Dehlidə 12 İnstaqramlıq yer

Hindistanın paytaxtı Dehli, hər turist və səyyahın istəklərinə cavab verir. Dehlidə tarix həvəskarlarından sənətsevərlərə, təbiət həvəskarlarından fotoqraflara və piknik səyahətçilərinə qədər hər kəsin marağlarını qarşılayacaq bir şey mövcuddur. Dünyanın ən böyük şəhərlərindən biri olan Dehliyə hər kəs ailəsi və dostları ilə birlikdə səyahət edə və burada unudulmaz zaman keçirə bilər. Onu da qeyd edim ki, Dehli gözəlliyi ilə tam İnstaqramlıqdır!

Əgər siz Hindistana səyahət etmək istəyirsinizsə, səyahət siyahınızın başına Dehlini qoyun. Hindistanın tarixi və eyni zamanda, qədim kralların, imperatorların hakimiyyətinin bir çox hekayəsi Dehli ilə əlaqəli olduğu üçün ölkəyə səyahət edənlərin böyük əksəriyyəti belə edir. İndiki vaxtdan danışsaq, nəyə baxırsınızsa, mütləq Dehli ilə əlaqəli bir şey tapacaqsınız. İstər Dehlinin siyasi koridorları olsun, istərsə də iş xəbərləri, istər Dehli qışı, istər orada tapılan dadlı yeməklər – Dehli bütün zənginlikləri ilə sizi valeh edəcək.

Bəs, Dehlidə ən çox bəyəniləcək İnstaqram şəkillərini harada çəkdirmək olar? Dehlidəki İnstaqramlıq yerlər saymaqla bitib-tükənməz, ancaq gəlin Hindistana səyahət zamanı paytaxt Dehlidə mütləq ziyarət edib şəkil çəkdirməniz gərəkən Dehlidə 12 İnstaqramlıq yerlə tanış olaq.

1. Hümayun türbəsi

Hümayun türbəsi, adından da göründüyü kimi, Böyük Moğol İmperatoru Hümayunun əbədi yatdığı yerdir. Bu türbə Dehlinin Nizamuddin East bölgəsində yerləşir və Hindistan yarımadasının ilk bağ məqbərəsi kimi tanınır. Bu tarixi məzar 1569-1570-ci illərdə Hümayunun arvadı Banu Bəyim tərəfindən tikdirilmişdir. Bu möhtəşəm məqbərə nəhəng, təmtəraqlı Moğol bağlarının(Mughal Garden) ortasında yerləşir və qış aylarında gözəlliyinə gözəllik gəlir. Türbənin ətrafında çox sayda şəkil çəkən turistə rast gəlmək mümkündür.

2. Qütb Minar minarəsi

Dünyanın kərpicdən tikilmiş ən hündür qülləsi olan Qütb Minar, Dehlinin ikinci ən böyük abidəsidir. Mehrauli-də yerləşir və 1192-ci ildə Dehli Sultanlığının qurucusu Sultan Qütbəddin Aybək tərəfindən inşa etdirilib. Daha sonra qüllə əsrlər boyu müxtəlif hökmdarlar tərəfindən təmir etdirilmişdir. Bu möhtəşəm abidənin mənzərəsi sizi Hindistanın zəngin tarixi ilə tanış edəcəkdir. Siz Qütb kompleksində Qütb Minardan başqa, Iron pillar və Alai Darwaza kimi bir çox qədim tikililərə rast gələcəksiniz. Şəhər sakinlərinin sevimli piknik yerinə çevrilən bu yerdə qeyd olunan Qütb festivalı da turistləri özünə cəzb eidr. Ona görə də, əmin olun ki, Qütb Minarı ziyarət etməklə siz həm zəngin Hindistan tarixi ilə tanış olacaq həm də İnstaqramda ən çox "like" alan şəkillərinizdən birini çəkdirəcəksiniz.

3. Qırmızı Qala

Qırmızı qala Yeni Dehlidə yerləşən tarixi bir qaladır. Sultan Şahcahan bu qalanı 1639-cu ildə tikdirmişdir və imperatorların, onların ailələrinin yerləşdiyi yer olmaqdan başqa, Moğol dövlətinin formal və siyasi mərkəzi olmuş, eyni zamanda, Hindistanın paytaxtının Aqradan Dehliyə dəyişməsində də böyük rol oynamışdır. Bu qala, indi Köhnə Dehli kimi məşhur olan Şahcahanabadın orta əsr şəhərlərindən biri idi. Hər il milyonlarla insan Qırmızı Qalanı ziyarət edir və burada ən gözəl şəkillərindən birini çəkdirir.

4. Hindistanın qapısı

Hindistanın məşhur National War Memorial-ı Hindistanın qapısı olaraq da bilinir və Rajpath boyunca yerləşir. 42 metr uzunluğundakı "India Gate", Sir Edwin Lutyens tərəfindən dizayn edilmişdir və ölkədəki ən böyük müharibə abidəsidir. Hər il Respublika günü paradına ev sahibliyi edən abidə, bu ərəfədə milyonlarla insan tərəfindən ziyarət edilir.

