Qanaya səyahətdən əvvəl bilsəydim dediyim 10 şey

Yeni və əyləncəli bir macəra axtarırsınız? Adi səyahətlərdən sıxılmısınızsa və tamamilə fərqli bir yer axtarırsınızsa, o zaman Qanaya səyahət etməlisiniz.

Qanaya getməyə hazırsınızmı? Bu sizi həyəcanlandırırmı? Qana haqqında maraqlı faktlar bilmək istəyiriniz? Qanada vaxtınızı daha səmərəli və unudulmaz etmək üçün nələri bilməlisiniz? Getdik!

1. Ancaq əvvəla, Qana haradadır?

Qana ya da rəsmi olaraq Qana Respublikası, Afrika qitəsinin qərbində yerləşən bir ölkədir. Ölkənin qonşuları Fildişi Sahili, Burkina Faso və Toqo olsa da, cənubunda Qvineya körfəzi (Atlantik Okeanı) yerləşir. Uzun illər Britaniya müstəmləkəsi olaraq yaşayan Qana, Afrikada müstəqilliyini qazanan ilk ölkə olması ilə də tanınır. Nəticə etibarilə, bu, ölkəni daha da maraqlı edir.

2. Qanaya səyahət etmək təhlükəsizdirmi?

Qana Afrikanın ən dinc dövlətlərindən biridir! 2018 Qlobal Sülh İndeksinə görə, Qana Afrikanın dördüncü, dünyanın isə 39-cu ən dinc ölkəsi olaraq qərarlaşdı. Bir çox digər Afrika ölkələri vətəndaş müharibələrinə və qonşu ölkələrlə müharibələrə başlasa da, Qana sabitliyi qoruyub saxlaya bildi. Bəli, Qana Afrikanın ən təhlükəsiz ölkələrindən biridir.

3. Qananın coğrafiyası

Ölkə coğrafi olaraq sahil xətti bölgəsi, ekvatorial meşələr bölgəsi və savanna bölgəsi olaraq üç hissəyə, səth quruluşuna görə isə beş təbii əraziyə ayrılır. Ərazilər bunlardır: alçaq düzənliklər, Aşanti dağlıq əraziləri, Akvapim-Toqo silsilələri, Volta hövzəsi və yüksək düzənliklər. Ölkənin cənub hissəsində ölkənin yüksək nöqtələri, paytaxt Akkradan Toqoya qədər uzanan Akwapim-Toqo dağ silsilələri yerləşir və dağ təpələrində və yamaclarda sıx rütubətli meşələr müşahidə olunur.

Qana torpaqlarının 66%-ni təmin edən və ümumi ərazisi 407,093 km² olan Volta çayı mənbəyindən bəslənir. Çayın aşağı hissələrində Akosombo su anbarı süni şəkildə yaradılmışdır. Bundan başqa Qanada mənbəyini Aşanti bölgəsindən götürən və Atlantik okeana tökülən bir çox çay var.

4. Təbiət

Qananın təbiəti ilə bağlı nəyi bilməlisiniz? Ölkə daxilində bir çox bitki və heyvan növü var. Xüsusilə tropik meşələr biomüxtəlifliyə səbəb olur. Bununla birlikdə, son illərdə ölkə ərazisindəki rütubətli meşələrin sahəsi ildən-ilə azalır. Belə ki, rütubətli meşələr 20-ci əsrdə 85.000 kvadrat kilometrlik sahəni əhatə edərkən, 21-ci əsrdə bu rəqəm bu rəqəm kəskin azalaraq 40.000 kvadrat kilometrə çatmışdır. Hər il ölkədə yüzdə 1,7 səviyyəsində meşə itkisi yaşanır.

Həmişəyaşıl rütubətli meşələr, hündürlüyü 50 metrə, qalınlığı 3 metrə çata bilən və 300 ilə qədər yaşayan ağaclarla örtülü bir yerdədir. Savanna bölgələrində adətən tək olan Baobab ağacları müşahidə olunur, sahil bölgələrində isə Mangrov meşələri ilə birlikdə bir çox palma ağacına da rast gəlinir.

Ölkədəki vəhşi təbiət çox müxtəlifdir. Qanada tutuquşu, qartal, ağacdələn, firəngtoyuğu və göyərçin kimi tropik quş növlərinə əlavə olaraq bir çox köçəri quş sürüsü müşahidə edilir. Çayların və su hövzələrinin sahillərində isə bir çox qu quşu növü var. Qana bir çox məməlinin də evidir. Aslan, leopard, fil, civet pişiyi, bizon, begemot, donuz və bir çox antilop növləri savannada xüsusilə görülür. Həmçinin Qanada şimpanze, bir çox makaka və pavian kimi meymun növləri də tez-tez müşahidə edilir.

Qananın Atlantik okean sahilləri dünyanın ən zəngin dəniz canlıları növlərinin tapıldığı nöqtələrdən biridir.

5. Mühüm yerlər və tarixi binalar

Qananın tarixi və mədəniyyəti ilə tanış olmaq üçün bəzi yerlər:

Müstəqillik meydanı

Müstəqillik meydanı (Black Star Square) Qananın paytaxtı - Akkra sərhədlərində yerləşir. Şəhərin ən sıx və canlı nöqtəsi olaraq da bilinən Müstəqillik meydanı ölkədəki yerli həyatı müşahidə edə biləcəyiniz vacib nöqtələrdən biridir. Gün ərzində bu meydanın ətrafında bir saat vaxt keçirə bilərsiniz.

