Səyahət üçün nə götürməli?

2020 hamı üçün fəlakət dolu bir ildir. Xüsusilə də səyahətçilər üçün. Mart ayından bəri dünyanın bir çox ölkəsi əcnəbilər üçün sərhədlərini bağladı. Ölkələrin sərhədlərini bağlaması ilə bütün səyahət planları alt-üst olan viza sahibi insanların nələr çəkdiyini düşünün. Xülasə, bir çox səyahət həvəskarı yay planlarının depressiv bir şəkildə tənəzzülə uğradığını gördü. Xoşbəxtlikdən bu yaxınlarda ölkələr xarici vətəndaşları yenidən qarşılamağa başladığı üçün bir ümid işığı göründü. Uzun bir gözləmədən sonra nəhayət tətilə çıxa bilərik, ura! Bəs səyahət üçün nə götürmək lazımdır? Bu gün səyahət üçün özünüzlə götürməniz lazım olan şeylərdən bəhs edəcəm, daha dəqiq desəm, səyahətdən öncə hazırlanmağınıza kömək edəcək siyahı təqdim edəcəm. Səfərə hazırlaşarkən nəyə ehtiyacınız ola biləcəyini əvvəlcədən təxmin etmək vacibdir. Bel çantanızı səyahət üçün hazırlayarkən, bu növ səyahətin dəbdəbəli olmadığını və xarici ölkələrdə pul ödəmək istəmədiyiniz şeylərin ola biləcəyini, bu səbəblə də bəzi spesifik əşyalara ehtiyacınızın olduğunu bilməlisiniz.

Budur, həsrətində olduğunuz səyahət üçün ehitayacınız olan 15 əşyanı diqqətinizə çatdırırıq.

Bel çantası

Səfər üçün nə götürməli? İlk növbədə qeyd edim ki, bel çantası mütləqdir. Bu əşya səyahət zamanı həyatınızı asanlaşdıracaq. Çantanızı həmişə özünüzlə gəzdirdiyiniz üçün pasportunuz, cüzdanınız və digər mühüm sənədləriniz kimi ən vacib əşyalarınızı itirməkdən qorxmayaraq burada saxlaya bilərsiniz. Həmçinin noutbuk götürməyi planlaşdırırsınızsa, onu çamadanda deyil də, bel çantanızda saxlamağınız yaxşı olar. Səbəbi isə hava limanı işçilərinin çamadanlarla əsasən yumşaq davranmaması, buna görə də dizüstü kompüterinizə və ya digər elektron cihazlarınıza zərər gələ bilməsidir. Ehtiyacınıza uyğun olaraq 22L-dən 40L-ə qədər fərqli ölçülərdə, çantadan istifadə edə bilərsiniz. Ancaq bel çantasının çoxlu cibə sahib olmasına önəm verin ki, böyük bir çantada kiçik bir əşyanı axtarmaq üçün uzun vaxt sərf etməyəsiniz.

İlk yardım dəsti

Mövcud vəziyyəti nəzərə alsaq, siyahınızdakı ən vacib əşya ilk yardım dəstidir. Ən əsası, dəstinizdə bir neçə tibbi maska, spirt və dezenfeksiya vasitələri olduğundan əmin olun. Həmçinin, atalar sözündə deyildiyi kimi  “ehtiyyat igidin yaraşığıdır”. Səyahətiniz zamanı kiçik xəsarətlər ala bilərsiniz. Xüsusi ilə hikinq, kampinq və ya velosiped sürmək kimi fəaliyyətlər planlayırsınızsa tibbi sarğı, tibbi yod, ağrıkəsici və s. kimi şeylərə ehtiyacınız olacaqdır.

Şəxsi gigiyena vasitələri

Dezenfeksiya vasitələri əlləriniz, telefonlarınız və digər əşyalarınız üçündür, ancaq təbii ki, səyahət zamanı öz gigiyenanıza diqqət etməyi də unutmamalısınız. Gedəcəyiniz ölkənin marketlərində sevdiyiniz dezodorant, şampun və digər təmizləyici maddələri tapmamaq kimi ehtimalın olduğunu bilmək vacibdir. Beləliklə, ölkənizi tərk etmədən öncə gigiyena vasitələrinizi alıb, çantanıza qoyub-qoymadığınızdan əmin olun. Hər ehtimala qarşı qulluq üçün vasitələri və ətrinizi də özünüzlə götürün, bəlkə onları da asanlıqla tapa bilməyəcəksiniz.

