Tehranda 10 İnstaqramlıq yer

"Səyahət etmək sizi susqunlaşdırır, daha sonra hekayətçiyə çevirir". Səyahətin həyatımıza böyük bir faydası var, çünki dünyanın müxtəlif yerlərini ziyarət etmək düşüncə üfüqümüzü genişləndirir, bizə təcrübələr qazandırır, fərqli mədəniyyətləri qəbul etməmizə kömək edir və həyatımızı sərgüzəştlərlə dolu edir.

Səyyah-instaqramçı olduğum üçün izləyicilərimin marağına səbəb olacaq yerləri ziyarət etmək və maraqlı şəkillər çəkmək üçün daima axtarışdayam. Adətən çox ziyarətçisi olmayan və nadir hallarda diqqət mərkəzinə çevrilən bənzərsiz yerlərə səyahəti üstün tuturam və məhz bu səbəbdən İranın Tehran şəhərinə səyahət etdim. Bu səyahətim bütün gözləntilərimi qarşıladı və nəticədə ən çox bəyənilən İnstaqram şəkillərimdən biri buradan oldu.

Qərəzli fikirlərim və bəzi qorxularıma baxmayaraq, Tehran səfəri mənə bir çox yeni şeylər öyrədən və əvvəllər xor gördüyüm, qorxduğum mədəniyyəti qəbul etməyimə kömək edən həyat dəyişdirici bir təcrübə oldu.

Tehran haradadır?

Tehran Cənubi Asiyada yerləşən İranın paytaxtıdır. Son statistikaya görə, təqribən 9 milyon insan buranı öz evi adlandırır və dünyada ən sıx məskunlaşan 24-cü şəhərdir. İranın paytaxtı olan Tehran həm də ölkənin mədəni, siyasi və sənaye mərkəzidir. Sakinlərin əksəriyyəti ingilis dilinin ölkədə ən çox danışılan xarici dillərdən biri olması səbəbilə ingilis dilində danışa bilirlər.

Tarixçilər Tehran sözünün “isti yer” mənasına gəldiyinə inanırlar və şəhər öz adının haqqını verir. Tehranda həm tarixi, həm də müasir çoxlu gözalıcı yerlər var. Şəhər əhalisi mehriban və qonaqpərvərdir. İran mətbəxi isə sadəcə möhtəşəm və çox ləzzətlidir.

Tehrana səyahət

İran rəsmi dili fars dili olan şiə müsəlman dövlətidir. Ölkənin qədim dövrlərdən qalma zəngin bir tarixi var və bu tarix özünü Tehrandakı hər yerdə əks etdirir. Ölkə beynəlxalq siyasətdəki mühüm roluna töhfə verən amillərdən olan çoxlu neft və qaz ehtiyatlarına malikdir.

Məşhur inancın əksinə, İrana, Tehrana səyahət olduqca asandır və şəhər səyəhətçilər üçün (solo və ya qrup şəklində) son dərəcə etibarlı bir yerdir. Hətta bəzi turistlər cinayət hadisələri sayının çox az olması səbəbindən Tehranı dünyanın ən təhlükəsiz şəhəri adlandırırlar.

Tehranda 10 İnstaqramlıq yer

İndi isə keçək Tehranın ən gözəl 10 yerinə. Hansı yerlər ki, burada çəkdirdiyiniz şəkillərə gələn “like” sayı İrandakı görməli yerlər qədər çox olacaq.

1. İran Milli Muzeyi

İran Milli Muzeyi qədim və çağdaş əsərlərin heyrətamiz şəkildə nümayişi sayəsində dünyanın ən yaxşı muzeylərindən biri olmaq şərəfinə sahibdir. Muzey 20000 m² -dən çox geniş bir ərazini əhatə edir və müvafiq olaraq qədim İran mədəniyyətinə və müasir mədəniyyətə həsr olunmuş iki əsas mərkəzi var. İran Milli Muzeyində sərgilənən 300000-dən çox eksponat var ki, bunların arasında müxtəlif sənət əsərlərinə, qədim və müasir dulusçuluq, xəttatlıq nümunələrinə, heykəllərə rast gəlmək mümkündür. Bu muzeydə həm İran tarixi ilə bağlı məlumatlar əldə edə, həm də İnstaqram izləyicilərinizi zamanda səyahətə çıxardacaq şəkillər çəkə bilərsiniz.

2. Milad Qülləsi

Dünyanın 6-cı ən hündür qülləsi və 24-cü ən hündür tikilisi - Milad qülləsi Tehranda yerləşir. Hündürlüyü 435 metr olan və Tehranın hər yerindən görünən bu yer İrana səyahət zamanı şəkil çəkdirməniz üçün ən instaqramlıq yerlərdən biridir. Günəş ilk şəfəqlərini saçarkən və qürub edərkən burada elə bir mənzərə canlanır ki, hər kəs həyatında bir dəfə də olsun bu mənzərəyə şahidlik etməlidir.

