Avstriya təhsil vizası mərhələləri

Şərq ilə qərb arasındakı Avropa ticarətinin qovşağında olan almandilli ölkə - Avstriya Avropada məşhur bir turizm nöqtəsidir. Avstriya AB dövləti olaraq Şengen bölgəsinə qoşulduqdan sonra (1997) xarici ziyarətçilərin Avstriya Şengen vizası üçün müraciət etməsi mümkün oldu. 2017-ci ildə Avstriyanın bütün dünyadakı səfirlik və konsulluqlarına qısamüddətli viza üçün 304.556 müraciət daxil olub. Elə həmin il ölkəni AB vətəndaşları da daxil olmaqla, 38,6 milyon səyahətçinin ziyarət etdiyi proqnozlaşdırılır. Gördüyünüz kimi, Avstriya turistlərin ən sevimli yerlərindən biridir. Avstriyaya səyahət edən şəxslərdən biri də siz olmaq istəyirsinizsə, Avstriya viza prosesi, viza rüsumu və s. haqqında kifayət qədər məlumat əldə etməlisiniz. Gəlin bununla bağlı bütün detalları aydınlaşdıraq və bəzi suallara cavab verək: Avstriya vizasına necə müraciət etmək olar? Avstriya viza rüsumu nə qədərdir? Avstriyanın vizasız rejim tətbiq etdiyi ölkələr hansılardır?

Avstriya, həmçinin Avropada təhsil almaq üçün ən maraqlı ölkələrdən biri kimi tanınır. Statistikaya görə, Avstriya universitetlərindəki tələbələrin 15%-i müxtəlif ölkələrdən gəlmədir. Bu tələbələrdən biri olmaq istəyirsinizsə, Avstriya təhsil vizası, Avstriya təhsil vizasına müraciət və Avstriya viza tələbləri haqqında bilməyiniz vacibdir.

Təhsil sahəsinə nəzər yetirməzdən əvvəl ən vacib sualla başlayaq: Avstriya vizasına necə müraciət etmək olar? AB üzvü olmayan ölkələrin vətəndaşları Avstriyaya giriş edərkən sərhəd məmuruna bəzi səyahət və şəxsiyyəti təsdiq edən sənədlər təqdim etməlidirlər. Bunlar aşağıdakılardır:

- Pasport və ya etibarlı olan digər səyahət sənədi. Əvvəlki on il ərzində verilmiş və ayrılma tarixinizdən sonra ən azı üç ay müddətində qüvvədə olmalıdır.

- Avstriya viza rejiminə tabesinizsə, vizaya ehtiyacınız olacaq.

Bilməli olduğunuz vacib bir fakt var. Avstriya sərhəd məmuru Avstriyaya girməyinizə icazə verilib-verilməməsi ilə bağlı son qərarı verir. Sərhəd məmuru sənədlərinizi yoxlayacaq və ola bilsin ki, Avstriya səyahətinizlə bağlı bəzi suallar verəcək: Avstriyanı ziyarət etməyinizin səbəbi nədir? Avstriyada planlarınız nədir? Avstriyada harada qalacaqsınız?

Avstriya vizasına müraciət etmək üçün aşağıda göstərilən sənədləri hazır etməlisiniz:

• Avstriya vizası üçün müraciət forması. Onu tamamilə doldurmalı və çap etdikdən sonra imzalamalısınız

• İki ədəd şəkil. Bu şəkillər müvafiq ölkənin pasport ölçüsündə olmalı, parlaq fonda çəkilməli, üz cizgilərini aydın şəkildə barındırmalıdır

• Pasport/səyahət sənədiniz Avstriyadan (Şengen zonası) ayrılmaq istədiyiniz gündən ən azı üç ay müddətində qüvvədə olmalıdır

- Əvvəlki on il ərzində verilmiş olmalıdır.

- Həmçinin ən azı iki boş səhifə ehtiva etməlidir.

