Sent-Katarinsə səyahət etməyiniz üçün 10 səbəb

Minlərlə insan Kanadada yaşamaq xəyalları qurur və hər il 22 milyondan çox insan Kanadaya səyahət edir. Ölkə yüksək yaşayış standartlarına, iş imkanlarına, gözəl təbiətinə, görməli yerlərinə və daha çox şeyə görə səyahətçiləri və miqrantları cəlb edir. Biz də bu bloqda Kanadanın Sent-Katarins şəhərinə getməyiniz üçün on səbəb sadalamaq və həm Kanada, həm də şəhərlə bağlı müxtəlif suallarınıza cavab vermək istəyirik.

1.  Sent-Katarins kafedralı

Birinci növbədə qed etməliyik ki, Sent-Katarins, Kanadada səyahət etmək üçün ən yaxşı şəhərlərdən biridir və Ontario əyalətinin Niaqara bölgəsinin ən böyük şəhəridir (96.13 kvadrat kilometr). Şəhərdə bir çox kilsə var və Sent-Katarins kafedralı ən çox ziyarət edilənlərdən biridir. Kafedralın cəlbedici daxili və xarici dizaynı var. Xüsusilə müqəddəs yerin içərisindəki rəsm və illüstrasiyalar sözün əsl mənasında şah əsərlərdir. Görülən yenidənqurma işləri ilə əlaqədar Sent-Katarins kafedralında bəzi məhdudiyyətlər var. Odur ki, ziyarət etməzdən əvvəl daha düzgün məlumat üçün veb səhifəyə baxın.

2. Niaqara şəlaləsi

Kanadaya səyahət və Sent-Katarinsdə ediləcək şeylər barəsində danışırıqsa, dünyanın ən məşhur şəlalələrindən birini mütləq qeyd etməliyik. Niaqara şəlaləsi bu şəhərə olduqca yaxındır və oraya getmək üçün bir neçə fərqli seçiminiz var. Seçimlərdən biri qatardır, ancaq avtobus, taksi və ya şəxsi maşınla da yola çıxa bilərsiniz. Nəqliyyatdan asılı olaraq Niaqaraya cəmi 15-40 dəqiqə ərzində çatacaqsınız. Nə qədər pul ödəyəcəyiniz də istifadə etdiyiniz vasitədən asılı olaraq 2-55 dollar arasında dəyişəcək.

Niaqara şəlaləsini üç şəlalə əmələ gətirir: At nalı şəlaləsi (və ya Niaqara şəlaləsi), Amerikan şəlaləsi və Duvaq şəlaləsi. Hər il 30 milyondan çox insan Niaqaranın instaqramlıq görüntüsünü görmək üçün buranı ziyarət edir.

3. Sent-Katarinsdə hava

Kanadada həmişə qış olduğuna dair fikirlər var. Əlbəttə ki, bu doğru deyil. Bəli, Kanada sərt qışı olan ölkələrdən biridir, amma bu o demək deyil ki, heç vaxt günəş görməyəcəksiniz. Sent-Katarinsdəki hava şəraitinə gəldikdə deyə bilərik ki, burada yaylar isti, qışlar isə dondurucu və quraqdır. Əgər siz qış aktivitilərini sevirsinizsə, Sent-Katarins və ya Kanadanın digər bölgələrində keçirdiyiniz tətil unudulmaz bir təcrübə olacaq. Məsələn Milad ərəfəsində Kanadaya səyahət edə və konkisürmə, hikinq, xizək sürmək kimi bir çox fəaliyyətlə məşğul ola bilərsiniz. Yox əgər siz yayı və isti havanı üstün tutursunuzsa, narahat olmayın sonrakı bəndlərdə zövqünüzü oxşayacaq faəliyyətlərdən bəhs edəcəyik.

4. Regency Towers

Regency Towers dünyanın müxtəlif yerlərində lüks yaşayış yerləri təklif edən şirkətin mülkiyyətidir. Qüllələr alış-veriş mərkəzləri, əsas yollar, ictimai nəqliyyat, əyləncə mərkəzləri və s. yaxınlığında yerləşir. Yüksək standartlara cavab verən, avadanlıqlarla təchiz edilmiş mənzillər təklif edən Regency Towers-in bir başqa üstünlüyü də ev heyvanlarına olan isti münasibətidir. Bundan əlavə, qüllələrdə açıq üzgüçülük hovuzu və il boyu istirahətin mümkün olduğu gözəl bir həyət var. Şəhərdə çoxlu dostunuz varsa, onları Regency Towers-a dəvət edə bilərsiniz, çünki burada daha çox insanı qarşılamaq üçün sosial otaq var.

5. Ləzzətli Kanada mətbəxi

Yəqin ki, Kanada mətbəxinin ən populyar yeməyi olan Poutine haqqında eşitmisiniz. Xırtıldayan kartof qızartması, pendir və sousdan ibarət Poutinenin donuz əti, bekon və hisə verilmiş ət ilə də olan versiyaları var. Poutine ilə yanaşı, Bannock, Butter tarts, Nova Scotian lobster rolls, Montreal's bagels, Saskatoon berry pie, Montreal-style Smoked Meat, Peameal Bacon, Beavertails və s. ən məşhur yeməklərdəndir. Sadaladıqlarımızın arasında Bannock yerli kanadalıların ənənəvi yeməyi idi, lakin son illərdə Bannockun bir çox yeni versiyasını görə bilərik. Bu yeməyin iki məşhur versiyası var: fırnıda bişmiş və qızardılmış.

