Niyə hava limanına su gətirə bilmərəm?

Buludların arasında uçmaq, nəhəng binaları yuxarıdan izləmək, qısa müddətdə getmək istədiyiniz yerə çatmaq... Təyyarə ilə səyahət etmək həqiqətən çox gözəl bir təcrübədir. Bəzi qaydalar, məsələn müəyyən əşyaların daşınmasına icazə verilməməsi, bu təcrübəni təhlükəsiz edir. Beynəlxalq qaydalara əsasən qoyulan bu qadağalar fərqli ölkələrə və hava yollarına görə dəyişə bilər. Hava limanında yoxlanış zamanı ölkənin və ya aviaşirkətin qaydalarına uyğun olmayan əşyalarınız varsa, onları baqajınızdan çıxarırlar.

Baqajınızda və ya əl çantanızda daşınmasına icazə olmayan bəzi əşyalarınız varsa, ya əşyalarınızla, ya da təyyarə ilə sağollaşmalı olacaqsınız. Ayrılıq hər zaman çətindir və bu səbəblə biz təyyarə ilə səyahət zamanı əl yüklərində daşınması qadağan olunmuş əşyaları bilməyinizi istədik:

• Kəsici və ya iti əşyalar

• Ülgüc bıçaqları

• Cib bıçağı, qayçı, neştər

• Toxuma iynələri, mil

• İynə və şpris

• Mətbəx bıçağı, tirbuşon

• Sivri çətir

• Qida və içkilər

Bəs göyərtəyə yemək götürmək olar? Bəli, siz özünüzlə kek, vafli və peçenye kimi məzələr götürə bilərsiniz. Duty-free mağazalarından alınmayan alkoqol və digər mayelər (100 ml-dən çox) isə qadağandır.

Təyyarədə baqaj qaydaları nədir?

Təyyarədə əl baqajında daşınması ​​qadağan olunmuş bəzi şeyləri gördük. Bəs yaxşı, təyyarənin baqajına rahatca hər şeyi qoya bilərsinizmi? Xeyr, lakin buradakı limitlər daha azdır. Baqajda fişənglər, əl bombaları, Benqal fişəngi, turşular, qələvilər, sıxılmış qazlar, hər cür partlayıcı-yanıcı maddələr qadağandır.

Gəlin hava limanının içkilərlə bağlı, xüsusilə də mayelərlə bağlı qaydalarına diqqət edək.

Heç olubmu ki, kiminsə bütün maye qaydalarını pozduğuna görə uzun müddət hava limanında qalmısınız? Bir şüşə su və ya sevdiyiniz ətir nə qədər təhlükəli ola bilər? Nəyə görə hava limanına su aparmaq olmaz? Hava limanına hansı miqdarda maye gətirə bilərsiniz?

Bunun kabinədəki təzyiqlə əlaqəsi varmı? Bu mayelər bir şəkildə təyyarənin naviqasiya sisteminə zərər vura bilərmi? Təyyarə ilə səyahət zamanı sizdən cib telefonlarınızı təyyarə rejiminə qoymağınızı xahiş edirlər - bəlkə onların ikisi arasında bir əlaqə var?

Biz həqiqətən də fərqli bir zamanda yaşayırıq və istər inanın, istər inanmayın, ancaq bəzi insanlar su qablarına, hətta diş pastasının içinə partlayıcı qoyurlar! Hava limanında "maye, sprey və jel" kimi qaydalar da bu səbəblə tətbiq edilir.

Lakin ola bilər ki, hava limanları və ya hava yollarının öz xüsusi qaydaları olsun. Məsələn, xatırlayırsınızsa, 2016-cı ildə əksər hava yolları potensial partlayıcı ola bilən Samsung Galaxy Note 7 mobil telefonlarının təyyarələrə qəbulunu qadağan etdi!

100 ml qaydası

Rüsumsuz mağazalardan aldığınız mayeləri möhürlənmiş çantalarında və hesab-fakturaları ilə birgə özünüzlə apara bilərsiniz. Bununla birlikdə, Avropa Birliyi ölkələrinə və ya ABŞ-a əlaqəli uçuşlarda kilidli çantalarda olsalar belə, mayelərin daşınması qadağan edilə bilər. Yoğurt, puding və qaymaq kimi qida məhsullarına 100 ml-ə qədər icazə verilir.

Əl yükündə Duty-free malların daşınması ilə bağlı

Hava limanının ərazisində Duty-free mağazalarından alınan içkilər də daxil olmaqla, bu əşyaları əl çantanızda gəzdirə bilərsiniz. Satın alınan mallar qəbz əlavə edilmiş qaydada qablaşdırılmalıdır.

Duty-free şüşələrinin yalnız bir dəfə daşına biləcəyini də unutmayın. Əgər tranzit uçuş edirsinizsə və növbəti hava limanında yenidən nəzarət məntəqəsindən keçəcəksinizsə, "xarici" Duty-free-dən olan mayelər əksər hallarda sizdən alınacaqdır.

