərə ehtiyacınız yoxdur, lakin könüllü olaraq bəzi vaksinləri etdirməyiniz yaxşı olar. Həmçinin Kürasaonun daimi sakinləri olan ağcaqanadlara qarşı tədbir almanızı da məsləhət görürük.

10. Kürasaoya səyahət etmək təhlükəsizdirmi?

Ümumiyyətlə, Kürasao təhlükəsiz bir adadır. Kürasaoda ən çox yayılmış cinayət növü oğurluqdur. Qiymətli əşyalarınızı özünüzlə götürməməklə və ya özünüzlə apardığınız təqdirdə göstərməməklə bundan asanlıqla qaçınmaq olar. Bəzək əşyalarınızdan, telefonunuzdan və pulqabınızdan ehtiyatlı olun! Kürasaoda haraya səyahət etmənizdən də çox şey asılıdır. Adanın yaxşı və daha az yaxşı hissələrini özünüz üçün qeyd edin. Məsələn, Villemştadda bir qədər qorxulu olan yoxsul ərazilər var. Koraal Specht bölgəsində isə, "No Limit Soldiers" adlı kriminal dəstənin bir çox üzvü yaşayır. Bu ərazidən mümkün olduqca uzaq durmaq məsləhətdir.