3. Azadi Qülləsi

Əvvəlcə Şahyad qülləsi olaraq bilinən qüllə monarxiyaya hörmət göstərmək məqsədi ilə tikilsə də, 1970-ci illərdəki İslam İnqilabından sonra Azadi qülləsi adlandırıldı. Kiçik bir muzeyin də olduğu Azadi Mədəniyyət Kompleksində yerləşən qüllənin memarlığı ənənəvi İran memarlığını sevən insanlar üçün ovsunlayıcıdır. Xüsusilə İrandakı seçkilər zamanı nümayişlər keçirilən qüllə Tehrandakı ən instaqramlıq yerlərdəndir.

4. Jamshidieh Park

Əlburz dağlarının ətəyində yerləşən zəngin flora və faunaya sahib gözəl, Tehrandakı şəhər həyatından uzaq, sakit və rahat bir park. Yerləşimi səbəbi ilə, Tehran şəhərinə gözəl bir mənzərə təqdim edən parkda mənzərədən zövq alarkən bir fincan çay da içə bilərsiniz.

5. Gülüstan Sarayı

Gülüstan sarayı bəlkə də İran sənəti və memarlığının ən yaxşı və ən görkəmli nümunəsidir. Bu saray illər boyu hökm sürən Qacar padşahlarının sərvətlərinin nümayişidir. YUNESKO-nun Ümumdünya irsi siyahısına salınmış Gülüstan sarayında divarları gözalıcı ayna işləri ilə və Qacar dövrünü, həmçinin ondan sonrakı dövrləri əks etdirən rəsmlərlə bəzədilmiş salonlar var. Məşhur Taxtı-Mərmərə (Takht e Marmar) də bu saray ev sahibliyi edir.

6. Toçal Dağı

Əlburz dağları silsiləsindəki Toçal dağında yerləşən dağ-xizək kurortunda xizək sürmək üçün 12 km uzunluğunda ərazi var. Həm sakinlərin, həm də turistlərin sevimlisi bu yerdə turizm sezonunda yer tapmaq müşkül məsələdir. Toçal kompleksində istirahəti daha da marağlı etmək üçün kanatlar, otellər, dadlı yemək təklif edən restoranlar və başqa obyektlər də fəaliyyət göstərir.

7. Təcriş Bazarı

İrana səyahət edirsinizsə, mütləq şəkildə bu ölkədən sizə yadigar qalacaq şeylər almalısınız. Bunun üçün gediləcək ən yaxşı yer isə Təcriş bazarıdır. Bu bazarda siz ehtiyacınız ola biləcək hər şeyi tapa bilərsiniz: ənənəvi suvenirlər satan dükanlar, İran mədəniyyətinə aid bir qədər müasir sənət nümunələri satan mağazalar və s. Eyni zamanda, Təcriş bazarında küçə yeməyi mədəniyyəti də inkişaf edib və bazarı kəşf edərkən dadlı İran mətbəxindən zövq ala bilərsiniz.

8. Milli Zərgərlik Muzeyi

İran Mərkəzi Bankının içərisində yerləşən bu muzey dünyanın ən qiymətli və ən möhtəşəm zərgərlik sərgilərindən birinə ev sahibliyi edir. Bütün dünyada məşhur olan əfsanəvi İran tacları burada sərgilənir! Muzeydə sərgilənənlər saymaqla bitməz, ancaq dünyanın kəsilməmiş ən böyük yaqutu da məhz burdadır! Ziyarətçiləri bu muzeyə gətirən başqa bir eksponat isə 182 karatlıq, dünyanın ən böyük çəhrayı almazı Dərya-i-nur-dur. İran zərgərlərinin qüsursuz sənət əsərlərini, İran İslam İnqilabından əvvəl İranın son şahlarının taxdığı zinət əşyalarını və daha bir çox bənzərsiz cəvahiratı görmək üçün bu yerə getməyi və hamını İrana səyahətə sövq edəcək İnstaqram şəkilləri çəkməyi unutmayın.

9. Saadabad Sarayı

Saray bir az öncə haqqında bəhs etdiyimiz Təcriş bazarına yaxındır. Qacar və Pəhləvi şahları üçün inşa edilmiş Saadabad sarayı İran kraliyyətinin sərvətinin və əzəmətinin təcəssümüdür. 300 hektarlıq saray kompleksində yam-yaşıl bağlar, tarixi binalar, muzeylər mövcuddur. Onu da qeyd edim ki, vaxtı ilə hakimiyyətdə olan şəxslər üçün tikilən müxtəlif saraylar, indi onların istifadə etdiyi mebelləri və müxtəlif sənət əsərlərini nümayiş etdirən muzeylər kimi fəaliyyət göstərir.

10. Tehran Bazarı

Bu bazar şəhərin ən qədim bazar yeridir. 3km² ərazidə yerləşən bazarın keçidlərinin uzunluqları 10km-dən çoxdur. Böyük olması səbəbi ilə bu bazar kompleksinə çoxsaylı giriş var və bazarın çeşidli bölmələri müxtəlif mal növləri üzrə ixtisaslaşmışdır. Məşhur İran xalçalarını almaq istəyənlər Tehran bazarındakı keyfiyyəti və növləri başqa yerdə tapa biləyəcəkləri üçün buranı mütləq ziyarət etməlidir.

Yolunuz açıq olsun!