Osu qəsri

Osu qəsri danimarkalılar tərəfindən 1600-cü illərdə inşa edilmişdir. Christiansborg Castle olaraq da bilinən bu tarixi qala, illər keçdikcə dəfələrlə yıxılmış və yenidən qurulmuşdur. Bu gün Akkra şəhərinin əhəmiyyətli turistik ünvanlarından birinə çevrilmiş bu tarixi binanı ziyarət etməklə özünüzü qəsrdə deyil, nəhəng bir villanın bağçasındakı kimi hiss edə bilərsiniz.

Qana Milli Muzeyi

Qana Milli Muzeyi Qananın yerli mədəniyyəti və tarixi barədə öyrənmək istəyənlər üçün doğru ünvanlardan biridir. Qiymətli tarixi əsərlər, heykəllər və gündəlik əşyaları görə biləcəyiniz muzeyi ziyarət etmədən bu ölkəni tərk etməməlisiniz.

Kvame Nkruma Parkı və Mavzoley

Ölkənin qurucusu və ilk prezidenti Kvame Nkrumanın adını daşıyan Kvame Nkruma Parkı (Kwame Nkrumah Memorial Parkı) Kvame Nkruma Mavzoleyinə də ev sahibliyi edir. Don Artur tərəfindən dizayn edilmiş bu mavzoley, Akkra şəhərinin əlamətdar yerlərindən biridir.

Boti şəlalələri

Koforiduanın 17 km şimal-şərqində yerləşən təbii möcüzə - Boti şəlalələri füsunkar bir görkəmə malikdir. Akkra şəhərindən təxminən bir saat yarımlıq məsafədə yerləşən bu şəlalələr, fotoqrafiya həvəskarları üçün də bənzərsiz çərçivələr yaradır. Bir qadını və bir kişini simvolizə etdiyi düşünülən iki şəlalənin axdığı yer, Qananın ən məşhur yerlərindən biridir.

6. Akkra

Qanaya getməyin bir başqa səbəbi də Akkraya səyahət etməkdir. Qananın paytaxtı Akkra, Qananın dünyaya açılan qapısıdır. Afrikanın ən müasir şəhərlərindən biri olan Akkra, Qananın ticarət, sənaye və mədəniyyət mərkəzidir.

Akkra savanna bölgəsində yerləşir. Tropik iqlimin üstünlük təşkil etdiyi Akkrada illik orta temperatur 26,8 dərəcədir. Ən isti ay 28 dərəcə ilə Mart, ən sərin ay isə 24 dərəcə ilə avqust ayıdır.

7. Qanaya səyahət etmək üçün ən yaxşı vaxt hansıdır?

Qana yağışlı mövsüm olan may-iyul ortası və avqust ortası-oktyabr xaricində hər mövsüm ziyarət edilə bilər. Qeyd edək ki, ölkədəki soyuq dövrlərdəki rütubət, isti dövrlərdə müşahidə olunandan daha yüksəkdir. Qanaya səyahətinizin nə zaman olmasının böyük əhəmiyyəti yoxdur, çünki bütün hallarda unudulmaz bir təcrübə yaşayacaqsınız.

8. Akkrada harada qalmalı?

Akkrada 5 ulduzlu otellərdən daha çox qonaq evləri və büdcəyə uyğun otellər yayğındır.

Akkrada hostellər: Aplaku Guesthouse, Wolton Guesthouse, Crystal Hostel, Sikasso Beach Hostel, Pink Hostel International.

Akkrada münasib otellər: Alisa Hotel North Ridge 3*, Mensvic Palace Hotel 3*.

Akkrada lüks otellər: Labadi Beach Hotel 5*, La Palm Royal Beach Hotel 5*, Golden Tulip Hotel 5*, Novotel Hotel 5*.

9. Mədəniyyət

Akkraya səyahət zamanı ləzzətli nə yeyə bilərsiniz? Yerli yeməklərdən ən məşhurları: fufuç kenkey, banku, ampesi və Qana kababı. Qəlyanaltı olaraq kelewele və tatale çox istifadə olunur. Yerli alkoqol istehsalı da həyata keçirilir. %40 spirtli Akpeteshie ginini, Palm şərabını və Pito adlı darı şərabını sınamaq olar. Ölkədə istehsal olunan alkoqolsuz şərablar da var: Asaana (Misir şərabı), Lamujii (Zəncəfil şərabı).

Qanada həmçinin çox canlı bir gecə həyatı var. Əksər gecə klublarına giriş pulsuzdur. Siz burada hip-hop, r&b stilində musiqilər dinləyə və rəqs edə bilərsiniz.

Festivallar və şənliklər Qana mədəniyyətinin də ən vacib hissəsidir. Bir çox etnik qrupun özünəməxsus müxtəlif festivalları var. Homowo, Odwira, Aboakyer, Dodoleglime, Hogbetsotso, Tedudu, Deza və Sandema bu festivallara misaldır. Doğum, yetkinlik dövrünə keçid, evlilik və ölüm də müxtəlif rituallarla qeyd olunur. Hər bayram ayrı bir şənlik kimidir. Akkranın ən vacib festivalı avqust və sentyabr aylarında təşkil olunan Homowo festivaldır. Heyrətləndiricidir deyilmi?

10. Alış-veriş

Bəs Akkrada alış-veriş barədə nə demək olar? Özünüzə, ailənizə və dostlarınıza xatirə olaraq bir şeylər almanız üçün yaxşı yerlər varmı? Əl işi olan taxta oymalar, rəngli rəsmlər, yerli geyimlər və Afrika kuklaları Qanadan xatirə kimi almaq üçün ən yaxşı hədiyyələrdir. Aid to Artisans Ghana, Loom və Woodi Boutique əsas alış-veriş yerlərindəndir. Mokola açıq bazarı isə həm hər şeyi tapa biləcəyiniz, həm də yerli sakinlərlə foto çəkdirib ünsiyyət qurmaq imkanı əldə edəcəyiniz ideal bir yerdir.