Rumıniya – Vlad Tepes, Bran qalası və onlara gedən yol

Balkan yarımadasının şimalında yerləşən Rumıniyanın şərq sahillərini Qara dəniz suları yuyur. Karpat dağları, dünyanın ən uzun ikinci çayı Dunay, şam meşələri sayəsində zəngin təbiətə malikdir. Bir çox tarixi hadisələrin meydanına çevrilən bu ölkədə çox saylı mədəniyyətlərin vəhdətini və zəngin mədəni irsi görə bilərik. Ölkədə ortodoks kilsələri çoxluq təşkil etsə də rəsmi olaraq dövlət dini yoxdur. Burada ən qədim insan fosillərinin tapılması Rumıniyanı həm də ən qədim məskənlərdən edir. Avropanın doqquzuncu böyük ölkəsinin neft ehtiyyatları da böyükdür. Bugün Rumıniyanın gəlir mənbəyinin əsasını neft və kənd təsərrüfatı sahələri təşkil edir. Sürətli inkişafı nəticəsində Rumıniya, Avropa Birliyi ölkələri siyahısına daxil ola bilib.

Rumıniyada turizm

Ölkədə ən çox inkişaf etmiş sahələr arasında turizm xüsusilə fərqlənir. Təbiəti, qədim qalaları, Transilvaniyanın ürküdücü havası, Sibui bölgəsinin orta əsr qəsəbələri, əsrlərlə yaşı olan Sakson kilsələri Rumıniyanın çoxlu turist cəlb etməsinin səbəblərindəndir. Möhtəşəm dağ mənzərələri və az sayda insan ayağı dəymiş bölgələr turistləri heyran edir. ÖIkəyə səyahət edən turistlərin satının son zamanlarda artmasının səbəblərindən biri də, Rumıniyanın ən təhlükəsiz ölkələrdən hesab olunmasıdır. 2017-ci ildə 162 ölkə arasında Rumıniya 30-cu yerdə qərarlaşmışdı. Bugün 75%-lik təhlükəsizlik göstəricisinə sahibdir. Bu faizi daha da artırmaq üçün bəzi nüanslara diqqət etmək lazımdır. Bura səyahət edənlər Buxarestin cənub-qərb hissəsində yerləşən “Ferentari” məhəlləsindən uzaq gəzsələr daha yaxşıdır. Çünki bura paytaxtın cinayət məhəlləsi kimi tanınır. Pulların mübadiləsini də ancaq “Exchange” mərkəzlərində etmək daha yaxşı olar. Əks halda fırıldaqçıların qurbanına çevrilmək mümkündür. Bəzi insanlar səyahət etdiyi ölkədə maşın kirayələyib gəzməyi sevir. Bu Rumıniyada da mümkündür. Amma bəzi markalardan uzaq durmaq şərti ilə. “Volkswagen”, “Opel”, “Mercedes” bu markalar arasındadır. Ölkədə ən çox oğurlanan maşınların bu markalar olduğunu nəzərə alaraq, ehtiyatlı olmaq lazımdır. 

Transilvaniyanın turistik bölgələri

Orta əsrlər Avropasına getmək istəyənlər Transilvaniyaya səyahət edə bilərlər. Qorxuducu və ürküdücü mənzərələr görmək istəyənlər isə Transilvaniyada Drakulanın evinə baş çəksələr məmnun qalacaq. Bran qalasına daşlarla örtülü köhnə torpaq yollar və Drakula filmlərində gördüyünüz dağlar ətrafında dolanan dəmir yolu ilə getmək mümkündür. Daha çox məntəqəni görmək istəyənlər üçün alternativ avtobus xətləri də var. 

Transilvaniyadakı bir sıra yerlər YUNESKO-nun Mədəni İrs siyahısına daxil edilib. Viscri, Biertan və bu bölgdə olan neçə-neçə tarixi tikililər və kilsələr turistlərin mütləq görməli olduğu məkanlar arasındadır. Burada orta əsrlər Avopasının şəhər görüntüsünün hələ də saxlanılması şəhərə tarixi sima verir.