Kilid

Səfərə hazırlaşarkən götürülməsi ən vacib əşyalardan biri də kiliddir. Xüsusilə limitli bir büdcə ilə səyahətə çıxırsınızsa, yəni 4 və ya 5 ulduzlu lüks bir oteldə deyil də hosteldə qalacaqsınızsa kilid çox işinizə yarayacaq. Hosteldə şkaf tapacaqsınız, amma bu şkafın kilidi olmayacaq. Buna görə də, baqajınızın təhlükəsizliyini təmin etmək üçün ya hosteldən, ya da supermarketdən kilid almalı olacaqsınız. Məsələn, mən Bostona səyahətim zamanı hostelə gec saatlarda çatmış və kilidi də elə hosteldən almaq məcburiyyətində qalmışdım. Resepsiyonist bir kilid üçün məndən 5 ABŞ dolları almışdı. Ancaq bu kilidi öz ölkəmdə təxminən 2 ABŞ dollarına əldə edə bilərdim.

Kiçik çanta

Səfər üçün bel çantamızı hazırlayarkən, çoxumuz ilk növbədə buraya nə qədər şey doldura biləcəyimizi düşünürük. Ancaq çantanın nə qədər ağır ola biləcəyini düşünmürük, elədir? Belə ki, məhz bu səbəbdən mən sizə böyük bel çantanızdan savayı kiçik bir çanta götürməyinizi də təklif edirəm. Bu həmçinin bel çantanızı otel və ya hosteldə qoyub şəhəri kəşf edərkən pasportunuz və pul qabınız kimi vacib əşyalarınızı yanınızda götürməyiniz üçün əlverişlidir. Mən daha öncə Nikonumun çantasını bu məqsədlə istifadə etmişdim, amma bunu etməyi məsləhət görməzdim. Xoş kiçik bir çantaya sahib olmaq daha yaxşı olar.

Rahat ayaqqabılar

Hər yerə geyinməyə cəsarət edə bilməyəcəyiniz parlaq və dəbdəbəli Nike ayaqqabılarınızdan savayı, özünüzlə geniş məqsədli rahat ayaqqabılar və ya idman ayaqqabıları götürün. Suya davamlı, güclü idman ayaqqabılarınızın olması bədahətən gələn hikinq planınızı da həyata keçirməyə imkan verə bilər. Bununla yanaşı, gözəl görünən, lakin rahat olmayan ayaqqabıları uzun müddət geyinmək ayaqlarınıza zərər verə bilər.

Yenidən istifadəyə yararlı su qabı

Həsrətlə gözlədiyiniz bu səyahətdə sizin üçün əla bir məsləhət: Çoxlu su için! Bunun ən yaxşı yolu düz yanınızda, çantanızda təkrar istifadə edilə bilən su qabında suyunuzun olmasıdır. Həmçinin bu yolla özünüzü mağazalarda uyğun qiymətə su axtarmaq problemindən qurtara bilərsiniz. Su qabının isə filtrli olanlarından istifadə etməyiniz daha məqsədə uyğundur, çünki inkişaf edən dövlətlərin çoxunda krandan su içmək qəti şəkildə düzgün deyil. Filtrli bir su qabı sizi suda olan zərərli bakteriyalardan qoruyacaqdır.

İsti paltar

Uzun səyahətə çıxmaq, sizdən üzləşə biləcəyiniz hər şeyi əvvəlcədən düşünməyi və plan qurmanızı tələb edir. Tətil yerinizdəki hava şəraitinin necə olacağını yoxlamaq bəzən yetərli olmur. Həm də hava haqqında məlumatları 1 həftə və ya 10 gündən daha çox müddətə əldə etmək nadir hallarda mümkündür. Buna görə də səyahətiniz yayda belə olsa, istiliyinizi təmin edəcək əlavə paltar götürdüyünüzdən əmin olun. Eyni zamanda hava limanlarında temperatur sərin ola bilər, özünüzü bu cür dəyişkən hava şəraitindən qorumaq həmişə yaxşı bir fikirdir.

Çoxlu futbolka

Səyahət edərkən hər zaman gözlənilməz hadisələr və ya qəzalar olur. Bəzən şiddətli yağışla qarşılaşa bilər və yaxud da palçığa bata bilərsiniz. Bu səbəbdən dəyişikli şəkildə istifadə edə biləcəyiniz kifayət qədər futbolkanız olduğundan əmin olun. Həmçinin indi pandemiya dövrüdür, futbolkalarınızı mütəmadi olaraq dəyişib yumanız daha yaxşı olar.