Hava limanına hansı miqdarda su gətirmənizə icazə verilir? Hava limanı təhlükəsizlik qaydalarına görə su şüşələrindən istifadə etməkdə sərbəst deyilik. Hər kəsin riayət etməsi gərəkən bəzi ciddi qaydalar var. Ətir və dezodorantları 20 × 20 ölçülü şəffaf paketə yığa bilsəniz, özünüzlə götürə bilərsiniz. Kabinəyə aparmaq istədiyiniz mayelər üçün nəzərə alın: Ümumilikdə 1 litri aşmamaq şərti ilə hər biri maksimum 100 mllik qablarda, ağzı möhürlənmiş şəffaf torbalarda olmalıdır.

Əl çantanızda həcmi 100 ml-dən çox olmayan qablarda maye, jel və sprey barındıra bilərsiniz. Belə ki, özünüzlə bir şüşə şampun götürə bilməzsiniz, ancaq onu kiçik səyahət qablarında apara bilərsiniz.

Bundan başqa, diş pastası, günəşdən qoruyucu krem, dezodorant, kremlər və s. də 100 ml qaydasına riayət olunması gərəkənlərdir.

Uşaqların yeməyinə gəldikdə, kiçik bir körpənin (əsasən 2 yaşa qədər) ehtiyac duyduğu qədər qida və ya yemək götürə bilərsiniz. İki yaşdan yuxarı uşaqlar üçün isə nəzarət məntəqəsində hava limanı mühafizəçiləri istisnanı sənədləşdirməyinizi və ya dərmanı/yeməyi/mayeni dadmanızı istəyə bilər.

Məhdudiyyətlərə nələr daxildir?

Hamısını bir araya gətirsək, belə bir siyahı düzəldə bilərik:

• Su, sirop, içki daxil olmaqla hər hansı bir maye

• Kremlər, losyonlar, yağlar (kosmetik yağlar daxil olmaqla), ətirlər, tuş da daxil olmaqla hər cür makiyaj məhsulları (qatı dodaq boyaları xaricində)

• Təraş köpükləri, dezodorantlar

• Diş pastası daxil olmaqla hər cür məcunlar

• Cem, bal, qatıq, bəkməz və tomat pastası kimi qatı olmayan qidalar

• Kontakt linza mayeləri

• Şampunlar

• Yuxarıda sadalananlara oxşar digər maddələr.

Təyyarədə dərman aparmaq qadağandır? 100 ml-ə qədər, xeyr. Dərman sərnişinin şəxsiyyətini göstərən reseptlə və ya istifadəsinin vacib olduğunu göstərən tibbi report/sənədlə birgə, orjinal qablaşmada daşınmalıdır. Hər hansı bir dərman qəbul edirsinizsə, həkiminizdən bununla bağlı arayış almalısınız.

Bəs 100 ml qaydasının səbəbi nədir? 100 ml qaydası Avropa hava limanlarında 15 ilə yaxındır ki, qüvvədədir. Bu qayda Avropada, Britaniya hava limanlarından birində baş verən hadisədən sonra ortaya çıxdı. Belə ki, bu zaman polis maye bomba daşıyan bir qrup cinayətkarı saxladı. Bu hadisədən sonra mayelərlə bağlı qaydalara xüsusilə nəzarət olunmağa başlanıldı. Hava limanı işçiləri hələ də çox təhlükəli maddələr ilə məişət mayelərini və dərmanları ayırd edə bilmirlər. Ancaq hal-hazırda bəzi ABŞ hava limanları yeni skanerləri sınaqdan keçirir, ümid edək ki, tezliklə bu problem həll olunacaq və uçuşlar daha rahat hala gələcək.

Təbii ki, təyyarədə hər cür silahın, partlayıcı-yanıcı məhsulların daşınması qəti şəkildə qadağandır. Bəs alışqan necə? Kabinə baqajınızda yalnız bir ədəd olmaqla, alışqan daşımanıza icazə verilir.

Çantanızda hər hansı bir qadağan edilmiş əşya varsa nəzarət məntəqəsinə getməzdən əvvəl onları ya hava limanına müşayiət edən şəxsə verə, ya da park etdiyiniz avtomobilə qoya bilərsiniz.

Ancaq məsələn, əşyanın sizin üçün mənəvi dəyəri varsa, hava limanının təhlükəsizlik işçilərinə vəziyyəti izah edin. Yəqin ki, həmin əşyanı saxlamağın bir yolu var. Müsadirə olunan əşyalar sahiblərinə qaytarılıncaya qədər hava limanında saxlanılır. Bu əşyanı götümək hüququ verən sənəd almanız, əşyanıza qovuşmanız üçün kifayətdir.

Artıq siz niyə hava limanına su aparmağın mümkün olmadığını və niyə mayelərə müəyyən limitin qoyulduğunu bilirsiniz. Bütün bu hava limanı qaydalarından sonra, indi də hava limanından ala biləcəyiniz hədiyyələrdən danışaq. Əgər sevdiklərinizə getdiyiniz ölkədən hədiyyə almağı unutmusunuzsa, onlara hava limanından ətir, şokolad, kitablar, elektron cihazlar, soyuducu maqnitləri, yerli ləzzətlər, bir şüşə içki, uşaqlar üçün maraqlı oyuncaqlar və s. ala bilərsiniz. Üstəlik, bunları vergisiz, yəni daha münasib qiymətlərlə alacaqsınız!