Bran qalası

Rumıniyanın özü qədər məşhur qalası Bran qalasıdır. Qala Transilvaniya və Valaxiyanın sərhəddində Braşov qəsəbəsində yerləşir. Bran qalası Kont Drakulanın evi kimi tanınsa da qalada Drakulaya aid heç bir şəxsi əşya yoxdur. Burada daha çox qalada yaşamış zadəgan ailələrinə məxsus əşyalar görmək olar. Bölgənin ən çox ziyarət edilən tarixi abidələri arasında Peonidi və Hunyadi qalaları da var. Bu qalalar vampir qalaları kimi də tanınır. Braşovun bir çox gəziləcək yerləri var. Qəsəbənin ən böyük küçəsi “Strada Republici”, çox saylı kafe və restoranlar, tarixi tikililərlə turistlərin yolunu gözləyir.

Rumıniya və Drakula

1897-ci ildə irlandiyalı yazar Bram Stoker “Drakula” romanını yazır. Romanda baş qəhrəman Drakulanın prototipi kimi Valaxiya hökmdarı Vlad Tepesin və məkan olaraq Bran qalasının seçilməsi nəticəsində Rumıniya Drakulanın vətəni olaraq anılmağa başlanılır. Transilvaniyanın şöhrəti bütün dünyaya çatır. Tarixdə olduqca qəddar, düşmənlərini xüsusi amansızlıqla öldürən Rumıniya şahzadəsi III Vlad Tepesin Drakula olduğu ehtimalı da gündən-günə artır. Qısaca XV əsrə gedək. Vlad Tepes Rumıniyada yerləşən Valaxiya kralının oğludur. Onun atası II Vladın Osmanlı imperiyası ilə uzun müddətli çəkişməsi buranın sultan tərəfindən işğal edilməsi ilə nəticələnir. Valaxiya kralının sultana vergi və iki oğlunu verməsi qarşılığında krala daxili müstəqiliyinin saxlamaq təklif edilir. Kralın razılaşması nəticəsində Valaxiya şahzadələri Tokat (və ya Edirnə) şəhərinə gətirilir. Burada yeniçəri məktəbində böyüyən kiçik şahzadə Vlad illər sonra sultan tərəfindən Valaxiyaya vali təyin edilir. “Fürsət bu fürsət”- deyən şahzadə Valaxiyanı ələ keçirib müstəqilliyini elan edir. Sultan Fateh II Mehmetin vergi tələbini rədd edir və elçiləri şiş payalara keçirir. Bu hadisədən sonra Fatehin göndərdiyi 1000 nəfərlik atlı dəstəni də eyni üsulla məhv edir. Tarixi qeydlərdə göstərilir ki, Vlad Tepes yeniçəri cildində türk ordusuna gizlicə daxil olaraq, Osmanlının Serbiyadan Qara dənizə qədər ərazilərdə olan 24 minə yaxın əskərini məhv edir. Sultanın göndərdiyi 90 minlik ordudan daha 15 min nəfərini məhv etməsi sultanın səbr kasasını daşıran son damla olur və özü şəxsən Vladla döyüşə qatılır. Valaxiya yaxınlığında təxminən üç kilometrlik ərazisi olan meşədə ağaclara saplanmış 20 min nəfərə yaxın Osmanlı əskəri, yaralı qadın və uşaqlar onu qarşılayır. Sonda isə Vlad Osmanlı əskərləri tərəfindən başı kəsilərək balla doldurulmuş küpün içərisində Osmanlı paytaxtına göndərilir.

Drakula adının mənşəyi Vlad Tepesin atası II Tepesə verilmiş “Drakul” rütbəsi ilə əlaqədardır. Osmanlıya və ümumilikdə, müsəlmanlara qarşı aparılmış mübarizədə seçildiyinə görə ona Alman Cəngavərlər Cəmiyyəti tərəfindən verilən bu adın mənası “əjdaha soyundan gələn” kimi tərcümə dilir.