5. Lotos məbədi

Hindistana səyahət edərkən mütləq ziyarət etməli olduğunuz bu məbədin binası ağ ləçəkli lotus şəklində dizayn edilmişdir. Lotos məbədi dünyanın ən məşhur quruluşlarından biridir. Kanadalı memar Fariborz Sahba tərəfindən dizayn edilən məbədin inşası 1986-cı ildə yekunlaşmışdır. Lotos məbədi dini, kastaları, cinsiyyəti ayırmadan bir insan irqini dəstəkləyir və məqsədi ölkənin birliyini təbliğ etməkdir. Buna görə də bu məbəd həm də birlik simvolu adlanır. Bu cür heyrətamiz mənzərəni başqa bir yerdə görə bilməyəcəyiniz üçün Dehliyə səyahət zamanı mütləq şəkildə gedilməsi gərəkən yerlərdən biridir.

6. Tullantıdan möcüzəyə parkı

Dehlinin füsünkarlığına əlavə olaraq West to Wonder Park, Dünyanın yeddi möcüzəsinin tullantılardan hazırlanmış kopyalarına malikdir. İnşasında 150 ton tullantıdan istifadə edilən parkdakı ikonik abidələrlə çəkilən şəkillər İnstaqramda böyük marağa səbəb olacaqdır.

7. Milli Müasir İncəsənət Qalereyası

Hindistanın sənətsevərlər ölkəsi olduğu deyilir və "National Gallery Of Modern Art" (NGMA) doğurdan da bu insanlar üçün cənnətdir. 29 Mart 1954-cü ildə Hindistan hökuməti tərəfindən qurulmuş və 12.000 metr² sahəni əhatə edən qalereya, sonradan açılmış Mumbay və Banqalordakı filiallarına nisbətən ən böyüyüdür və 14 mindən çox sənət əsərinin olduğu kolleksiyaya sahibdir.

8. Gurudwara Bangla Sahib

Dehlinin ən görkəmli dini yerlərindən biri olan Gurudwara Bangla Sahib, Siqhlərin səkkizin qurusu Har Krişan ilə olan əlaqəsi ilə tanınır. 1783-cü ildə, Moğol İmperatoru II Aləm Şahın səltənət dövründə, Sikh General Sardar Bhagal Singh tərəfindən tikilmiş möhtəşəm məbəd Dehlinin ən məşhur turistik yerlərindən biridir və buranı ziyarət insanın ruhunuzu təzələyir.

9. Moğol bağları

Prezident sarayının ruhu kimi məşhur olan Moğol bağları, Rashtrapati Bhavan kompleksinin içərisindədir. 1917-ci ildə Sir Edwin Lutyens tərəfindən Lady Edding üçün dizayn edilən bu bağ 13 hektarlıq geniş bir ərazidə yayılmışdır və ingilis üslubu ilə Moğol memarlığının gözəl bir birləşməsidir. Moğol bağlarında dağlaləsı, nərgiz, Asiya zanbağı, sünbülçiçəyi, viskariya və s. daxil olmaqla nadir və nəsli kəsilməkdə olan 159 çiçək növü bitir.

10. Raj Ghat

Raj Ghat, Janpath'dan 4 km məsafədə yerləşir və Hindistan tarixində əhəmiyyətli bir yer tutur, çünki Mahatma Qandi 1948-ci ildə öldürüldükdən sonra burada yandırılmışdı. Bu məkanda yerlilər, eləcə də əcnəbi turistlər millət atasına öz hörmət və sevgilərini göstərirlər.

11. Jama məscidi

Hindistanın ən böyük məscidi - "Jama Masjid", Sultan Şahcahanın Tac Mahal və Qırmızı Qaladan sonra inşa etdirdiyi ən möhtəşəm tarixi memarlıq abidələrindən biridir. Eyni zamanda 25000 nəfəri qəbul edə biləcək böyüklükdə olan məscidə təəssüf ki, namaz vaxtında, qeyri-müsəlman turistlərin daxil olması qadağandır.

12. Jantar Mantar

Yeni Dehlidə yerləşən Jantar Mantar, zaman və kosmosun öyrənilməsinə kömək etmək və inkişaf etdirmək üçün hazırlanmış nəhəng bir rəsədxanadır. Jantar Mantar, Maharaja Jai ​​Singh tərəfindən inşa edilmiş və inşası 1724-cü ildə tamamlanmışdır. Caypur, Ujjain, Bənarəs və Mathura şəhərlərində yerləşən beş rəsədxana kolleksiyasının bir hissəsi hesab olunur. İnstaqramları üçün fotosessiyalar həyata keçirmək məqsədilə çox sayda turist buraya axın edir.

Dehliyə səyahət etmək üçün ən yaxşı vaxt hansıdır?

Dehliyə səyahət etməyi düşünürsnüzsə, oktyabr-mart ayları Dehlini ziyarət etmək üçün əla vaxt olardı. Dehlidə yaz çox isti keçir, istilik 42 dərəcəyə qədər yüksəlir, ona görə də yay vaxtı ora getmək məsləhət deyil. Dehliyə səyahətinizi Musson dövründə etsəniz, temperaturda bir az azalma olacaq, ancaq yağış turistik yerlərə gəzinti planlarınıza mane ola bilər. Beləliklə, qış / yaz mövsümü Dehlini ziyarət etmək üçün ən yaxşı aydır.