İçkilərə gəlincə, Sezar kokteyli böyük bir fərqlə yarışı qazanır. Vodka, clamato, acı sous (Tabasco) və Worcestershire sousundan hazırlanır. Son illərdə bar və restoranlar improvizasiya etməyə və kokteylə burger, hot-doq, slider, soğan halqaları və s. kimi məhsullar əlavə etməyə başladı.

6. Holiday Inn & Suites St. Catharines Conf Ctr

Sent-Katarins çox sayda otel və hostellər təklif edir, lakin Holiday Inn Hotel & Suites St. Catharines Conference Center bütün otellər arasında xüsusi bir yerə sahibdir. Burada 50-dən çox otaq, 11 yemək otağı, üzgüçülük hovuzu, bar, restoran, pulsuz dayanacaq, oyun otağı, idman zalı, boulinq otağı və s. var. Bütün otaqlar WiFi, kondisioner, istilik sistemi, soyuq və isti su, soyuducu, televizor və s. ilə təmin edilmişdir. Bəs bu lüks oteldə qalmaq üçün ödəyəcəyiniz məbləğ nə qədərdir? Qiymətlər 76-100 avro arasında dəyişir. Otelin keyfiyyətini qiymətləndirərkən dörd xüsusiyyəti: yer, təmizlik, xidmət, qitmət, nəzərə alırıq. Bu oteli də beş ballıq sistemdə dörd kimi qiymətləndirə bilərik. Tövsiyə edə biləcəyim digər Sent-Katarins otelləri: Hampton Inn St. Catharines Niagara, Capri Inn, Harbor Heights B&B və s.

7. Gözəl parklar

Sent-Katarinsdə ediləcək ən yaxşı şeylərdən biri parklarda gəzməkdir. Şəhər bu baxımdan çox zəngindir, çünki burada yürüşə çıxa biləcəyiniz, piknik edə biləcəyiniz, dostlarınızla voleybol və ya masa oyunları oynaya biləcəyiniz bir çox yer var. Lakeside Park, Lester B. Pearson Park, Montebello Park bunlardan bəziləridir. Bütün parklar haqqında ətraflı məlumat vermək çətindir, amma sizə Lakeside Park-dan bəhs etmək istəyirəm. Lakeside Park sizə çoxlu attraksion, oyunlar və xoş anlar təqdim edir. Burada üzə, çimərlikdə istirahət edə və dostlarınız ilə çimərlik voleybolu oynaya bilərsiniz. Ayrıca, parkda piknik sahəsi var və burada ağacın altında piknik edə bilərsiniz. Onu da qeyd edim ki, təbiət parklarının bəzilərində gəmi gəzintisinə çıxa bilərsiniz.

8. Kampinq imkanları

Açıq səma və ulduzlar altında yatmaq əla səslənir. Kanada insanların demək olar ki, hər yerdə kampinq edə biləcəyi nadir ölkələrdən biridir. Yerli kanadalılar üçün bu cür imkanlar minlərlə olsa da, ziyarətçilər üçün bir qədər məhduddur. Əksər hallarda vilayətdən asılı olaraq bir miqdar pul ödəməli olacaqsınız. Yalnız bundan sonra təbiətdən və sakitlikdən zövq ala bilərsiniz. Tövsiyə edə biləcəyim bəzi yerlər: Big Valley Camping Resort, Shangri-La Niagara Family Campground, Jordan Valley Campground, Burgoyne Woods, Short Hills Provincial Park və s. Bunların hamısı sizə və ailənizə çoxlu aktivitilər təklif edir. Qiymət aralığı genişdir, lakin internetdə axtarışdan sonra əksəriyyətinin 20-30 dollardan başladığını deyə bilərik. Şübhəsiz ki, daha ucuz və bahalı variantlar tapmaq mümkündür. Ayrıca, bəzi qaydaları da unutmayın: işarələrə diqqət yetirin, təbiətə hörmət edin, atəşi nəzarətdə saxlayın.

9. Yates Street Heritage District

Sent-Katarinsə səyahət zamanı bu distrikti ziyarət etmək mütləqdir. Bir vaxtlar William Hamilton Merritt burada yaşayırdı. Distriktin inşaat işləri 1800-cü ilə aiddir. Əvvəllər bura dəyirman sahəsi idi, lakin bir neçə ildən sonra dəyirman sahibləri burada öz evlərini tikməyə başladı və beləcə distrikt gündən-günə böyüdü. Günümüzdə Yates Street ərazisində dəyirman yoxdur, amma evlər çox yaxşı şəkildə qorunur. Ağaclarla əhatələnmiş küçələri kəşfə çıxmaq, 1800-cü illərə səyahət kimi düşünülə bilər. Distrikdə gözəl bir instaqramlıq foto çəkməyi də yaddan çıxarmayın.

10. Festivallar

Yerli festivallarda iştirak etmək hər zaman əyləncəlidir. Bu sizə ölkənin mədəniyyəti və ənənələrini öyrənmək, həmçinin əylənmək üçün şans verir. Qeyd etdiklərimiz Kanada üçün də keçərlidir. Sent-Katarinsdə keçirilən festivallardan ən məşhuru isə Niagara Grape & Wine Festival-dır. Sent-Katarins dünya səviyyəli üzümlüklərə ev sahibliyi edir. Şəhərin ən məşhur şərab növləri ağ şərab və buz şərablarıdır. Bundan başqa, sənət və musiqi ilə maraqlanırsınızsa, Folk Arts Festival, Art of Peace Festival, S.C.E.N.E. musiqi festivalında iştirak edə bilərsiniz.

Sonda Sent-Katarinsə səyahət etdikdən sonra Kanadada ziyarət edə biləcəyiniz başqa şəhərləri qeyd etmək istəyirəm: Kvebek, Banff, Halifaks, Vaythors, Saskatoon, Şarlottaun, Ottava və Kalqari.