Bram Stokerin əsəri yazmazdan öncə hadisələrin baş verdiyi məkan kimi başqa bir ərazi seçdiyi bildirilir. Ehtimal olunur ki, daha sonra Bran qalası və Vlad Tepes haqqında yazılı qaynaqlarda oxuduğu məlumatlar onun nəzərlərini Transilvaniyaya yönəldir. Əsərdə Drakula bəyaz tənli, gündüzlər tabutda yataraq gecələr ovlanan bir obraz kimi təsvir edilir.

Transilvaniyada festivallar

Transilvaniyada hər il rəngli festivalların təşkil edilməsi artıq adət halını alıb. Filmsevərlər üçün beynəlxalq film festivalları, musiqi və teatr həvəskarlarının qatıla biləcəyi festivallar olduqca rəngli keçir. Ən maraqlı konseptə malik festivallar arasında isə “Sighisoara Medieval Festival”-da var. Hər il iyun ayının son həftəsi keçirilir. Festivala qatılanlar orta əsrlərə aid geyimlərdə sözügedən dövrün rəqslərini ifa edirlər. Artıq daha çox bayram əhval-ruhiyyəsində keçirilən festival hər il bir az daha maraqla qarşılanır.

Rumıniyanın görüləcək digər yerləri

Sighişoara - Transilvaniyada kiçik, orta əsrin izlərini daşıyan traixi qəsəbədir. UNESCO-nun xüsusi qoruması altındadır. III Vlad Tepesin burada doğulduğu bildirilir.

Kral Dekebalusun heykəli - Tarixi Rumıniya krallığı Dakianın sonuncu kralı Dekebalusun qayalara oyulmuş heykəli olduqca heyrətamizdir. 40 metr hündürlüyündə Dunay çayı hövzəsində 1994-2004-cü illərdə qayalar üzərində yonulub.

Scarisoara buz mağarası

Əgər Rumıniyaya yay aylarında gedəcəksinizsə, ziyarət etməli olduğunuz məkanlar arasında Scarisoara buz mağarasına mütləq baş çəkin. Bura dünyanın ən böyük yeraltı buzlağına malik mağara kimi məşhurdur. Mağara Qərbi Rumıniya ərazisində yerləşir. Burada buz qatı mağaranın daxilində olan soyuq hava səbəbilə yaranır. Mağarada havanın temperaturu müsbətə qalxmır və hər zaman termometrin göstəricisi 0º-nin altında olur.

Strambu-Baiut

Bu ərazidə yerləşən meşələr insan ayağı dəyməyən “vircin” bölgələr kimi tanınır. Meşənin ərazisi təxminən 250 hektara yaxındır. Burada yaşı 500 ilə qədər olan nəhəng ağaclar, nadir bitkilər var. Transilvaniyadan geri qalmayan bədheybətli meşələr hər il yüzlərlə turist tərəfindən ziyarət olunur. 

Libearty Bear Sanctuary

Zarnesti ərazisində yerləşən zoopark və sirklərdən xilas edilmiş ayıların təbii şəraitdə yaşamaları üçün bölgələr yaradılıb. Burada 100-ə yaxın ayıya hüquqları yenidən qaytarılıb. Zarnestiyə getmək hər zaman mümkün olmaya bilər. Bunu turizm şirkətləri ilə əvvəlcədən planlaşdırmaq lazımdır. Çünki, bölgəni ziyarət etmək ilin müəyyən vaxtlarında mümkündür. Hərhalda, bu sirk və zooparklarda tamaşaçılardan “yorulmuş” heyvanları yenidən bu streslə yükləməmək üçün atılmış doğru addımdır.

Adı çəkilən turistik bölgələrdən də göründüyü kimi, Rumıniya səyahətçilərə hər cür alternativlər təklif edir. İstər tarixi əraziləri sevənlərin, istər təbiət qoynunda vaxt keçirmək istəyənlərin və adrenalin həvəskarlarının, istərsə də modern səyahəti üstün tutanların seçimi Rumıniya ola bilər.