• Əvvəllər aldığınız Şengen vizalarının surəti (varsa)

• Gediş-dönüş üçün səyahət marşrutu. Avstriyaya giriş və çıxış tarixləri və uçuş nömrələrini ehtiva edir

• Şengen bölgəsi üçün səyahət sığortası (30000 avro dəyərində)

- AXA Assistance və Europ Assistance, Avstriyaya səyahət edən və Avstriya viza kriteriyalarına cavab verən xaricilər üçün səyahət sağlıq sığortası planı təklif edir. Dünyanın dörd bir yanındakı Avstriya səfirlikləri və konsulluqları hər iki şirkəti tanıyır

• Qonaqlama yeri barədə sənəd. Bu, Avstriyada planlaşdırılan qalma müddətinin hamısını əhatə edən otel rezervasiyasıdır

• Ailə vəziyyətinin sübutu. Bu, nikah şəhadətnaməsi, uşaqların doğum şəhadətnamələri, həyat yoldaşının ölüm şəhadətnaməsi və s. ola bilər

• Avstriyada qalacağınız müddət ərzində sizi təmin edəcək kifayət qədər maliyyə resurslarınızın olmasının sübutu

• Məqsəd məktubu. Məktubda Avstriyanı hansı səbəbdən ziyarət etdiyiniz və tətil planınızın hərtərəfli cədvəli qeyd edilməlidir (ehtiyac olarsa)

Avstriya vizasız ölkələr

Üçüncü ölkə vətəndaşları Avstriyaya səyahət etmək və ya yaşamaq üçün Avstriya vizasına müraciət etməlidirlər. Viza müraciətçinin vətəndaşlığı və məqsədinə əsasən verilir. Bir AB/AİB ölkəsi və ya İsveçrə vətəndaşısınızsa, Avstriyanı ziyarət etmək üçün vizaya ehtiyacınız yoxdur. Etibarlı səyahət sənədinizin, səyahət sığortanızın, maliyyə resurslarınızın olması kifayətdir. Ancaq əgər Avstriyada 3 aydan çox müddətdə qalmaq istəyirsinizsə, gəlişinizdən sonrakı dörd ay ərzində yerli hökumətdə qeydiyyatdan keçməlisiniz.

Avstriya viza rüsumu

Avstriya viza rüsumu nə qədərdir? Viza rüsumu aşağıda sadalanan bütün Avstriya qısamüddətli viza kateqoriyalarına aiddir. Nəzərə alın ki, müraciət edən şəxsdən konsulluq rüsumu, xarici şirkətin xidmət haqqı və ya müraciət forması rüsumu kimi əlavə xərclər tələb oluna bilər. Cari Avstriya viza rüsumları:

- Yetkinlər üçün 80 avro

- 6-12 yaş arası uşaqlar üçün 40 avro

- Azərbaycan, Rusiya və Ermənistan vətəndaşları üçün 35 avro

Aşağıdakı şəxslərdən Avstriya viza rüsumunu ödəmək tələb olunmur:

- Altı yaşdan kiçik uşaqlar.

- AB/AİB vətəndaşlarının həyat yoldaşları/partnyorları, uşaqları və himayədarları

- Araşdırma və ya təhsil məqsədi ilə səyahət edən şagirdlər, tələbələr, məzunlar və pedoqoji heyətin üzvləri.

- Nümayəndə heyətinin rəsmi üzvləri, rəsmi nümayəndələr heyətinin daimi üzvləri, rəsmi görüşlərdə iştirak edənlər, konsulluqlar, danışıqlar prossesi və mübadilə proqramlarında iştirak edənlər, və hökümətlərarası şirkətlərdən rəsmi dəvətə sahib olanlar

- Qeyri-kommersiya təşkilatları tərəfindən təşkil edilən seminar, konfrans, idman, mədəni və ya təhsil fəaliyyətinə qatılan 25 yaşdan kiçik təmsilçilər.