Adapter

Səfərə hazırlaşarkən telefonunuzun və noutbukunuzun şarj cihazlarının yaxşı vəziyyətdə olduğundan və səyahət zamanı sizi əsəbiləşdirməyəcəyindən əmin olmalısınız. Həm də bəzi ölkələrdə elektrik voltajlarının fərqli olduğunu unutmayın, məsələn ABŞ-da 110V və Avropada 240V.  Bu səbəblə elektron cihazlarınız üçün bir stabilizator və ya universal səyahət adapteri götürməyiniz məsləhətdir.

Zəruri geyimlər

Daha əvvəl də vurğuladığım kimi, pandemiyanın ortasında sağlamlığın qorunması ilə bağlı təhlükəsizlik tədbirlərinə riayət etmək və gigiyenaya diqqət yetirmək vacibdir. Özünüzlə çoxlu corab, alt paltarı götürməniz və duş aldıqdan sonra onları mütəmadi olaraq dəyişdirməniz bu dövr üçün əla bir fikirdir.

Sevimli kitabınız

Səfərə hazırlaşarkən səyahətiniz vaxtı maraqlı vaxt keçirməyinizə yardımçı olacaq vacib bir əşyanı unuda bilərsiniz - ən sevdiyiniz kitabı. Xüsusilə təyyarədə, avtobusda və ya qatarda uzun məsafələrə səyahət edirsinizsə, maraqlı bir kitab bu zaman ən yaxşı dostunuz olacaqdır. Həmçinin yatmazdan yarım saat əvvəl kitab oxumaq yaxşı yuxu üçün effektiv bir yoldur.

Suya davamlı çanta

Suya davamlı zəncirbəndli çanta səyahət zamanı ehtiyacınız ola biləcək vacib "həyat qurtarıcı" əşyalardandır. Onları bir çox məqsəd üçün istifadə edə bilərsiniz. Hər şeydən əvvəl, bu çantalar hikinq və ya trekkinq zamanı yağış yağdığı təqdirdə telefonunuzu və ya digər elektron cihazlarınızı quru saxlaya bilirlər. Həmçinin suya davamlı zəncirbəndli çantalardan hava limanında içkiləri və ya məzələri saxlamaq üçün də istifadə edə bilərsiniz.

Sukeçirməz gödəkçə

Şimaldakı bir ölkəyə səyahət edirsinizsə və ya səyahətinizin əsas məqsədi təbiətdə vaxt keçirməkdirsə, sukeçirməyən gödəkçə götürdüyünüzdən əmin olun. Xüsusən də hikinq, trekkinq, velosiped sürmək və ya kampinq üçün səyahət edirsinizsə, bu əşya səyahət üçün götürməniz gərəkənlər siyahısında ən üstlərdə olmalıdır. Ölçünüzə uygun, yaxşı materialdan hazırlanmış, yüngül bir gödəkçə hərəkətinizi məhdudlaşdırmadan sizi soyuqdan və yağışdan qoruyacaq.

Kamera (mümkündürsə)

Əminəm ki, səyahət edərkən hər birimiz bu inanılmaz xatirələri ölümsüzləşdirmək üçün rəngarəng İnstaqram şəkilləri çəkməyi düşünürük. Telefonla şəkil çəkmək əlverişlidir, lakin kamera ən önəmli detalları tuta bilir və bu da İnstaqramınız üçün daha yüksək keyfiyyətli şəkillərə səbəbiyyət verir. Yəni içərisində kamera olan kiçik bir çanta götürmək sizə ağır olmaz, elə deyilmi?

Qısa xülasə

Çoxumuz sərt COVID-19 nəzarətləri bir qədər yumşaldıqdan sonra səyahət etmək şansı əldə etməyi arzulayırıq. Avqust ayından bəri bir çox ölkə beynəlxalq səyahətlərdəki qadağaları aradan qaldıraraq turistlərin ölkələrinə gəlməsinə icazə verir. Bu uzun müddətdir gözlədiyimiz səyahət planı üçün əla bir şansdır. Oxuduğunuz bloqda əsasən bu sualı cavablandırmağa çalışdım: Səyahət üçün nə götürməli? Bu məqsədlə qeyd etdiyim 15 əşya bunlardır: bel çantası, ilk yardım dəsti, şəxsi gigiyena vasitələri, kilid, kiçik çanta, rahat ayaqqabılar, yenidən istifadəyə yararlı su qabı, isti paltar, çoxlu köynək, adapter,zəruri geyimlər, sevimli kitabınız , suya davamlı çantalar, suykeçirməz gödəkçə və kamera (istəyə görə).