Avstriya təhsil vizası

Beynəlxalq tələbələr Avstriya təhsil vizası almaq üçün xüsusi standartları təmin etməli və müvafiq sənədlərə sahib olmalıdırlar. Şərtlər ölkəyə görə dəyişir. Viza prosesi 1-4 həftə çəkə bilir. AB xaricindən olan beynəlxalq tələbələr Avstriyada təhsil almaq üçün tələbə vizasına müraciət edə bilərlər. Avstriya tələbə vizaları iki kateqoriyaya bölünür:

1. Visa C daşıyıcısı ölkədə 90 günə qədər qala bilər.

2. Visa D daşıyıcısının isə 91 gündən 6 aya qədər qalmasına icazə verilir.

Avstriya Avropa Birliyinin üzvü olmaqla, digər AB ölkələrinin vətəndaşlarına vizasız təhsil alma imkanı verir. Ölkəyə daxil olmaq üçün etibarlı səyahət sənədiniz (şəxsiyyət vəsiqəsi və ya pasport) olmalıdır. Üç aya qədər qalacaq tələbələr üçün əlavə sənədləşmə tələb olunmur. Avstriyada üç aydan uzun müddətdə qalmağı planlayanlar isə müvafiq bələdiyyə orqanlarında şəxsən qeydiyyatdan keçməlidirlər. AB tələbələrindən əlavə giriş xərcləri alınmamalıdır. Üstəlik onların Avstriya tələbələri kimi maddi yardım almaq məqsədilə yaşayış vizası almağa da haqqı var. Avstriyaya gəlməsi üçün viza tələb edilən tələbələr isə Avstriya səfirlik və ya konsulluqlarına müraciət etməlidirlər. Digər tərəfdən ölkədə altı aydan çox müddət ərzində qalmağı planlaşdıran AB üzvü olmayan tələbələr "Yaşayış İcazəsi - Tələbə" üçün müraciət etməlidirlər. Bu məqsədlə ölkəyə daxil olmaq üçün D vizasına müraciət etməli və qəbul edildikdən sonra müvafiq qurumlardan Avstriyada yaşama icazəsi almalıdırlar. Universitet və ya qurumun öz qəbul tələbləri və ya giriş imtahanı varsa, əvvəlcə nəticələr alınmalı və qəbul məktubu tələbə vizası və ya yaşama icazəsi müraciəti üçün təmin edilməlidir.

Bütün Avstriya təhsil vizası tələblərini qeyd etdik, indi isə Avstriya təhsil vizasına müraciət müddətinin mərhələlərinə nəzər salaq:

1. Universitetdən qəbul: Yerinizi təmin etmək üçün sizdən giriş haqqı və ya depozit ödəməyiniz tələb oluna bilər.

2. Yaşayış icazəsi üçün randevu alın: Avstriya səfirliyi və ya konsulluğu qəbul məktubunuzu, həmçinin maliyyə resurslarınızı, səyahət sığortanızı və digər səyahət sənədlərinizi görməlidir.

3. Yaşayış icazənizin təsdiqlənməsini gözləyin: Müraciətlərin baxılması üç aya qədər davam edə biləcəyi üçün, nəzərdə tutulmuş gəliş tarixindən əvvəl müraciət etməlisiniz.

4. Viza üçün randevu alın: Yaşayış icazəsini aldıqdan sonra D vizası üçün müraciət edə bilərsiniz. Səfirlik və ya konsulluqda görüş götürmək 6 həftəyə qədər vaxt tələb edə bilər, odur ki, son dəqiqəyə qədər gözləməyin.

5. Səfirliklə görüş: Viza müraciəti forması, şəkillər, pasport və səyahət sağlamlıq sığortası kimi tələb olunan sənədləri özünüzlə götürün.

6. Qərar mərhələsi: Əksər hallarda müraciətinizlə bağlı qərar dörd həftə ərzində veriləcəkdir.

7. Yerli hakimiyyət orqanlarında qeydiyyatdan keçin: Avstriyaya gəldikdən sonra üç gün ərzində Avstriya rəhbərliyində qeydiyyatdan keçməlisiniz. Bunun üçün qeydiyyat forması doldurmalı və ünvanınızı göstərməlisiniz.